ab na bahal sakega dil ab na diye jalaiye

By

ab na bahal sakega dil ab na diye jalaiye
ishq o hawas hain sab fareb aap se kya chhupaiye
us ne kaha ki yaad hain rang tulu-e-ishq ke
main ne kaha ki chhodiye ab unhen bhul jaiye
kaise nafis the makan saf tha kitna aasman
main ne kaha ki wo saman aaj kahan se laiye
kuchh to suragh mil sake mausam-e-dard-e-hijr ka
sang-e-jamal-e-yar par naqsh koi banaiye
koi sharar nahin bacha pichhle baras ki rakh mein
ham-nafasan-e-shola-khu aag nai jalaiye

hamein sab ahl-e-hawas na-pasand rakhte hain

By

hamein sab ahl-e-hawas na-pasand rakhte hain
ki hum nawa-e-mohabbat buland rakhte hain
isi liye to khafa hain sitam-shiar ki hum
nigah-e-narm o dil-e-dardmand rakhte hain
agarche dil wahi rajat-pasand hai apna
magar zaban taraqqi-pasand rakhte hain
hum aise arsh-nashinon se wo darakht achchhe
jo aandhiyon mein bhi sar ko buland rakhte hain
chale ho dekhne 'mushtaq' jin ko pichhli raat
wo log sham se darwaza band rakhte hain

hum gire hain jo aa ke itni dur

By

hum gire hain jo aa ke itni dur
kis ne phenka ghuma ke itni dur
kaisi zalim thi qurb ki khwahish
kahan mara hai la ke itni dur
ab to us ka khayal bhi dil ne
rakh diya hai utha ke itni dur
ab to wo barg-e-arzu bhi hawa
le gai hai uda ke itni dur
lala-o-gul bhi ek tasalli hai
kaun aata hai ja ke itni dur

hath se napta hun dard ki gahrai ko

By

hath se napta hun dard ki gahrai ko
ye naya khel mila hai meri tanhai ko
tha jo sine mein charagh-e-dil-pur-khun na raha
chatiye baith ke ab sabr o shakebai ko
dil-e-afsurda kisi tarah bahalta hi nahin
kya karen aap ki is hausla-afzai ko
khair badnam to pahle bhi bahut the lekin
tujh se milna tha ki par lag gae ruswai ko
nigah-e-naz na milte hue ghabra hum se
hum mohabbat nahin kahne ke shanasai ko
dil hai nairangi-e-ayyam pe hairan ab tak
itni si baat bhi malum nahin bhai ko

duniya mein suragh-e-rah-e-duniya nahin milta

By

duniya mein suragh-e-rah-e-duniya nahin milta
dariya mein utar jaen to dariya nahin milta
baqi to mukammal hai tamanna ki imarat
ek guzre hue waqt ka shisha nahin milta
jate hue har chiz yahin chhod gaya tha
lauta hun to ek dhup ka tukda nahin milta
jo dil mein samae the wo ab shamil-e-dil hain
is aaine mein aks kisi ka nahin milta
tu ne hi to chaha tha ki milta rahun tujh se
teri yahi marzi hai to achchha nahin milta
dil mein to dhadakne ki sada bhi nahin 'mushtaq'
raste mein hai wo bhid ki rasta nahin milta

dukh ki chiKHen pyar ki sargoshiyan rah jaengi

By

dukh ki chikhen pyar ki sargoshiyan rah jaengi
hum chale jaenge aawazen yahan rah jaengi
aainon jaise badan dariya baha le jaega
ret mein pairahanon ki dhajjiyan rah jaengi
subh se pahle guzar jaega ye tufan bhi
aasman par ikka-dukka badliyan rah jaengi
ho bhi jae dil agar khali khayal-o-khwab se
phir bhi ek kone mein kuchh be-khwabiyan rah jaengi