yaad aao mujhe lillah na tum yaad karo

By

yaad aao mujhe lillah na tum yaad karo
apni aur meri jawani ko na barbaad karo
sharm rone bhi na de bekali sone bhi na de
is tarah to meri raaton ko na barbaad karo
had hai pine ki ki khud pir-e-mughan kahta hai
is buri tarah jawani ko na barbaad karo
yaad aate ho bahut dil se bhulane walo
tum hamein yaad karo tum hamein kyun yaad karo
aasman rutba mahal apne banane walo
dil ka ujda hua ghar bhi koi aabaad karo
hum kabhi aaen tere ghar magar aaenge zarur
tum ne ye wada kiya tha ki nahin yaad karo
chandni raat mein gul-gasht ko jab jate the
aah azra kabhi us waqt ko bhi yaad karo
main bhi shaista-e-altaf-e-sitam hun shayad
mere hote hue kyun ghair pe bedad karo
sadqe us shokh ke 'akhtar' ye likha hai jis ne
ishq mein apni jawani ko na barbaad karo

umr-bhar ki talKH bedari ka saman ho gain

By

umr-bhar ki talkh bedari ka saman ho gain
hae wo raaten ki jo khwab-e-pareshan ho gain
main fida us chand se chehre pe jis ke nur se
mere khwabon ki fazaen yusufistan ho gain
umr-bhar kam-bakht ko phir nind aa sakti nahin
jis ki aankhon par teri zulfen pareshan ho gain
dil ke pardon mein thin jo jo hasraten parda-nashin
aaj wo aankhon mein aansu ban ke uryan ho gain
kuchh tujhe bhi hai khabar o sone wale naz se
meri raaten lut gain ninden pareshan ho gain
hae wo mayusiyon mein meri ummidon ka rang
jo sitaron ki tarah uth uth ke pinhan ho gain
bas karo o meri rone wali aankhon bas karo
ab to apne zulm par wo bhi pasheman ho gain
aah wo din jo na aae phir guzar jaane ke baad
hae wo raaten ki jo khwab-e-pareshan ho gain
gulshan-e-dil mein kahan 'akhtar' wo rang-e-nau-bahaar
aarzuen chand kaliyan thin pareshan ho gain

sama kar dil mein nazron se nihan hai

By

sama kar dil mein nazron se nihan hai
mujhe yaad aane wale tu kahan hai
khudai kahkashan kahti hai jis ko
wo azra ka khiram-e-raegan hai
andhere baadalon se puchh zahid
meri khoi hui tauba kahan hai
ye kis ne pyar ki nazron se dekha
ki mere dil ki duniya phir jawan hai
jawani raegan jae to achchha
jawani ek khwab-e-raegan hai

na tumhaara husn jawan raha na hamara ishq jawan raha

By

na tumhaara husn jawan raha na hamara ishq jawan raha
na wo tum rahe na wo hum rahe jo raha to gham ka saman raha
na wo bagh hain na ghataen hain na wo phul hain na fazaen hain
na wo nikhaten na hawaen hain na wo be-khudi ka saman raha
na wo dil hai ab na jawaniyan na wo aashiqi ki kahaniyan
na wo gham na ashk-fishaniyan na wo dard-e-dil ka nishan raha
na chaman hai wo na bahaar hai na wo bulbulen na hazar hai
yahi chaar-samt pukar hai na wo rut hai ab na saman raha
na wo umr hai na masarraten na wo aish hai na wo ishraten
na wo aarzuen na hasraten na khushi ka nam-o-nishan raha
na nishan hai saqi-o-jam ka na wo baada-ha-e-chaman-ada
na mughanniya rahi mahw-e-saz na saz mast-e-fughan raha
ye bahaar-e-gulshan-e-ab-o-gil hai fana asar to hon kyun khajil
wo gul-e-fasurda hai mera dil ki hamesha nazr-e-khizan raha
nahin sabr saqiya la bhi de qadah-e-bahaar utha bhi de
abhi sin hai la ke pila bhi de ki hamesha kaun jawan raha
kahun kya ki ranj-rasida hun main ba-rang-e-abr ramida hun
nafas-e-shamim-e-parida hun ki raha tabah jahan raha
asar-e-bahaar-e-khizan asar hai ki hai fasurda meri nazar
na hawa-e-ishrat-e-baal-o-par na junun-e-bagh-e-jinan raha
main gul-e-ramida-e-rang-o-bu tu bahaar-e-mai-kada-e-numu
main hamesha khasta-e-arzu tu hamesha aish-e-jawan raha
na sukun-e-dil na qarar-e-jaan na qayam-e-sabr koi zaman
ye sarishk-e-gham ka hai karwan ki yunhi hamesha rawan raha
tu mata-e-gul-kada-e-nazar gul-e-nau-bahaar-e-bahisht-asar
main wo andalib-e-shikasta par ki hamesha mahw-e-fughan raha
na wo soz-o-saz-e-darun hai ab na wo chashm-e-gul-kada-e-gun hai ab
na wo sar hai ab na junun hai ab na wo zauq-e-shoala-chakan raha
hai falak ki badli hui nazar kahin kisi se 'akhtar'-e-nala-gar
ki main us ke jaur-e-alam-asar se hamesha mahw-e-fughan raha

na saz-o-mutrib na jam-o-saqi na wo bahaar-e-chaman hai baqi

By

na saz-o-mutrib na jam-o-saqi na wo bahaar-e-chaman hai baqi
nigah-e-sham-e-sahar ke parde ye naqsha-e-anjuman hai baqi
zamana guzra wo yasman-bu juda hui ham-kanar ho kar
magar abhi tak hamare pahlu mein nikhat-e-yasman hai baqi
bhula chuki dil se sham-e-ghurbat har ek naqsha har ek surat
hamari aankhon mein lekin ab tak farogh-e-subh-e-watan hai baqi
zamana badla miti jawani na wo mohabbat na zindagani
bas ek bholi si yaad hai jo ba-rang-e-dagh-e-kuhan hai baqi
mita diye be-sutun charkh-e-kuhan ne shirin-laqa hazaron
magar mohabbat ke lab par ab bhi tarana-e-kohkan hai baqi
habab-asa muhit-e-hasti mein jo hai mitne ko ban raha hai
hai inqalab ek numud aisi jo zer-e-charkh-e-kuhan hai baqi
gham-e-zamana ki sakhtiyon se hui hai pamal tab-e-'akhtar'
na wo nishat-e-kuhan hai baqi na wo mazaq-e-sukhan hai baqi

na chheD zahid-e-nadan sharab pine de

By

na chhed zahid-e-nadan sharab pine de
sharab pine de khana-kharab pine de
abhi se apni nasihat ka zahar de na mujhe
abhi to pine de aur be-hisab pine de
main jaanta hun chhalakta hua gunah hai ye
tu is gunah ko be-ehtisab pine de
phir aisa waqt kahan hum kahan sharab kahan
tilism-e-dahr hai naqsh-e-bar-ab pine de
mere dimagh ki duniya ka aaftab hai ye
mila ke barf mein ye aaftab pine de
kisi hasina ke boson ke qabil ab na rahe
to in labon se hamesha sharab pine de
samajh ke us ko ghafur-ur-rahim pita hun
na chhed zikr-e-azab-o-sawab pine de
jo ruh ho chuki ek bar dagh-dar meri
to aur hone de lekin sharab pine de
sharab-khane mein ye shor kyun machaya hai
khamosh 'akhtar'-e-khana-kharab pine de