zulm ki kuchh miad nahin hai

zulm ki kuchh miad nahin hai
dad nahin fariyaad nahin hai
qatl hue hain ab tak kitne
ku-e-sitam ko yaad nahin hai
aakhir roen kis ko kis ko
kaun hai jo barbaad nahin hai
qaid chaman bhi ban jata hai
murgh-e-chaman aazad nahin hai
lutf hi kya gar apne muqabil
satwat-e-barq-o-baad nahin hai
sab hon shadan sab hon khandan
tanha koi shad nahin hai
dawat-e-rang-o-nikhat hai ye
khanda-e-gul barbaad nahin hai

ye be-kas-o-be-qarar chehre

ye be-kas-o-be-qarar chehre
sadiyon ke ye sogwar chehre
mitti mein pade damak rahe hain
hiron ki tarah hazar chehre
le ja ke inhen kahan sajaen
ye bhuk ke shikar chehre
africa-o-asia ki zinat
ye nadir-e-rozgar chehre
khoi hui azmaton ke waris
kal raat ke yaadgar chehre
ghaze se safed mai se rangin
is daur ke daghdar chehre
guzre hain nigah-o-dil se ho kar
har tarah ke be-shumar chehre
maghrur ana ke ghonsle mein
baithe hue kam-ayar chehre
qabil-e-iltifat aankhen
na-qabil-e-e'tibar chehre
in sab se hasin-tar hain lekin
rindon ke gunahgar chehre

yaad aae hain ahd-e-junun ke khoe hue dildar bahut

yaad aae hain ahd-e-junun ke khoe hue dildar bahut
un se dur basai basti jin se hamein tha pyar bahut
ek ek kar ke khili thin kaliyan ek ek kar ke phul gae
ek ek kar ke hum se bichhde bagh-e-jahan mein yar bahut
husn ke jalwe aam hain lekin zauq-e-nazara aam nahin
ishq bahut mushkil hai lekin ishq ke dawedar bahut
zakhm kaho ya khilti kaliyan hath magar guldasta hai
bagh-e-wafa se hum ne chune hain phul bahut aur khar bahut
jo bhi mila hai le aae hain dagh-e-dil ya dagh-e-jigar
wadi wadi manzil manzil bhatke hain 'sardar' bahut

wo meri dost wo hamdard wo gham-KHwar aankhen

wo meri dost wo hamdard wo gham-khwar aankhen
ek masum mohabbat ki gunahgar aankhen
shokh-o-shadab-o-hasin sada-o-purkar aankhen
mast-o-sarshaar-o-jawan be-khud-o-hoshiyar aankhen
tirchhi nazron mein wo uljhi hui suraj ki kiran
apne duzdida ishaaron mein giraftar aankhen
jumbish-e-abru-o-mizhgan kai khunuk sae mein
aatish-afroz junun-khez sharar-bar aankhen
kaifiyat dil ki sunati hui ek ek nigah
be-zaban ho ke bhi wo mail-e-guftar aankhen
mausam-e-gul mein wo udte hue bhaunron ki tarah
ghuncha-e-dil pe wo karti hui yalghaar aankhen
kabhi chhalki hui sharbat ke katoron ki tarah
aur kabhi zahr mein dubi hui talwar aankhen
kabhi thahri hui yakh-basta ghamon ki jhilen
kabhi sahma hua simta hua ek pyar aankhen
kabhi jhukte hue baadal kabhi girti bijli
kabhi uthti hui aamada-e-paikar aankhen
nok-e-abru mein kabhi talkhi-e-inkar liye
kabhi ghole hue shirini-e-iqrar aankhen
aanch mein apni jawani ki sulagti chitwan
shabnam-e-ashk mein dhoi hui gulnar aankhen
husn ke chand se mukhde pe chamakte tare
hae aankhen wo harif-e-lab-o-rukhsar aankhen
ishwa-o-ghamza-o-andaz-o-ada par nazan
apne pindar-e-jawani ki parastar aankhen
ruh ko rog mohabbat ka laga deti hain
sehat-e-dil jo ata karti hain bimar aankhen
sehn-e-zindan mein hai phir raat ke taron ka hujum
shama ki tarah farozan sar-e-diwar aankhen

watan se dur yaran-e-watan ki yaad aati hai

watan se dur yaran-e-watan ki yaad aati hai
qafas mein ham-nawayan-e-chaman ki yaad aati hai
ye kaisa zulm hai phir saya-e-diwar-e-zindan mein
watan ke saya-e-sarw-o-saman ki yaad aati hai
tasawwur jis se rangin hai takhayyul jis se raqsan hai
ghazal-e-hind-o-ahu-e-khutan ki yaad aati hai
kabhi laila-o-shirin gah hir-o-shohni ban kar
nirale yar ki banke sajan ki yaad aati hai
kahan ka khauf-e-zindan dahshat-e-dar-o-rasan kaisi
qad-e-mashuq-o-zulf-e-pur-shikan ki yaad aati hai

wahi husn-e-yar mein hai wahi lala-zar mein hai

wahi husn-e-yar mein hai wahi lala-zar mein hai
wo jo kaifiyat nashe ki mai-e-khush-gawar mein hai
ye chaman ki aarzu hai koi lut le chaman ko
ye tamam rang-o-nikhat tere ikhtiyar mein hai
tere hath ki bulandi mein farogh-e-kahkashan hai
ye hujum-e-mah-o-anjum tere intizar mein hai
bas usi ko todna hai ye junun-e-nafa-khori
yahi ek sard khanjar dil-e-rozgar mein hai
abhi zindagi hasin hai abhi zikr-e-maut kaisa
abhi phul khil rahe hain abhi to kanar mein hai
abhi mai-kada jawan hai abhi mauj mein hai saqi
abhi jam raqs mein hai abhi mai bahaar mein hai
yahi mera sher-o-naghma yahi meri fikr-o-hikmat
jo suru-o-dard-mandi dil-e-be-qarar mein hai