tujhse bichhaD ke hum bhi muqaddar ke ho gae

By

tujh se bichhad ke hum bhi muqaddar ke ho gae
phir jo bhi dar mila hai usi dar ke ho gae
phir yun hua ki ghair ko dil se laga liya
andar wo nafraten thin ki bahar ke ho gae
kya log the ki jaan se badh kar aziz the
ab dil se mahw nam bhi aksar ke ho gae
ai yaad yar tujh se karen kya shikayaten
ai dard-e-hijr hum bhi to patthar ke ho gae
samjha rahe the mujh ko sabhi nasehan-e-shahr
phir rafta rafta khud usi kafar ke ho gae
ab ke na intizar karen chaaragar ki hum
ab ke gae to ku-e-sitamgar ke ho gae
rote ho ek jazira-e-jaan ko 'faraaz' tum
dekho to kitne shahr samundar ke ho gae

hum to yun KHush the ki ek tar gareban mein hai

By

hum to yun khush the ki ek tar gareban mein hai
kya khabar thi ki bahaar is ke bhi arman mein hai
ek zarb aur bhi ai zindagi-e-tesha-ba-dast
sans lene ki sakat ab bhi meri jaan mein hai
main tujhe kho ke bhi zinda hun ye dekha tu ne
kis qadar hausla haare hue insan mein hai
fasle qurb ke shoalon ko hawa dete hain
mein tere shahr se dur aur tu mere dhyan mein hai
sar-e-diwar farozan hai abhi ek charagh
ai nasim-e-sahari kuchh tere imkan mein hai
dil dhadakne ki sada aati hai gahe-gahe
jaise ab bhi teri aawaz mere kan mein hai
khilqat-e-shahr ke har zulm ke ba-wasf 'faraaz'
hae wo hath ki apne hi gareban mein hai

apni hi aawaz ko be-shak kan mein rakhna

By

apni hi aawaz ko be-shak kan mein rakhna
lekin shahar ki khamoshi bhi dhyan mein rakhna
mere jhut ko kholo bhi aur tolo bhi tum
lekin apne sach ko bhi mizan mein rakhna
kal tarikh yaqinan khud ko dohraegi
aaj ke ek ek manzar ko pahchan mein rakhna
bazm mein yaron ki shamshir lahu mein tar hai
razm mein lekin talwar ko miyan mein rakhna
aaj to ai dil tark-e-talluq par tum khush ho
kal ke pachhtawe ko bhi imkan mein rakhna
us dariya se aage ek samundar bhi hai
aur wo be-sahil hai ye bhi dhyan mein rakhna
is mausam mein gul-danon ki rasm kahan hai
logo ab phulon ko aatish-dan mein rakhna

ye meri ghazlen ye meri nazMein

By

ye meri ghazlen ye meri nazmen
tamam teri hikayaten hain
ye tazkire tere lutf ke hain
ye sher teri shikayaten hain
main sab teri nazr kar raha hun
ye un zamanon ki saaten hain
jo zindagi ke nae safar mein
tujhe kisi waqt yaad aaen
to ek ek harf ji uthega
pahan ke anfas ki qabaen
udas tanhaiyon ke lamhon
mein nach utthengi ye apsaraen
mujhe tere dard ke alawa bhi
aur dukh the ye manta hun
hazar gham the jo zindagi ki
talash mein the ye jaanta hun
mujhe khabar thi ki tere aanchal mein
dard ki ret chhanta hun
magar har ek bar tujh ko chhu kar
ye ret rang-e-hina bani hai
ye zakhm gulzar ban gae hain
ye aah-e-sozan ghata bani hai
ye dard mauj-e-saba hua hai
ye aag dil ki sada bani hai
aur ab ye sari mata-e-hasti
ye phul ye zakhm sab tere hain
ye dukh ke nauhe ye sukh ke naghme
jo kal mere the wo ab tere hain
jo teri qurbat teri judai
mein kat gae roz-o-shab tere hain
wo tera shair tera mughanni
wo jis ki baaten ajib si thin
wo jis ke andaz khusrawana the
aur adaen gharib si thin
wo jis ke jine ki khwahishen bhi
khud us ke apne nasib si thin
na puchh is ka ki wo diwana
bahut dinon ka ujad chuka hai
wo kohkan to nahin tha lekin
kadi chatanon se lad chuka hai
wo thak chuka tha aur us ka tesha
usi ke sine mein gad chuka hai

mujassama

By

ai siyah-fam hasina tera uryan paikar
kitni pathrai hui aankhon mein ghaltida hai
jaane kis daur-e-alama-nak se le kar ab tak
tu kade waqt ke zindanon mein khwabida hai
tere sab rang hayule ke ye be-jaan nuqush
jaise marbut khayalat ke tane-bane
ye teri sanwli rangat ye pareshan khutut
barha jaise mitaya ho inhen duniya ne
resha-e-sang se khinchi hui zulfen jaise
raste sina-e-kohsar pe bal khate hain
abruon ki jhuki mehrabon mein jamid palken
jis tarah tir kamanon mein ulajh jate hain
munjamid honton pe sannaton ka sangin tilism
jaise nayab khazanon pe kade pahre hon
tund jazbaat se bharpur barahna sina
jaise sustane ko tufan zara thahre hon
jaise yunan ke maghrur khuda-wandon ne
regazaran-e-habsh ki kisi shahzadi ko
tishna ruhon ke hawasnak tayyush ke liye
hajla-e-sang mein paband bana rakkha ho

agar ye sab kuchh nahin

By

mile to hum aaj bhi hain lekin
na mere dil mein wo tishnagi thi
ki tujh se mil kar kabhi na bichhdun
na aaj tujh mein wo zindagi thi
ki jism-o-jaan mein ubaal aae
na khwab-zaron mein raushni thi
na meri aankhen charagh ki lau
na tujh mein hi khud-supurdagi thi
na baat karne ki koi khwahish
na chup hi mein khub-surati thi
mujassamon ki tarah the donon
na dosti thi na dushmani thi
mujhe to kuchh yun laga hai jaise
wo saaten bhi guzar gai hain
ki jin ko hum la-zawal samjhe
wo khwahishen bhi to mar gai hain
jo tere mere lahu ki hiddat
ko aakhirash barf kar gai hain
mohabbaten shauq ki chatanon
se ghatiyon mein utar gai hain
wo qurbaten wo judaiyan sab
ghubar ban kar bikhar gai hain
agar ye sab kuchh nahin to batla
wo chahaten ab kidhar gai hain