gae zamane ki surat badan churae wo

gae zamane ki surat badan churae wo
nai ruton ki tarah se bhi muskurae wo
hazar meri nafi bhi kare wo mera hai
ki mere hone ka ehsas bhi dilae wo
har ek shakhs yahan apne dil ka malik hai
main lakh us ko bulaun magar na aae wo
hawa ki aahaten sunta hun dhadkanon ki tarah
misal-e-shama mujhe raat-bhar jagae wo
mere badan ko lahu-rang pairahan bhi de
meri qaba se mere zakhm bhi chhupae wo
meri ragon ka lahu bint-e-am se milta hai
main apna aap bhi dekhun to yaad aae wo
tamam raat guzari hai kirchiyan chunte
sahar hui to naya aaina dikhae wo
mera wajud kitabon mein harf harf hua
khuda kare meri aawaz ban ke aae wo
wo ek shoala-e-jawwala jo chhue jal jae
magar khud apne hi sae se khauf khae wo
ye kya ki mujh ko chhupaya hai meri nazron se
kabhi to mujh ko mere samne bhi lae wo
main apne aap se nikla to samne wo tha
aur ab ye soch raha hun kahin ko jae wo
palat chuka hun waraq zindagi ke ai 'akhtar'
harim-e-shab mein dabe panw phir bhi aae wo

wo jo diwar-e-ashnai thi

wo jo diwar-e-ashnai thi
apni hi zat ki ikai thi
main sar-e-dasht-e-jaan tha aawara
aur ghar mein bahaar aai thi
maile kapdon ka apna rang bhi tha
phir bhi qismat mein jag-hansai thi
ab to aankhon mein apna chehra hai
kabhi shishe se aashnai thi
apni hi zat mein tha main mahfuz
aur phir khud hi se ladai thi
apni aawaz se bhi darta tha
hae kya chiz aashnai thi
zindagi gard gard thi 'akhtar'
jaane lut kar kahan se aai thi

tha ek saya sa pichhe pichhe jo muD ke dekha to kuchh nahin tha

tha ek saya sa pichhe pichhe jo mud ke dekha to kuchh nahin tha
ab apni surat ko dekhta hun kabhi jo sad-paikar-afrin tha
wo phir bhi jaan se aziz-tar tha tabiaten go juda juda thin
agarche ham-zad bhi nahin tha wo mera ham-shakl bhi nahin tha
main ruk sakunga thahar sakunga thakan safar ki mita sakunga
kahin to koi shajar milega tamam raste yahi yaqin tha
kai chatanen gudaz jismon mein apni garmi se dhal gai thin
buton ke qisse mein tesha-karon ka tazkira bhi kahin kahin tha
na jaane kya dhund darmiyan thi ki kohkan ki nazar na pahunchi
jahan se phuta tha chashma-e-mah-shab ka patthar bhi to wahin tha
main apni aawaz ke taaqub mein mawara-e-nazar bhi pahuncha
magar palat kar na us ne puchha ki main khala ke bahut qarin tha
wahi manazir lute lute se wahi shikasta makan 'akhtar'
main roz-marra ke raste se jo ghar mein pahuncha bahut hazin tha

shayan-e-zindagi na the hum moatabar na the

shayan-e-zindagi na the hum mo'atabar na the
han kam-nazar the itne magar kam-nazar na the
ab ke baras jo phul khila kaghzi hi tha
ab ke to dur dur kahin barg-e-tar na the
har phul ek zakhm tha har shakh ek lash
goya ki rah mein thin saliben shajar na the
baadal uthe to ret ke zarre baras pade
hum ko bhigo gae hain wo daman jo tar na the
kahte the ek ju-e-rawan hai chaman chaman
dekha to bastiyon ke kinare bhi tar na the
takra ke sar ko apna lahu aap chatte
achchha hua ki dasht mein diwar-o-dar na the
dariya ka sina chir ke ubhre jo sath par
daman mein sang-reze the 'akhtar' guhar na the

qarya-e-jaan se guzar kar humne ye dekha bhi hai

qarya-e-jaan se guzar kar hum ne ye dekha bhi hai
jis jagah unchi chatanen hain wahan dariya bhi hai
dard ka chadhta samundar jism ka kachcha makan
aur un ke darmiyan aawaz ka sahra bhi hai
ruh ki gahrai mein pata hun peshani ke zakhm
sirf chaha hi nahin main ne use puja bhi hai
raat ki parchhaiyan bhi ghar ke andar band hain
sham ki dahliz par suraj ka naqsh-e-pa bhi hai
chand ki kirnen kharashen hain dar-o-diwar par
aur dar-o-diwar ke pahlu mein ek saya bhi hai
ghar ka darwaza muqaffal hai agar dekhe koi
andar ek kohram hai jaise koi rahta bhi hai
jab main 'akhtar' pattharon ko aaina dikhla chuka
main ne dekha aainon ke hath mein tesha bhi hai