KHak se KHwab talak ek si virani hai

By

khak se khwab talak ek si virani hai
mere andar mere bahar ki bayabani hai
koi manzar kahin maujud hai pas-manzar mein
warna kya chiz hai jo bais-e-hairani hai
kah ke dekhenge ba-har-taur magar pahle bhi
dil-e-khud-sar ne koi baat kahan mani hai
kise malum hai rukna ki guzar jaana hai
sham hai thahri hui bahta hua pani hai
dekh ye dil jo kabhi had se guzar jata tha
dekh dariya mein koi shor na tughyani hai

chaDhe hue hain jo dariya utar bhi jaenge

By

chadhe hue hain jo dariya utar bhi jaenge
mere baghair tere din guzar bhi jaenge
uda rahi hain hawaen parae sehnon mein
dhalegi raat to hum apne ghar bhi jaenge
jo ro rahi hai yahi aankh hans rahi hogi
tere dayar mein bar-e-digar bhi jaenge
talash khud ko kahin khak-o-ab mein kar len
tumhaare khoj mein phir dar-ba-dar bhi jaenge
hamesha ek si haalat pe kuchh nahin rahta
jo aae hain to kade din guzar bhi jaenge
ye phul phul kisi khushnuma ki tahriren
ye lafz manon se apne mukar bhi jaenge

agar har chiz mein usne asar rakkha hua hai

By

agar har chiz mein us ne asar rakkha hua hai
to phir ab tak mujhe kyun be-hunar rakkha hua hai
talluq zindagi se mukhtasar rakkha hua hai
ki shanon par nahin neze pe sar rakha hua hai
zamane se abhi tak puchhte hain us ki baaten
use hum ne abhi tak be-khabar rakkha hua hai
ab aisi be-samar saat mein us ki yaad kaisi
ye dukh achchhe dinon ki aas par rakkha hua hai
nikalna chahta hai wusat-e-sahra mein wahshi
bade jatanon se dil ko bandh kar rakkha hua hai
sada deta hai roz-o-shab koi aisa jazira
jahan mere bhi hisse ka samar rakkha hua hai
na jaane kaun si manzil pe bujh jaen meri aankhen
so main ne ek ek ham-safar rakkha hua hai

ab dil bhi dukhao to aziyyat nahin hoti

By

ab dil bhi dukhao to aziyyat nahin hoti
hairat hai kisi baat pe hairat nahin hoti
ab dard bhi ek had se guzarne nahin pata
ab hijr mein wo pahli si wahshat nahin hoti
hota hai to bas ek tere hijr ka shikwa
warna to hamein koi shikayat nahin hoti
kar deta hai be-sakhta banhon ko kushada
jab bach ke nikal jaane ki surat nahin hoti
dil khush jo nahin rahta to is ka bhi sabab hai
maujud koi wajh-e-masarrat nahin hoti
yun bar-sar-e-paikar hun main khud se musalsal
ab us se ulajhne ki bhi fursat nahin hoti
ab yun bhi nahin hai ki wo achchha nahin lagta
yun hai ki mulaqat ki surat nahin hoti
ye hijr-e-musalsal ka wazifa hai meri jaan
ek tark-e-sukunat hi to hijrat nahin hoti
do chaar baras jitne bhi hain jabr hi sah len
is umr mein ab hum se baghawat nahin hoti

aankhon mein KHwab taza hai dil mein naya KHayal bhi

By

aankhon mein khwab taza hai dil mein naya khayal bhi
aur jo mehrban rahe gardish-e-mah-o-sal bhi
milne ki ehtimam tak hum tere muntazir rahe
ab to nahin raha magar milne ka ehtimal bhi
waqt kahan ruka bhala par ye kise guman tha
umr ki zad mein aaega tujh sa pari-jamal bhi
us ne diye the phul jo ab use kya dikhaiye
rakhta nahin hai jabki dil khwahish-e-indimal bhi
khwab-e-jamal taza-tar aaya tha chor ki tarah
khurach ke dil se le gaya aap ke khad-o-khal bhi
lao to main hi tank dun tare ko aasman par
mere hi hath se agar hona hai ye kamal bhi

aankh khulne pe bhi hota hun usi KHwab mein gum

By

aankh khulne pe bhi hota hun usi khwab mein gum
der tak rahta hun ek lazzat-e-nayab mein gum
soch hi soch mein tufan utha deta hun
aur ho jata hun ek mauja-e-girdab mein gum
ek sitara jo chamakta hai lab-e-baam kahin
dekhte dekhte ho jata hai mahtab mein gum
bach rahe sans to jaana hai unhin galiyon mein
aur hona hai usi halqa-e-ahbab mein gum
aise nashshe se siwa aur nasha kya hota
aap ka khwab jo ho jata mere khwab mein gum
sajda-e-shauq ke mathon se nishan mitne lage
ho gai rasm-e-azan gumbad-o-mehrab mein gum
gum to hona tha ba-har-haal kisi manzar mein
dil hua khwab mein gum aankh hui aab mein gum