uThenge maut se pahle

By

uthenge maut se pahle usi safar ke liye
jise hayat ke sadmon ne multawi na kiya
wo hum ki phul ki lau ko fareb dete the
qarib-e-sham sitaron ki rahguzar pe chale
wo hum ki taza jahan ke naqib-e-zan the nae
saba ki chaal se aage hamari chaal rahi
magar guman ke qadmon ne us ko tai na kiya
wahi safar jo hamare aur us ke bich raha
jise hayat ke sadmon ne multawi na kiya
utha ke hath mein neze pila ke aab-e-sarab
kamin-gah-e-hawas se nishane dil ke liye
tamam samt se aai shahabiyon ki sipah
hamari zat ko ghera misal-e-lashkar-e-sham
hazar bar ulajh ke phata libas-e-yaqin
magar tali na kabhi us mubahise se zaban
jo sakinan-e-zamin aur hamare bich hua
rah-e-waqar pe baithe the aaine le kar
jinhen sabaat pe koi bhi ikhtiyar na tha
thama ke hath mein gham ke buraq-e-dil ki inan
nikal gae na ruke ruh ki hadon se idhar
falak ke kohna dariche salam karte rahe
magar charagh ka saya abhi wajud mein hai
zarur apne hisaron mein lega nur-e-dimagh
sahar ke waqt badhega ghunudgi ka asar
daraaz hoga wahin dard ke shabab ka qad
mila ghubar ki surat jahan nasib ka phal
jahan shikar hua hai meri zaban ka hunar
wahin se dhund ke laenge aadmi ki khabar
uthenge maut se pahle usi safar ke liye

surma ho ya tara

By

dard ki lazzat se na-waqif khushbu se manus na tha
mere ghar ki mitti se wo shakhs bahut begana tha
tare chunte chunte jis ne phul nazar-andaz kiye
khwab kise malum nahin hain lams kise mahbub nahin
lekin jo tabir na jaane us ko ungh bhi lena aib
raat ki qimat hijr mein samjhi jis ne aansu nur bane
zakhm se uthne wali tisen os ki thandak piti hain
aaj na puchho dukhne lagi hai surme se kyun us ki aankh
jis ko sunahre din ka suraj kirnen bantne aata tha
patthar aakhir patthar hoga surma ho ya tara ho

safir-e-laila-4

By

harim-e-mahmil mein aa gaya hun salam le lo
salam le lo ki main tumhaara amin-e-qasid khajil musafir aza ki wadi se laut aaya
main laut aaya magar sarasima is tarah se
ki pichhle qadmon palat ke dekha na guzre raston ke faslon ko
jahan pe mere nishan-e-pa ab thake thake se gire pade the
harim-e-mahmil mein wo safir-e-nawed-parwar
jise zamane ke past o baala ne itne qisse padha diye the
jo pahle qarnon ki tirgi ko ujal dete
tumhein khabar hai
ye mera sina qadim ahram mein akela wo ek haram tha
azim raazon ke kohna tabut jis ki kadiyon mein bas rahe the
unhin hawaon ka dar nahin tha
na sahra-zadon ke nasli ka hi un ki gird-e-khabar ko pahunche
harim-e-mahmil mein wo amanat ka pasban hun
jo charm-e-ahu ke narm kaghaz pe likkhe name ko le ke nikla
wahi ki jis ke sawar hone ko tum ne bakhsha jahaz-e-sahra
tawil rahon mein khali mashkon ka bar le kar hazar sadiyan safar mein gardan
kahin sarabon ki bahti chandi kahin chatanon ki sakht qashen
mayan-e-rah-e-safar khade the jakadne wale nazar ke lobhi
magar na bhatka bhatakne wala
jo dam liya to aza mein ja kar
harim-e-mahmil suno fasane jo sun sako to
main chalte chalte safar ke aakhir pe aisi wadi mein ja ke thahra
aur us pe guzre haris lamhon ke un nishanon ko dekh aaya
jahan ke naqshe bigad gae hain
jahan ke tabqe ulat gae hain
wahan ki faslen zaqqum ki hain
hawaen kali hain rakh ud kar khandar mein aise phunkarti hai
ki jaise azhdar chahaar jaanib se jabde khole ghadar machate
zamin pe kina nikalte hon
kasif zahron ki thailiyon ko ghazab se bahar uchhaalte hon
muhib sae mein dewtaon ka raqs jari tha
tute hathon ki haddiyon se wo dohl-e-baatil ko pitte the
zaif kawwon ne ahl-e-qarya ki qabren khodin
tu un ke nakhun nahif panjon se jhad ke aise bikhar rahe the
chakondaron ne chaba ke phenke hon jaise haddi ke khushk reze
harim-e-mahmil wahi wo manzil thi jis ke sine pe main tumhaari nazar se pahuncha uthae mehr o wafa ke name
wahin pe baitha tha sar-ba-zanu tumhaara mahram
khandar ke bosida pattharon par hazin o ghamgin
wahin pe baitha tha
qatl-namon ke mahzaron ko wo padh raha tha
jo pastiyon ke kotah hathon ne us ki qismat mein likh diye the
harim-e-mahmil main apne naqa se niche utra to main ne dekha ki us ki aankhen khamosh o viran
ghubar-e-sahra mizha pe larzan tha ret didon mein ud rahi thi
magar sharafat ki ek lau thi ki us ke chehre pe narm haala kiye hue thi
wo mere lahje ko jaanta tha
hazar manzil ki duriyon ke satae qasid ke ukhde qadmon ki chap sunte hi uth khada tha
dayar-e-wahshat mein bas raha tha
pe teri sanson ke zer-o-bam se uthi hararat se aashna tha
wo kah raha tha yahan se jao ki yan kharabon ke kar-khane hain
roz o shab ke jo silsile hain khule khasaron ki mandiyan hain
wo dar raha tha tumhaara qasid kahin khasaron mein bat na jae
harim-e-mahmil main kya bataun wahin pe khoya tha mera naqa
faqat kharabe ke chand lamhe hi us ke gude ko kha gae the
usi maqam-e-tilism-gar mein wo ustakhwanon mein dhal gaya tha
jahan pe bikhra pada tha pahle tumhaare mahram ka asp-e-tazi
aur ab wo naqa ke ustukhwan bhi
tumhaare mahram ke asp-e-tazi ke ustakhwanon mein mil gae hain
harim-e-mahmil wahi wo patthar the jin pe rakkhe the main ne mehr o wafa ke name
jahan pe zinda ruton mein bandhe the tum ne paiman o ahd apne
magar wo patthar ki ab ajaib ki kargah hain
tumhaare name ki us ibarat ko kha gae hain
shifa ke hathon se jis ko tum ne raqam kiya tha
so ab na naqa na koi nama na le ke aaya jawab-e-nama
main na-murad o khajil musafir
magar tumhaara amin qasid aza ki wadi se laut aaya
aur us najib o karim mahram-e-wafa ke paikar ko dekh aaya
jo aane wale dinon ki ghadiyan abad ki sanson se gin raha hai

safir-e-laila-3

By

safir-e-laila ye kya hua hai
shabon ke chehre bigad gae hain
dilon ke dhage ukhad gae hain
shafiq aansu nahin bache hain ghamon ke lahje badal gae hain
tumhi batao ki is khandar mein jahan pe makdi ki sanaten hon
jahan samundar hon tirgi ke
siyah-jalon ke baadban hon
jahan payambar khamosh lete hon baaten karti hon murda ruhen
safir-e-laila tumhi batao jahan akela ho dastan-go
wo dastan-go jise kahani ke sab zamanon pe dastaras ho
shab-e-rifaqat mein tul-e-qissa charagh jalne talak sunae
jise zaban-e-hunar ka sauda ho zindagi ko sawal samjhe
wahi akela ho aur khamoshi hazar sadiyon ki sans roke
wo chup lagi ho ki maut baam-e-falak pe baithi zamin ke sae se kanpti ho
safir-e-laila tumhi batao wo aise dozakh se kaise nipte
dayar-e-laila se aae name ki nau ibarat ko kaise padh le
purane lafzon ke istiaron mein gum mohabbat ko kyunke samjhe
safir-e-laila abhi malamat ka waqt aaega dekh lena
agar musir ho to aao dekho
yahan pe baitho ye name rakh do
yahin pe rakh do inhi silon par
ki is jagah par hamari qurbat ke din mile the
wo din yahin par juda hue the inhi silon par
aur ab zara tum nazar uthao mujhe batao tumhaara naqa kahan gaya hai
buland takhnon se zard reti pe chalne wala sabih naqa
wo surkh naqa sawar ho kar tum aae jis par buri sara mein
wahi ki jis ki mahaar bandhi thi tum ne bosida ustukhwan se
wo asp-e-tazi ke ustukhwan the
mujhe batao safir-e-laila kidhar gaya wo
udhar to dekho wo haddiyon ka hujum dekho
wahi tumhaara aziz sathi safar ka monis
pa ab nahin hai
aur ab uthao silon se name
padho ibarat jo padh sako to
kya dar gae ho ki sath-e-kaghaz pe juz siyahi ke kuchh nahin hai
khajil ho is par ki kyun ibarat ghubar ho kar nazar se bhagi
safir-e-laila ye sab karishme isi khandar ne meri jabin par likhe hue hain
yahi ajaib hain jin ke sadqe yahan parinde na dekh paoge
aur sadiyon talak na utregi yan sawari
na chob-e-khema gadegi yan par
safir-e-laila ye mere din hain
safir-e-laila ye meri raaten
aur ab batao ki is aziyyat mein kis mohabbat ke khwab dekhun
main kin khudaon se nur mangun
magar ye sab kuchh purane qisse parai basti ke murda qaziye
tumhein fasanon se kya lagao
tumhein to matlab hai apne naqa se aur name ki us ibarat se
sath-e-kaghaz se jo udi hai
safir-e-laila tumhaara naqa
main us ke marne par gham-zada hun
tumhaare ranj o alam se waqif bade khasaron ko dekhta hun
so aao us ki talafi kar dun ye mere shane hain baith jao
tumhein kharabe ki kargah se nikal aaun
dayar-e-laila ko jaane wali habib rahon pe chhod aaun

safir-e-laila-2

By

nazar uthao safir-e-laila bure tamashon ka shahr dekho
ye mera qarya ye wahshaton ka amin qarya
tumhein dikhaun
ye sehan-e-masjid tha yan pe aayat-farosh baithe duaen khilqat ko bechte the
yahan adalat thi aur qazi aman dete the rahzanon ko
aur is jagah par wo khan-qahen thin aab o aatish ki mandiyan thin
jahan pe amrad-parast baithe safa-e-dil ki namazen padh kar
khayal-e-duniya se jaan hatate
safir-e-laila main kya bataun ki ab to sadiyan guzar chuki hain
magar suno ai gharib-e-saya ki tum sharifon ke raaz-dan ho
yahi wo din the main bhul jaun to mujh pe lanat
yahi wo din the safir-e-laila hamari basti mein chhe taraf se fareb utre
daron se aage gharon ke bichon phir us se chulhon ki handiyon mein
jawan-o-pir-o-zanan-e-qarya khushi se raqsan
tamam raqsan
hujum-e-tiflan tha ya tamashe the boznon ke
ki koi diwar-o-dar na chhoda
wo un pe chadh kar sharif chehron ki gardanon ko phalangte the
daraaz-qamat lahim baune
raza-e-baham se kolhuon mein jute hue the
khraste the wo zard ghalla to us ke pisne se khun bahta tha pattharon se
magar na aankhen ki dekh pain na un ki naken ki sunghte wo
faqat wo bailon ki chakkiyan thin saron se khali
fareb khate the khun pite the aur ninden thin bajjuon ki
safir-e-laila ye dastan hai isi khandar ki
isi khandar ke tamash-binon fareb-khurdon ki dastan hai
magar suno ajnabi shanasa
kabhi na kahna ki main ne qarnon ke faslon ko nahin sameta
fasil-e-qarya ke sar pe phenki gai kamanden nahin utarin
tumhein dikhaun tabah basti ke ek jaanib buland tila
buland tile pe baithe baithe hawannaqon-sa
kabhi to rota tha apni aankhon pe hath rakh kar kabhi musalsal main unghta tha
main unghta tha ki sans le lun
magar wo chulhon pe handiyon mein fareb pakte
siyah sanpon ki aisi kaya-kalap hui thi ki meri aankhon pe jam gae the
so yan pe baitha main aane wale dhuen ki talkhi bata raha tha
khabar ke aansu baha raha tha
magar main tanha safir-e-laila
faqat khayalon ki baadshahi meri wirasat
tamam qarye ka ek shair tamam qarye ka ek lain tha
yahi sabab hai safir-e-laila main yan se nikla to kaise ghutnon ke bal utha tha
nasib-e-hijrat ko dekhta tha
safar ki sakhti ko jaanta tha
ye sabz qariyon se sadiyon pichhe ki manzilon ka safar tha mujh ko
jo gard-e-sahra mein lipte kharon ki tez nokon pe jald karna tha aur
wo aisa safar nahin tha jahan pe sae ka rizq hota
jahan hawaon ka lams milta
farishte aawaz-e-al-aman mein mere liye hi
ajal ki rahmat ko mangte the
yahi wo lamhe the jab shafaq ke tawil tilon pe chalte chalte
main dil ke zakhmon ko sath le kar
safar ke parbat se par utra

safir-e-laila-1

By

safir-e-laila yahi khandar hain jahan se aaghaz-e-dastan hai
zara sa baitho to main sunaun
fasil-e-qarya ke surkh patthar aur un pe azhdar-nishan burjen gawah qarya ki azmaton ki
chahaar jaanib nakhil-e-tuba aur us mein bahte farawan chashme
buland pedon ke thande sae the shakh-e-zaitun isi jagah thi
yahi sutun the jo dekhte ho pade hain murda giddhon ke manind
uthae rakhte the in ke shane azim qasron ki sangin saqfen
yahi wo dar hain safir-e-laila ki jin ke takhte uda liye hain dinon ki aawara sarsaron ne
yahin se guzri thin surkh unton ki wo qataren
ki un ki pushten sanobaron ke safed palan le ke chaltin
uthae phirtin jawan pariyon ki mahmalon ko
ye sehan-e-qarya hai un jaghon par ghani khajuron ki sabz shakhen
falak se taza phalon ke khoshe chura ke bharti thin pahluon mein
safed pani ke sau kuen yun bhare hue the
ki chaudi mashkon ko hath bhar ki hi rassiyan thin
mazaf-e-qarya mein sabza-gahen aur in mein charti thin farba bheden
shimal-e-qarya mein nil-gaen manar-e-masjid se dekhte the
pare hazaron kabutaron ke fasil-e-qarya se gumbadon tak
paron ko zoron se phadphadate the aur sehnon mein daudte the
yahin tha sab kuchh safir-e-laila
isi jagah par jahan babulon ke khar phirte hain chuhiyon ki sawariyon par
jahan parindon ko haul aate hain rakh udti hai haddiyon ki
yahi wo wahshat-sara hai jis mein dilon ki aankhen laraz rahi hain
safir-e-laila tum aaj aae ho to bataun
tere musafir yahan se nikle ufuq ke parbat se us taraf ko
wo aise nikle ki phir na aae
hazar kohna duaen garche buzurg honton se uth ke baam-e-falak pe pahunchin
magar na aae
aur ab yahan par na koi mausam na baadalon ke shafiq sae
na surajon ki safed dhupen
faqat sazaen hain ungh-bharti karih chehron ki dewiyan hain
safir-e-laila
yahan jo din hain wo din nahin hain
yahan ki raaten hain be-sitara
sahar mein koi nami nahin hai