sham aai hai liye hath mein yaadon ke charagh

sham aai hai liye hath mein yaadon ke charagh
wo tere sath guzare hue lamhon ke charagh
mere is ghar mein andhera kabhi hota hi nahin
hain mere sine mein jalte hue zakhmon ke charagh
lakh tufan hon kutiya meri raushan hi rahi
ek barsat se bujhne lage mahlon ke charagh
zindagi talkh haqiqat ki hai andhi si gali
apni aankhon mein jalate raho sapnon ke charagh
ek muddat se dhadhakta raha mera ye zehn
tab kahin ja ke farozan hue lafzon ke charagh
khud ka hi nur kiya karta hai raushan dil ko
raushni tujh ko bhala kaise den ghairon ke charagh
sari duniya ko khuda ek hi suraj de de
kash bujh jaen zamane se ye firqon ke charagh
ab to jamhur ki taqat ka hi suraj hai 'sahab'
ab zamane mein kahan jalte hain shahon ke charagh

jab bhi milte hain to jine ki dua dete hain

jab bhi milte hain to jine ki dua dete hain
jaane kis baat ki wo hum ko saza dete hain
hadse jaan to lete hain magar sach ye hai
hadse hi hamein jina bhi sikha dete hain
raat aai to tadapte hain charaghon ke liye
subh hote hi jise log bujha dete hain
hosh mein ho ke bhi saqi ka bharam rakhne ko
ladkhadane ki hum afwah uda dete hain
kyun na laute wo udasi ka musafir yaro
zakhm sine ke use rose sada dete hain

duniya ki numaish ye shiwalon ki tarah thi

duniya ki numaish ye shiwalon ki tarah thi
sachchai to shaitan ke khayalon ki tarah thi
jate hue bhi de gai ye dil pe kai zakhm
wo dosti jo panw ke chhaalon ki tarah thi
bikhre ye har-ik bar har-ik bar sanwarun
ummid na mahbub ke baalon ki tarah thi
aaya to tha insaf ka tu ban ke masiha
fitrat teri qatil ke dalalon ki tarah thi
us ko to bujha pai na zillat ki bhi barish
apni ye khudi jalti mashaalon ki tarah thi
baaten to bahut bazm mein amrit pe huin thin
tasir magar zahr ke pyalon ki tarah thi

bhul pae na tujhe aaj bhi rone wale

bhul pae na tujhe aaj bhi rone wale
tu kahan hai meri aankhon ko bhigone wale
hum kisi ghair ke ho jaen ye mumkin hi nahin
aur tum to kabhi apne nahin hone wale
sochte hain ki kahan ja ke talashen un ko
hum ko kuchh dost mile the kabhi khone wale
ret ke jaisa hai ab to ye muqaddar mera
khud bikhar jaenge ab mujh ko pirone wale
dard aur ashk zamane mein azal se hain wahi
sirf badle hain har ek daur mein rone wale
ped ko apna hi saya nahin milta logo
fasl apni kabhi pate nahin bone wale
dard ghairon ka bhala kaun uthata hai 'sahab'
sab yahan khud ki salibon ko hain dhone wale

hum bhi guzar gae yahan kuchh pal guzar ke

hum bhi guzar gae yahan kuchh pal guzar ke
raaten thin qarz ki yahan din the udhaar ke
jaise purana haar tha rishta tera mera
achchha kiya jo rakh diya tu ne utar ke
dil mein hazar dard hon aansu chhupa ke rakh
koi to karobar ho bin ishtihaar ke
kya jaane ab bhi dard ko kyun hai meri talash
tukde bhi ab kahan bache is ke shikar ke
shayad zaban pe qarz tha hum ne chuka diya
khamosh ho gae hain tujhe hum pukar ke
aise sulag utha teri yaadon se dil mera
jaise dhadhak uthen kahin jangal chinar ke

fan jo mear tak nahin pahuncha

fan jo mear tak nahin pahuncha
apne shahkar tak nahin pahuncha
pagdi pairon mein kaise main rakhta
hath dastar tak nahin pahuncha
koi inam koi bhi tamgha
sachche haqdar tak nahin pahuncha
aisa har shakhs hai masiha ab
jo kabhi dar tak nahin pahuncha
har khuda jannaton mein hai mahdud
koi sansar tak nahin pahuncha
chaara-gar sab ke pas jata tha
sirf bimar tak nahin pahuncha
dost ban kar dagha na de jo wo
apne kirdar tak nahin pahuncha
mujh ko alqab kyun milen logon
main to darbar tak nahin pahuncha
aisa jhagda bata do mujh ko jo
ghar mein diwar tak nahin pahuncha
kis ne becha nahin sukhan apna
kaun bazar tak nahin pahuncha