badan ki aanch se chehra nikhar gaya kaisa

By

badan ki aanch se chehra nikhar gaya kaisa
ye meri ruh mein shoala utar gaya kaisa
hazar aankhon se main us ka muntazir aur wo
mere qarib se ho kar guzar gaya kaisa
ye kis hawa ki ana todti rahi hum ko
hamare khwabon ki khirman bikhar gaya kaisa
dikha ke ek jhalak chand ho gaya ojhal
chadha na tha ki ye dariya utar gaya kaisa
kis aaftab se tarsil-e-nur jari hai
dhanak ka rang zamin par bikhar gaya kaisa
na apne qad ka na apne hajm ka hai ehsas
khala ka dasht subuk-bar kar gaya kaisa
kisi guman ke sahra mein kaisi khak udi
kisi yaqin ka partaw ubhar gaya kaisa
wo tira-chashm ki suraj se bad-guman raha
khud apne sae ki aahat se dar gaya kaisa

akeli ruh akela mera badan bhi hai

By

akeli ruh akela mera badan bhi hai
akele-pan ka ye sahra mera chaman bhi hai
kushud-e-zat ka munkir tha kab khabar thi mujhe
barahnagi hi meri mera pairahan bhi hai
khud apne qurb ki tanhaiyon mein guzra hai
wo ek lamha ki khalwat bhi anjuman bhi hai
kuchh itna sahl nahin mera fash ho jaana
mere badan pe to khwabon ka pairahan bhi hai
bana raha tha wo harf-o-sada ke gul-bute
use khabar na thi ek sochne ka fan bhi hai