aaghaz hua hai ulfat ka ab dekhiye kya kya hona hai

aaghaz hua hai ulfat ka ab dekhiye kya kya hona hai
ya sari umr ki rahat hai ya sari umr ka rona hai
shayad tha bayaz-e-shab mein kahin iksir ka nuskha bhi koi
ai subh ye teri jholi hai ya duniya bhar ka sona hai
tadbir ke hathon se goya taqdir ka parda uthta hai
ya kuchh bhi nahin ya sab kuchh hai ya miti hai ya sona hai
tute jo ye band-e-hayat kahin is shor-o-shar se najat mile
mana ki wo duniya ai 'afsar' sirf ek lahad ka kona hai

asar dekha dua jab raat bhar ki

asar dekha dua jab raat bhar ki
ziya kuchh kuchh hai taron mein sahar ki
hue rukhsat jahan se subh hote
kahani hijr ki yun mukhtasar ki
tadap utthe lahad ke sone wale
zamin ki samt kyun tum ne nazar ki
sahar dekhen ye hasrat le gae hum
bataen kya tumhein kyunkar sahar ki