aap se uns hua chahta hai

By

aap se uns hua chahta hai
phir koi bab khula chahta hai
mere ahbab mein kar do ye khabar
wo bhi ab mera hua chahta hai
aql hi ko nahin nudrat marghub
dil bhi andaz naya chahta hai
hum nai dosti ke qail the
koi dushman ka pata chahta hai
jo khatakta hai ek 'alam' ko
wo bhi logon ki dua chahta hai

ai dost teri baat sahar-KHez bahut hai

By

ai dost teri baat sahar-khez bahut hai
par tarz-e-takallum tera khun-rez bahut hai
gum-sum sa khada hai koi darwaza-e-dil par
is sham ka manzar to dil-awez bahut hai
mahfil mein tere hone se hai rang pe mausam
ahwal-e-khas-o-am tarab-khez bahut hai
ek shakhs jo uljha hai nai fikr-o-nazar mein
wo sahib-e-khush-fahm hai aur tez bahut hai
jo baat tu kahta hai wahi baat ho shayad
lekin teri ye baat gham-angez bahut hai
bhadke hue shoale hi mata-e-dil-o-jaan hain
'alam' tere kuche mein hawa tez bahut hai

guzre lamhat ka ehsas hua jata hai

By

guzre lamhat ka ehsas hua jata hai
daman-e-waqt yunhi mujh se chhata jata hai
main ujale ko mohabbat ka khuda likhta hun
wo andhere hi se manus hua jata hai
jis ki khushbu se fazaon mein mahak thi shab-bhar
subh-dam us ki taraf sanp badha jata hai
mujh ko dar hai koi aabid na bahak jae kahin
dil-ruba chand ka andaz hua jata hai
dur rah kar bhi rag-e-jaan se lipat jate hain
aur is dil mein ujala sa hua jata hai
is qadar zahr pilaya mujhe us ne 'alam'
talkhi-e-zist ka ehsas mita jata hai

dushmanon ko mere hamraaz karoge shayad

By

dushmanon ko mere hamraaz karoge shayad
waqt-e-tanhai mein aawaz karoge shayad
tum bahut tez ho shah-zor ho ustad bhi ho
tum bina par ke bhi parwaz karoge shayad
ye khula jism khule baal ye halke malbus
tum nai subh ka aaghaz karoge shayad
talkh andaz se badloge zamane ka mizaj
apne atraf ko na-saz karoge shayad
tum to khamosh ho lo main hi zara bolta hun
baat se baat ka aaghaz karoge shayad