zawal mein bhi raha dil-nashin nazara mera

By

zawal mein bhi raha dil-nashin nazara mera
mere hi sath gira tut ke sitara mera
kisi pe ramz meri baat ki khuli hi nahin
na kaam aaya mere koi istiara mera
yaqin kisi ko na aaya main dub sakta hun
samajh rahe the agarche sabhi ishaara mera
nadi ki tarah kinara bhi katta hun main
kisi hisar mein hota nahin guzara mera
ye baat jaan ke hairat nahin hui mujh ko
ki meri aag se raushan raha sitara mera
na rok pai mujhe maujon ki koi sazish
rawan-dawan hai abhi jhil mein shikara mera
abhi se samt badalne laga main kyun 'alam'
abhi to dur bahut dur hai kinara mera

waqt se pahle daraKHton pe samar aane lage

By

waqt se pahle darakhton pe samar aane lage
raat aai bhi nahin khwab-e-sahar aane lage
main ne pahla hi qadam rakkha hai dariya mein abhi
khair-maqdam ke liye kitne bhanwar aane lage
kya khata ho gai sarzad main isi soch mein hun
sang ke badle meri samt guhar aane lage
is liye zill-e-ilahi se khafa hain raaten
un ke aiwan mein kyun khak-basar aane lage
aap kuchh aur hain aashiq ise kahte hain miyan
jis ko har chiz mein mahbub nazar aane lage
khair mangen kisi dushman ke liye ab 'alam'
ain mumkin hai duaon mein asar aane lage

kuchh chamakta sa tah-e-ab nazar to aae

By

kuchh chamakta sa tah-e-ab nazar to aae
dubne ke liye girdab nazar to aae
koi tabir ki surat bhi nikal aaegi
nind to aae kabhi khwab nazar to aae
band kamre ki faza kis ko bhali lagti hai
mere atraf mein mahtab nazar to aae
do ghadi thahrun kahin main bhi zara dam le lun
rah mein khitta-e-shadab nazar to aae
main shikasta hun idhar tu bhi shikasta hai udhar
jang mein koi zafar-yab nazar to aae
mushkilen gher ke baithi hain mera ghar 'alam'
ab zara halqa-e-ahbab nazar to aae

koi mausam na kabhi kar saka shadab hamein

By

koi mausam na kabhi kar saka shadab hamein
shahr mein jine ke aae nahin aadab hamein
bahte dariya mein koi aks thaharta hi nahin
yaad aata hai bahut ganw ka talab hamein
is tarah pyas bujhai hai kahan dariya ne
ek qatre ne kiya jis tarah sairab hamein
jhilmili raushni har-samt nazar aati hai
khinchti hai koi qindil tah-e-ab hamein
kya pata kaun se janmon ka hai rishta apna
dhund hi lete hain har bahr mein girdab hamein
din ulat deta hai har khwab ki tabir magar
raat dikhlati hai phir koi naya khwab hamein
be-aman hum jo hue hain to hamein yaad aaya
rose dete the sada mimbar-o-mehrab hamein
kash malum ye pahle hamein hota 'alam'
dekhna chahta tha wo bhi zafar-yab hamein

koi bhi shai kahan nayab hai hamare liye

By

koi bhi shai kahan nayab hai hamare liye
khula hua to dar-e-khwab hai hamare liye
hamein hi raushni us ki nazar nahin aati
charagh to pas-e-mehrab hai hamare liye
palak jhapakte hi sab kuchh naya sa lagta hai
ye zindagi bhi koi khwab hai hamare liye
utarte jate hain pahnaiyon mein dariya ki
ki jalti shama tah-e-ab hai hamare liye
hamin ne band kiye hain tamam darwaze
ye shahr aaj bhi betab hai hamare liye
bas ek mauj ne ye haal kar diya apna
har ek mauj hi girdab hai hamare liye
har ek shakhs ke dawe alag alag 'alam'
agarche baam pe mahtab hai hamare liye

khaDe hain der se ahbab dekhne ke liye

By

khade hain der se ahbab dekhne ke liye
mera safina tah-e-ab dekhne ke liye
khuli jo aankh to hum dubte nazar aae
gae the dur se girdab dekhne ke liye
abas pareshan hain tabir ki tag-o-dau mein
mili hai nind hamein khwab dekhne ke liye
taras rahi hai mere dasht ki faza kab se
kisi darakht ko shadab dekhne ke liye
udan bharne lage hain tayur-o-tayyare
qarib-o-dur se sailab dekhne ke liye
suna hai main ne hawaen bhi be-qarar hain ab
mere diye ko zafar-yab dekhne ke liye
nazar jhukae khadi hain aqidaten 'alam'
shikast-e-gumbad-o-mehrab dekhne ke liye