rah pur-Khaar hai kya hona hai

rah pur-khar hai kya hona hai
panw afgar hai kya hona hai
kaam zindan ke kiye aur hamein
shauq-e-gulzar hai kya hona hai
jaan halkan hui jati hai
bar sa bar hai kya hona hai
par jaana hai nahin milti naw
zor par dhaar hai kya hona hai
raushni ki hamein aadat aur ghar
tira-o-tar hai kya hona hai
beach mein aag ka dariya hael
qasd us par hai kya hona hai
sath walon ne yahin chhod diya
be-kasi yar hai kya hona hai
aakhiri did hai aao mil len
ranj be-kar hai kya hona hai
dil hamein tum se lagana hi na tha
ab safar bar hai kya hona hai
kyun 'raza' kudhte ho hanste uttho
jab wo ghaffar hai kya hona hai

har but yahan TuTe hue patthar ki tarah hai

har but yahan tute hue patthar ki tarah hai
ye shahar to ujde hue mandar ki tarah hai
main tishna-e-didar ki jhonka hun hawa ka
wo jhil mein utre hue manzar ki tarah hai
kam-zarf zamane ki hiqarat ka gila kya
main khush hun mera pyar samundar ki tarah hai
is charkh ki taqdis kabhi raat ko dekho
ye qabr pe phaili hui chadar ki tarah hai
main sang-e-tah-e-ab ki surat hun jahan mein
aur waqt bhi soe hue sagar ki tarah hai
rote hain bagule mere daman se lipat kar
sahra bhi tabiat mein mere ghar ki tarah hai
ashaar mere dard ki khairaat hain 'akhtar'
ek shakhs ye kahta tha ki gham zar ki tarah hai

duniya bhi pesh aai bahut be-ruKHi ke sath

duniya bhi pesh aai bahut be-rukhi ke sath
hum ne bhi zakhm khae badi sadgi ke sath
ek musht-e-khak aag ka dariya lahu ki lahr
kya kya riwayaten hain yahan aadmi ke sath
apnon ki chahaton ne bhi kya kya diye fareb
rote rahe lipat ke har ek ajnabi ke sath
jangal ki dhup chhanw hi jangal ka husn hai
sayon ko bhi qubul karo raushni ke sath
tum raste ki gard na ho jao to kaho
do-chaar gam chal ke to dekho kisi ke sath
koi dhuan utha na koi raushni hui
jalti rahi hayat badi khamushi ke sath

chandni ke hath bhi jab ho gae shal raat ko

chandni ke hath bhi jab ho gae shal raat ko
apne sine par sambhaala main ne bojhal raat ko
raat bhar chhaya raha ghar ki faza par ek hiras
dastaken deta tha dar par koi pagal raat ko
chandni mein ghul gaya jab dil ki mayusi ka zahr
main ne khud kafna diya sayon mein komal raat ko
karb ke lawe ubalte the sukun ke aas-pas
uf wo ninden wo giran-khwabi ki daldal raat ko
aaj phir dhundla gai 'akhtar' meri sham-e-firaq
sochta hun aaj phir barsenge baadal raat ko

ashk jab dida-e-tar se nikla

ashk jab dida-e-tar se nikla
ek kanta sa jigar se nikla
phir na main raat gae tak lauta
dubti sham jo ghar se nikla
ek mayyat ki tarah lagta tha
chand jab qaid-e-sahar se nikla
mujh ko manzil bhi na pahchan saki
main ki jab gard-e-safar se nikla
hae duniya ne use ashk kaha
khun jo zakhm-e-nazar se nikla
ek amawas ka nasiba hun main
aaj ye chand kidhar se nikla
jab uda jaanib-e-manzil 'akhtar'
ek shoala mere par se nikla