KHwahish-e-jada-e-rahat se nikalta kaise

By

khwahish-e-jada-e-rahat se nikalta kaise
dil mera ku-e-malamat se nikalta kaise
saya-e-wahm-o-guman chaar taraf phaila hai
main abhi karb-o-aziyyat se nikalta kaise
meri ruswai agar sath na deti mera
yun sar-e-bazm main izzat se nikalta kaise
meri nazren jo na padtin to wahan pichhli shab
ek sitara sa teri chhat se nikalta kaise
main ki barbaad hua did ki khatir jis ki
wo mere dida-e-hairat se nikalta kaise
us ke dam hi se to qaem hai mera jah-o-jalal
wo mere dil ki hukumat se nikalta kaise
jag baitha hun to dil duba nahin hai 'akhtar'
soya rahta to musibat se nikalta kaise

uske nazdik gham-e-tark-e-wafa kuchh bhi nahin

By

us ke nazdik gham-e-tark-e-wafa kuchh bhi nahin
mutmain aisa hai wo jaise hua kuchh bhi nahin
ab to hathon se lakiren bhi miti jati hain
us ko kho kar to mere pas raha kuchh bhi nahin
chaar din rah gae mele mein magar ab ke bhi
us ne aane ke liye khat mein likha kuchh bhi nahin
kal bichhadna hai to phir ahd-e-wafa soch ke bandh
abhi aaghaz-e-mohabbat hai gaya kuchh bhi nahin
main to is waste chup hun ki tamasha na bane
tu samajhta hai mujhe tujh se gila kuchh bhi nahin
ai 'shumar' aankhen isi tarah bichhae rakhna
jaane kis waqt wo aa jae pata kuchh bhi nahin