zindan-nama

By

aaj tariki-e-shab had siwa lagti hai
jaane kya baat hui hai ki ghutan hoti hai
go ki ek umr guzari hai isi zindan mein
nim-tarik se is gosha-e-viran se meri
aisa lagta hai ki derina shanasai hai
us ki diwaron pe likkhe hain kai afsane
jin mein dil-gir tamannaon ki gahrai hai
us ki be-jaan zamin ne meri aankhon mein bahut
khushk sine ke liye aab-e-baqa paya hai
us ki makhdush shikasta si chhaton ne aksar
shab dhale nala-e-dil-gir ko dohraya hai
usi zindan ke rauzan ne sahar ke qisse
mehrban ho ke mere haal pe dohrae hain
ab ye aalam hai ki gardan ka hai hamraaz ye tauq
bediyan hain mere pairon ki saheli ab to
ab to zanjir ki jhankar mein lutf aata hai
ab ye parwana rihai ka jala do to sahi
usi zindan ko meri qabr bana do to sahi
taq ki sham-e-talluq bhi bujhao to sahi
us se kah do ki rihai nahin hone wali
mujh mein zindan mein judai nahin hone wali
lazzat-e-wasl use ab nahin milne wali
dil gai raat sahar ab nahin hone wali

jawan beTi se bap ka KHitab

By

meri beti meri jaanan
tumhein sab yaad to hoga
bahut pahle bahut pahle
jawani ka tha jab aalam
mere bazu mein taqat thi
mere sine mein himmat thi
unhen ayyam mein ek din
meri aaghosh-e-ulfat mein
kisi ne la ke rakkha tha
tumhaara phul sa chehra
badan be-intiha nazuk
mere in sakht hathon mein
ajab narmi si aai thi
meri is aankh ne bu se liye the aur roi thi
mujhe to yaad hai sab kuchh
tumhein bhi yaad to hoga
nae kapde khilaune dudh ki botal kharidi thi
bahut bechain hota tha jo tum raaton ko roti thin
chali thin apne pairon par jo tum pahle-pahal beta
mujhe aisa laga tha chal padi dil ki mere dhadkan
qadam do chaar le kar tum jo ik-dam ladkhadai thin
meri sansen mere sine ke andar thartharai thin
meri godi mein rafta rafta din guzra kiye aur tum
na jaane sote sote mere sine par jawani tak
meri jaan aaj aai ho
tumhein mujh se shikayat hai
ki main ne sakhtiyan ki hain
meri wo sakhtiyan tum ko bahut ranjur karti thin
mujhe bhi ranj hota tha
magar thi tarbiyat lazim
tumhein sanche mein dhalna tha
tabiat ko badalna tha
tumhein sab yaad to hoga
meri beti mere bazu mein wo quwwat nahin baqi
tumhaari har khushi ki hain zamanat dhadkanen meri
magar ek mashwara sun lo
ki ab sab bhul jao tum
nae rishte banao tum
hamara sath chhutega
nae rishton ke meri jaan masail kam nahin hoge
magar tab hum nahin honge
akeli jaan hogi tum
faqat wo tarbiyat hogi
jo main ne sakhtiyan kar ke
tumhaare dil mein dali hai
wo tum ko yaad to hogi
sabaq sab yaad to hoga

ek ajnabi laDki

By

sham sham jaisi thi raston pe halchal thi
kaam karne wale sab
apna farz ada kar ke
apne apne maidan se
kuchh thake to kuchh haare
apne ghar ko jate the
bhid thi dukanon par
ghar ko lautne wale
agli subh ki khatir
ruk ke mal lete the
har kisi ko jaldi thi
aur sham dhalti thi
ek hum the aawara
kal na tha koi sauda
is liye sadak par hum
dhire dhire badhte the
bhagte hue logon par nigah karte the
aur un pe hanste the
apni mastiyon mein gum
be-niyaz duniya se
aage badh rahe the hum
muskura rahe the hum
lekin ek manzil par
hum thithak gae ek dam
ek ajnabi ladki
hum pe ek nazar kar ke
khub khub hansti thi
munh ko pher leti thi
phir palat ke wo hum ko dekhti thi hansti thi
jaane apne jaison par
us ki khilkhilahat ne
kaun sa asar dala
kis ne jaane kya socha
kis ne jaane kya samjha
hai khabar mujhe apni
meri mastiyan sari
sham ke dhundalke mein
dur hoti jati thin
khud pe sharm aati thi
aur wo shokh si ladki
hum pe hansti jati thi
ab meri nigahon ko apna dhyan aaya tha
ajnabi si ladki ne dil bahut jalaya tha
ab main zat ka apni khud tawaf karta tha
apne aks ko apne aaine mein takta tha
ab niyaz-mandi thi meri be-niyazi mein
ab wo ajnabi ladki
dusre ek aawara
par nigah karti thi
us ko dekh kar phir wo
be-panah hansti thi
wo ajib ladki thi wo ajib ladki thi

wo jo husn-e-kul ki dalil tha wo KHayal aa ke saja gaya

By

wo jo husn-e-kul ki dalil tha wo khayal aa ke saja gaya
ladin yun nigah se bijliyan koi jaise parde utha gaya
main hikayat-e-dil-e-be-nawa mein ishaarat-e-gham-e-jawidan
main wo harf-e-akhir-e-motabar jo likha gaya na padha gaya
main charagh-e-hasrat-e-nim-shab mein sharar-e-atish-e-jaan-ba-lab
dil-e-pur-umid ki lau tha main mujhe khud wo aa ke bujha gaya
main ghubar-e-rah-e-talab raha hua dar-ba-dar jo chali hawa
main ujad ke jab hua mutmain to wo mujh ko dil mein basa gaya
pas-e-parda dil ka rafiq tha sar-e-parda mera raqib tha
main miyan-e-radd-o-qubul tha ki wo aa ke parda hata gaya
mujhe fikr thi meri zat par koi rang bhi na chadhe magar
wo kamal-e-ghairat-e-aina mera aks mujh ko dikha gaya
mera dil amin tha nigah ka thi nigah mahram-e-tajraba
wo fusun-e-jalwa ki aabru mere tajrabon ko mita gaya

tere shahr-e-amn ka kya kahen ki har ek makan juda sa hai

By

tere shahr-e-amn ka kya kahen ki har ek makan juda sa hai
hain daron pe qufl lage hue sar-e-taq dip bujha sa hai
tera dasht bhi to hai be-karan meri wahshaton ki bhi had nahin
mere jurm-e-khana-kharab ko to ye rahguzar bhi dilasa hai
teri yaad aai to kis tarah main pukarta hi chala gaya
koi dam ruka to khabar hui ki ye koh koh-e-nida sa hai
meri ghairat-e-hama-gir ne mujhe tere dar se utha diya
kuchh ana ka zor jo kam hua to khabar hui tu khuda sa hai
abhi la ki manzil-e-sakht mein hun fareb-o-wahm-o-guman liye
mere dil mein phir bhi basa hua tera nam radd-e-bala sa hai
ye masafaten shab-e-tar ki ye na khatm hone ke silsile
abhi fasla rag-e-jaan se hai to hanuz garche zara sa hai
tere khatt-e-husn-e-jamal ko mere harf-e-aina-saz ne
kai rang de diye pur-kashish magar ab bhi ek khala sa hai

khul gaya KHalwat-e-tanhai ka qissa ai hai

By

khul gaya khalwat-e-tanhai ka qissa ai hai
chal gaya shahr mein afwah ka sikka ai hai
qumri-o-tuti-o-bulbul hain jise dekh ke mast
us gul-andam ko tum ne nahin dekha ai hai
kya kahen kaisa laga chand hamein us ke baghair
dub kar jab gham-e-hijran mein wo nikla ai hai
us ke fiqre se main kya samjhun koi samjha de
dafatan meri taraf dekh ke bola ai hai
al-gharaz qissa-e-do-lafz ye sun le ai dost
kucha-e-yar ba-sad ranj na chhuta ai hai