TuTi lazzat ki KHushbu

By

gham ki kali chandni
parbaton ki chotiyon par so gai hai
niche andhe ghaar mein
khwahishon ki dhup shayad kho gai hai
ghas ki bhini mahak ko sungh kar
aur shabnam chat kar
aarzu ka nim-murda sanp zinda ho gaya hai
parbaton par
rengti pagdandiyan
bal kha rahi hain
tutti lazzat ki khushbu
jism mein lahra rahi hai

tilismi ghaar ka darwaza

By

roz aadhi raat ko
ek tilismi ghaar ke
khufiya darwaze ke sine mein janam leti hain ghaibi dhadkanen
ghaar ki gahrai mein
chalte hue sangit ke qadmon ki chap
raat ki andhi hawa ka hath pakde dur tak jati hai sath
ek zahri sanp
khinch aata hai sar ki chah mein
lakh khatre hain zara si rah mein
band darwaze ke pas
narm bhini ghas mein
baith jata hai wo kundli mar ke
aur apna phan uthae
jhumta rahta hai sar ki tan par
khelta rahta hai apni jaan par
tutta hai jis ghadi sar ka bahao
sanp ko aata hai tao
band darwaze pe ghussa mein patakta hai wo sar
aur das leta hai us ko apna zahri phan utha kar
subh hone tak to mar jata hai darwaza
magar
roz aadhi raat ko

tanhai

By

wo aankhon par patti bandhe phirti hai
diwaron ka chuna chatti rahti hai
khamoshi ke sahraon mein us ke ghar
mare hue suraj hain us ki chhati par
us ke badan ko chhu kar lamhe sal bane
sal kai sadiyon mein pure hote hain
wo aankhon par patti bandhe phirti hai

siyah sayon ki tishnagi mein

By

siyah sayon ki tishnagi mein
udas lamhon ko sath rakkho
shikasta lafzon ke sahilon par
safed jhagon mein aks dhundo
khandar ki bosidgi mein chhup kar
purani yaadon ke hont chumo
khala ke shanon pe hath rakh kar
siyahi-e-shab ki zulf sungho
sahar ki nazuk hawa ki ujli kalai pakdo
badan ki pili barahnagi ko bayan kar do

siyah chand ke TukDon ko main chaba jaun

By

siyah chand ke tukdon ko main chaba jaun
safed sayon ke chehron se tirgi tapke
udas raat ke bichchhu pahad chadh jaen
hawa ke zine se tanhaiyan utarne lagen
sajae jaen chhaton par mari hui aanhken
palang ret ke khwabon ke sath so jae
kasi ke rone ki aawaz aae suraj se
sitare ghaar ki aanton mein tutte jaen
main apni qainchi se kaghaz ka aasman katun
nahif waqt ki ranon pe khwahishen rengen
lahu ka zaiqa danton mein muskurane lage
agar ye hath meri pith par chipak jaen
siyah chand ke tukdon ko main chaba jaun