zaKHm dekhe na mere zaKHm ki shiddat dekhe

By

zakhm dekhe na mere zakhm ki shiddat dekhe
dekhne wala meri aankhon ki hairat dekhe
mujh pe aasan hai kahe lafz ka ifa karna
us ko mushkil hai to wo apni suhulat dekhe
dil liye jata hai phir ku-e-malamat ki taraf
aankh ko chahiye phir khwab-e-hazimat dekhe
koi surat ho ki inkar se pahle aa kar
kis qadar us ki yahan par hai zarurat dekhe
dil tazabzub mein hi rahta hai ba-waqt-e-paiman
lafz dekhe ki rukh-e-yar ki rangat dekhe
aankh bhar jati hai is kasrat-e-nazzara se
dil to har shakl mein bas ek shabahat dekhe

yun hi rakkhoge imtihan mein kya

By

yun hi rakkhoge imtihan mein kya
nahin aaegi jaan jaan mein kya
kyun sada ka nahin jawab aata
koi rahta nahin makan mein kya
ek zamana hai ru-ba-ru mere
tum na aaoge darmiyan mein kya
wo jo qisse dilon ke andar hain
wo bhi laoge darmiyan mein kya
kis qadar talkhiyan hain lahje mein
zahr bote ho tum zaban mein kya
dil ko shikwa nahin koi tum se
hum ne rahna nahin jahan mein kya
wo jo ek lafz e'tibar ka tha
ab nahin hai wo darmiyan mein kya
mere khwabon ke jo parinde the
hain abhi tak teri aman mein kya
ab to ye bhi nahin khayal aata
chhod aae the is jahan mein kya
ye bakheda jo zindagi ka hai
chhod dun us ko darmiyan mein kya
chand wade the chand dawe the
aur rakha tha dastan mein kya
jaane wo dil tha ya diya koi
raat jalta tha shama-dan mein kya

sitara aankh mein dil mein gulab kya rakhna

By

sitara aankh mein dil mein gulab kya rakhna
ki dhalti umr mein rang-e-shabab kya rakhna
jo regzar-e-badan mein ghubar udta ho
to chashm-e-khak-e-rasida mein khwab kya rakhna
safar nasib hi thahra jo dasht-e-ghurbat ka
to phir guman mein fareb-e-sahab kya rakhna
jo dub jaana hai ek din jazira-e-dil bhi
to koi naqsh sar-e-sath-e-ab kya rakhna
ulat hi dena hai aakhir piyala-e-jaan bhi
hawa ke dosh pe tasht-e-habab kya rakhna
bas itna yaad hai ek bhul si hui thi kahin
ab is se badh ke dukhon ka hisab kya rakhna

nikal raha hun yaqin ki had se guman ki jaanib

By

nikal raha hun yaqin ki had se guman ki jaanib
safar hai mera zamin se aasman ki jaanib
munder par koi chashm-e-tar thi ki aaina tha
sitara-e-sham dekhta tha makan ki jaanib
ye khwab hai ya tilism koi ki khushk patte
khinche chale ja rahe hain aab-e-rawan ki jaanib
koi to upar se bojh dala gaya hai warna
jhuka hua aasman hai kyun khak-dan ki jaanib
to phir mere sath us ka chalna muhaal thahra
dhyan rahta tha us ka sud-o-ziyan ki jaanib
sukunat-e-qalb khali sine pe aise utri
aman khudi chal ke aa gai be-aman ki jaanib

manzil-e-KHwab hai aur mahw-e-safar pani hai

By

manzil-e-khwab hai aur mahw-e-safar pani hai
aankh kya kholin ki ta-hadd-e-nazar pani hai
aaina hai to koi aks kahan hai is mein
kyun baha kar nahin le jata agar pani hai
ek khwahish ki jo sahra-e-badan se nikli
khinchti hai usi jaanib ko jidhar pani hai
panw uthte hain kisi mauj ki jaanib lekin
rok leta hai kinara ki thahar pani hai
ab bhi baadal to barasta hai par us par kahin
kisht-e-be-ab idhar aur idhar pani hai
khinchta hai koi sayyara tere pyason ko
us ilaqe mein jahan khak-basar pani hai
chashm-e-nam aur dil labrez bahut hain mujh ko
khitta-e-khak hai aur zad-e-safar pani hai

koi hunar to meri chashm-e-ashk-bar mein hai

By

koi hunar to meri chashm-e-ashk-bar mein hai
ki aaj bhi wo kisi khwab ke khumar mein hai
kisi bahaar ka manzar hai chashm-e-viran mein
kisi gulab ki khushbu dil-e-figar mein hai
ajab taqaza hai mujh se juda na hone ka
ki jaise kaun-o-makan mere ikhtiyar mein hai
nishan-e-rah bhi thahrega barishon ke baad
abhi ye naqsh kisi rah ke ghubar mein hai
ufuq ke aks kisi aaine mein kya simtin
ki shauq-e-jalwa abhi apne intishaar mein hai
makan ki koi khabar la-makan ko kaise ho
safir-e-ruh abhi jism ke hisar mein hai
kamal-e-zabt ki saat kahin guzar bhi ja
sitara-e-shab-e-gham mere intizar mein hai