yaad karte ho mujhe suraj nikal jaane ke baad

By

yaad karte ho mujhe suraj nikal jaane ke baad
ek sitare ne ye puchha raat dhal jaane ke baad
main zamin par hun to phir kyun dekhta hun aasman
ye khayal aaya mujhe aksar phisal jaane ke baad
doston ke sath chalne mein bhi khatre hain hazar
bhul jata hun hamesha main sambhal jaane ke baad
ab zara sa fasla rakh kar jalata hun charagh
tajraba ye hath aaya hath jal jaane ke baad
wahshat-e-dil ko hai sahra se badi nisbat ajib
koi ghar lauta nahin ghar se nikal jaane ke baad

hum ko lutf aata hai ab fareb khane mein

By

hum ko lutf aata hai ab fareb khane mein
aazmaen logon ko khub aazmane mein
do-ghadi ke sathi ko ham-safar samajhte hain
kis qadar purane hain hum nae zamane mein
tere pas aane mein aadhi umr guzri hai
aadhi umr guzregi tujh se ub jaane mein
ehtiyat rakhne ki koi had bhi hoti hai
bhed hamin ne khole hain bhed ko chhupane mein
zindagi tamasha hai aur is tamashe mein
khel hum bigadenge khel ko banane mein

hamesha dil mein rahta hai kabhi goya nahin jata

By

hamesha dil mein rahta hai kabhi goya nahin jata
jise paya nahin jata use khoya nahin jata
kuchh aise zakhm hain jin ko sabhi shadab lagte hain
kuchh aise dagh hain jin ko kabhi dhoya nahin jata
ajab si gunj uthti dar-o-diwar se har-dam
ye khwabon ka kharaba hai yahan soya nahin jata
bahut hansne ki aadat ka yahi anjam hota hai
ki hum rona bhi chahen to kabhi roya nahin jata

kyun aankhen band kar ke raste mein chal raha hun

By

kyun aankhen band kar ke raste mein chal raha hun
kya main bhi rafta rafta patthar mein dhal raha hun
chaaron taraf hain shole ham-sae jal rahe hain
main ghar mein baitha baitha bas hath mal raha hun
mere dhuen se meri har sans ghut rahi hai
main rah ka diya hun aur ghar mein jal raha hun
aankhon pe chha gaya hai koi tilism shayad
palken jhapak raha hun manzar badal raha hun
tabdiliyon ka nashsha mujh par chadha hua hai
kapde badal raha hun chehra badal raha hun
is faisle se khush hain afrad ghar ke sare
apni khushi se kab main ghar se nikal raha hun
in pattharon pe chalna aa jaega mujhe bhi
thokar to kha raha hun lekin sambhal raha hun
kanton pe jab chalunga raftar tez hogi
phulon bhari rawish par bach bach ke chal raha hun
chashme ki tarah 'alam' ashaar phutte hain
koh-e-giran ki surat mein bhi ubal raha hun

jal bujha hun main magar sara jahan tak mein hai

By

jal bujha hun main magar sara jahan tak mein hai
koi tasir to maujud meri khak mein hai
khenchti rahti hai har lamha mujhe apni taraf
jaane kya chiz hai jo parda-e-aflak mein hai
koi surat bhi nahin milti kisi surat mein
kuza-gar kaisa karishma tere is chaak mein hai
kaise thahrun ki kisi shahr se milta hi nahin
ek naqsha jo mere dida-e-namnak mein hai
ye ilaqa bhi magar dil hi ke tabe thahra
hum samajhte the aman gosha-e-idrak mein hai
qatl hote hain yahan nara-e-elan ke sath
waza-dari to abhi aalam-e-saffak mein hai
kitni chizon ke bhala nam tujhe ginwaun
sari duniya hi to shamil meri imlak mein hai
raegan koi bhi shai hoti nahin hai 'alam'
ghaur se dekhiye kya kya khas-o-khashak mein hai

jama hua hai falak pe kitna ghubar mera

By

jama hua hai falak pe kitna ghubar mera
jo mujh pe hota nahin hai raaz aashkar mera
tamam duniya simat na jae meri hadon mein
ki had se badhne laga hai ab intishaar mera
dhuan sa uthta hai kis jagah se main jaanta hun
jalata rahta hai mujh ko har pal sharar mera
badal rahe hain sabhi sitare madar apna
mere junun pe tika hai dar-o-madar mera
kisi ke raste pe kaise nazren jamae rakkhun
abhi to karna mujhe hai khud intizar mera
teri itaat qubul kar lun bhala main kaise
ki mujh pe chalta nahin hai khud ikhtiyar mera
bas ek pal mein kisi samundar mein ja girunga
abhi sitaron mein ho raha hai shumar mera