mujhse muKHlis tha na waqif mere jazbaat se tha

By

mujh se mukhlis tha na waqif mere jazbaat se tha
us ka rishta to faqat apne mafadat se tha
ab jo bichhda hai to kya roen judai pe teri
yahi andesha hamein pahli mulaqat se tha
dil ke bujhne ka hawaon se gila kya karna
ye diya naza ke aalam mein to kal raat se tha
markaz-e-shahr mein rahne pe musir thi khilqat
aur main wabasta tere dil ke mazafat se tha
main kharabon ka makin aur talluq mera
tere nate kabhi khwabon ke mahallat se tha
lab-kushai pe khula us ke sukhan se iflas
kitna aarasta wo atlas-o-banat se tha

ye kya haalat bana rakkhi hai ye aasar kaise hain

By

ye kya haalat bana rakkhi hai ye aasar kaise hain
bahut achchha-bhala chhoda tha ab bimar kaise
wo mujh se puchhne aai hai kuchh likkha nahin mujh par
main us ko kaise samjhaun mere ashaar kaise hain
meri sochen hain kaisi kaun in sochon ka markaz hai
jo mere zehn mein palte hain wo afkar kaise hain
mere dil ka alawon aaj tak dekha nahin jis ne
wo kya jaane ki shoale surat-e-izhaar kaise hain
ye mantiq kaun samjhega ki yakh-kamre ki thandak mein
mere alfaz ke malbus shoala-bar kaise hain
zara si ek farmaish bhi puri kar nahin sakte
mohabbat karne wale log bhi lachaar kaise hain
judai kis tarah bartaw hum logon se karti hai
mizajan ham-sukhnawar be-dil-o-be-zar kaise hain

tere jaisa mera bhi haal tha na sukun tha na qarar tha

By

tere jaisa mera bhi haal tha na sukun tha na qarar tha
yahi umr thi mere ham-nashin ki kisi se mujh ko bhi pyar tha
main samajh raha hun teri kasak tera mera dard hai mushtarak
isi gham ka tu bhi asir hai isi dukh ka main bhi shikar tha
faqat ek dhun thi ki raat-din isi khwab-zar mein gum rahen
wo surur aisa surur tha wo khumar aisa khumar tha
kabhi lamha-bhar ki bhi guftugu meri us ke sath na ho saki
mujhe fursaten nahin mil sakin wo hawa ke rath par sawar tha
hum ajib tarz ke log the ki hamare aur hi rog the
main khizan mein us ka tha muntazir use intizar-e-bahaar tha
use padh ke tum na samajh sake ki meri kitab ke rup mein
koi qarz tha kai sal ka kai rat-jagon ka udhaar tha

mujhe aisa lutf ata kiya ki jo hijr tha na visal tha

By

mujhe aisa lutf ata kiya ki jo hijr tha na visal tha
mere mausamon ke mizaj-dan tujhe mera kitna khayal tha
kisi aur chehre ko dekh kar teri shakl zehn mein aa gai
tera nam le ke mila use mere hafize ka ye haal tha
kabhi mausamon ke sarab mein kabhi baam-o-dar ke azab mein
wahan umr hum ne guzar di jahan sans lena muhaal tha
kabhi tu ne ghaur nahin kiya ki ye log kaise ujad gae
koi 'mir' jaisa girafta-dil tere samne ki misal tha
tere baad koi nahin mila jo ye haal dekh ke puchhta
mujhe kis ki aag jala gai mere dil ko kis ka malal tha
kahin khun-e-dil se likha to tha tere sal-e-hijr ka saneha
wo adhuri diary kho gai wo na-jaane kaun sa sal tha

muhtaj ham-safar ki masafat na thi meri

By

muhtaj ham-safar ki masafat na thi meri
sab sath the kisi se rifaqat na thi meri
haq kis se mangta ki makinon ke sath sath
diwar-o-baam-o-dar ko zarurat na thi meri
sach bol ke bhi dekh liya un ke samne
lekin unhen pasand sadaqat na thi meri
main jin pe mar mita tha wo kaghaz ke phul the
rasmi mukalme the mohabbat na thi meri
jo dusron ke dukh the wahi mere dukh bhi the
kuchh aisi mukhtalif bhi hikayat na thi meri
bas kuchh usul the jo ba-har-haal the aziz
jaanam kisi se warna adawat na thi meri

kisi ne dil ke taq par jala ke rakh diya hamein

By

kisi ne dil ke taq par jala ke rakh diya hamein
magar hawa-e-hijr ne bujha ke rakh diya hamein
hazar hum ne zabt se liya tha kaam kya karen
kisi ke aansuon ne phir rula ke rakh diya hamein
hamari shohraten kharab is tarah bhi us ne kin
ki apne aashnaon se mila ke rakh diya hamein
hamein is anjuman mein jaane us ne kyun bula liya
bula liya aur ek taraf bitha ke rakh diya hamein
faqat hum ek dekhne ki chiz ban ke rah gae
kisi ne aisa ishq mein bana ke rakh diya hamein
hum 'eatibar' us ki har shikast mein sharik the
magar bisat se alag utha ke rakh diya hamein