bhul pae na tujhe aaj bhi rone wale

bhul pae na tujhe aaj bhi rone wale
tu kahan hai meri aankhon ko bhigone wale
hum kisi ghair ke ho jaen ye mumkin hi nahin
aur tum to kabhi apne nahin hone wale
sochte hain ki kahan ja ke talashen un ko
hum ko kuchh dost mile the kabhi khone wale
ret ke jaisa hai ab to ye muqaddar mera
khud bikhar jaenge ab mujh ko pirone wale
dard aur ashk zamane mein azal se hain wahi
sirf badle hain har ek daur mein rone wale
ped ko apna hi saya nahin milta logo
fasl apni kabhi pate nahin bone wale
dard ghairon ka bhala kaun uthata hai 'sahab'
sab yahan khud ki salibon ko hain dhone wale

hum bhi guzar gae yahan kuchh pal guzar ke

hum bhi guzar gae yahan kuchh pal guzar ke
raaten thin qarz ki yahan din the udhaar ke
jaise purana haar tha rishta tera mera
achchha kiya jo rakh diya tu ne utar ke
dil mein hazar dard hon aansu chhupa ke rakh
koi to karobar ho bin ishtihaar ke
kya jaane ab bhi dard ko kyun hai meri talash
tukde bhi ab kahan bache is ke shikar ke
shayad zaban pe qarz tha hum ne chuka diya
khamosh ho gae hain tujhe hum pukar ke
aise sulag utha teri yaadon se dil mera
jaise dhadhak uthen kahin jangal chinar ke

fan jo mear tak nahin pahuncha

fan jo mear tak nahin pahuncha
apne shahkar tak nahin pahuncha
pagdi pairon mein kaise main rakhta
hath dastar tak nahin pahuncha
koi inam koi bhi tamgha
sachche haqdar tak nahin pahuncha
aisa har shakhs hai masiha ab
jo kabhi dar tak nahin pahuncha
har khuda jannaton mein hai mahdud
koi sansar tak nahin pahuncha
chaara-gar sab ke pas jata tha
sirf bimar tak nahin pahuncha
dost ban kar dagha na de jo wo
apne kirdar tak nahin pahuncha
mujh ko alqab kyun milen logon
main to darbar tak nahin pahuncha
aisa jhagda bata do mujh ko jo
ghar mein diwar tak nahin pahuncha
kis ne becha nahin sukhan apna
kaun bazar tak nahin pahuncha

ashkon se kab miTe hain daman ke dagh yaro

ashkon se kab mite hain daman ke dagh yaro
aise nahin bujhenge gham ke charagh yaro
har aadmi ke qad se us ki qaba badi hai
suraj pahan ke nikle dhundle charagh yaro
un mein khayal-e-nau ke kaise ugenge paude
banjar hain mazhabon se jin ke dimagh yaro
roz-e-azal se insan hai khoj mein khuda ki
kis ko mila hai lekin us ka suragh yaro
aankhon mein ab na aansu dil mein bhi gham nahin hai
kab ke chhalak chuke hain sare ayagh yaro

fan jo mear tak nahin pahuncha

fan jo mear tak nahin pahuncha
apne shahkar tak nahin pahuncha
pagdi pairon mein kaise main rakhta
hath dastar tak nahin pahuncha
koi inam koi bhi tamgha
sachche haqdar tak nahin pahuncha
aisa har shakhs hai masiha ab
jo kabhi dar tak nahin pahuncha
har khuda jannaton mein hai mahdud
koi sansar tak nahin pahuncha
chaara-gar sab ke pas jata tha
sirf bimar tak nahin pahuncha
dost ban kar dagha na de jo wo
apne kirdar tak nahin pahuncha
mujh ko alqab kyun milen logon
main to darbar tak nahin pahuncha
aisa jhagda bata do mujh ko jo
ghar mein diwar tak nahin pahuncha
kis ne becha nahin sukhan apna
kaun bazar tak nahin pahuncha