KHizr-e-rah

By

shair
sahil-e-dariya pe main ek raat tha mahw-e-nazar
gosha-e-dil mein chhupae ek jahan-e-iztrab
shab sukut-afza hawa aasuda dariya narm sair
thi nazar hairan ki ye dariya hai ya taswir-e-ab
jaise gahware mein so jata hai tifl-e-shir-khwar
mauj-e-muztar thi kahin gahraiyon mein mast-e-khwab
raat ke afsun se tair aashiyanon mein asir
anjum-e-kam-zau giraftar-e-tilism-e-mahtab
dekhta kya hun ki wo paik-e-jahan-paima khizr
jis ki piri mein hai manind-e-sahar rang-e-shabab
kah raha hai mujh se ai juya-e-asrar-e-azal
chashm-e-dil wa ho to hai taqdir-e-alam be-hijab
dil mein ye sun kar bapa hangama-e-mahshar hua
main shahid-e-justuju tha yun sukhan-gustar hua
ai teri chashm-e-jahan-bin par wo tufan aashkar
jin ke hangame abhi dariya mein sote hain khamosh
kashti-e-miskin-o-jaan-e-pak-o-diwar-e-yatim
ilm-e-musa bhi hai tere samne hairat-farosh
chhod kar aabaadiyan rahta hai tu sahra-naward
zindagi teri hai be-roz-o-shab-o-farda-o-dosh
zindagi ka raaz kya hai saltanat kya chiz hai
aur ye sarmaya-o-mehnat mein hai kaisa kharosh
ho raha hai asia ka khirqa-e-derina chaak
naujawan aqwam-e-nau-daulat ke hain pairaya-posh
garche askandar raha mahrum-e-ab-e-zindagi
fitrat-e-askandari ab tak hai garm nao-nosh
bechta hai hashmi namus din-e-mustafa
khak-o-khun mein mil raha hai turkaman-e-shakht-kosh
aag hai aulad-e-ibrahim hai namrud hai
kya kisi ko phir kisi ka imtihan maqsud hai
jawab-e-khizr
sahra-nawardi
kyun tajjub hai meri sahra-nawardi par tujhe
ye taga-pu-e-damadam zindagi ki hai dalil
ai rahin-e-khana tu ne wo saman dekha nahin
gunjti hai jab faza-e-dasht mein bang-e-rahil
ret ke tile pe wo aahu ka be-parwa khiram
wo hazar be-barg-o-saman wo safar be-sang-o-mil
wo numud-e-akhtar-e-simab-pa hangam-e-subh
ya numayan baam-e-gardun se jabin-e-jibrail
wo sukut-e-sham-e-sahra mein ghurub-e-aftab
jas se raushan-tar hui chashm-e-jahan-bin-e-khalil
aur wo pani ke chashme par maqam-e-karwan
ahl-e-iman jas tarah jannat mein gird-e-salsabil
taza virane ki sauda-e-mohabbat ko talash
aur aabaadi mein tu zanjiri-e-kisht-o-nakhil
pukhta-tar hai gardish-e-paiham se jam-e-zindagi
hai yahi ai be-khabar raaz-e-dawam-e-zindagi
zindagi bartar az sud-o-ziyan hai zindagi
zindagi bartar az andesha-e-sud-o-ziyan hai zindagi
hai kabhi jaan aur kabhi taslim-e-jaan hai zindagi
tu ise paimana-e-imroz-o-farda se na nap
jawedan paiham dawan har-dam jawan hai zindagi
apni duniya aap paida kar agar zindon mein hai
sirr-e-adam hai zamir-e-kun-fakan hai zindagi
zindagani ki haqiqat kohkan kai dil se puchh
ju-e-shir-o-tesha-o-sang-e-garan hai zindagi
bandagi mein ghat ke rah jati hai ek ju-e-kam-ab
aur aazadi mein bahr-e-be-karan hai zindagi
aashkara hai ye apni quwwat-e-taskhir se
garche ek mitti ke paikar mein nihan hai zindagi
qulzum-e-hasti se to ubhra hai manind-e-habab
is ziyan-khane mein tera imtihan hai zindagi
kham hai jab tak tu hai mitti ka ek ambar tu
pukhta ho jae tu hai shamsher-e-be-zinhaar tu
ho sadaqat ke liye jis dil mein marne ki tadap
pahle apne paikar-e-khaki mein jaan paida kare
phunk dale ye zamin-o-asman mustaar
aur khakistar se aap apna jahan paida kare
zindagi ki quwwat-e-pinhan ko kar de aashkar
ta ye chingari frogh-e-jawedan paida kare
khak-e-mashriq par chamak jae misal-e-aftab
ta-badakhshan phir wahi lal-e-giran paida kare
su-e-gardun nala-e-shab-gir ka bheje safir
raat ke taron mein apne raaz-dan paida kare
ye ghadi mahshar ki hai to arsa-e-mehshar mein hai
pesh kar ghafil amal koi agar daftar mein hai
saltanat
aa bataun tujh ko ramz-e-aya-e-innal-muluk
saltanat aqwam-e-ghaalib ki hai ek jadugari
khwab se be-dar hota hai zara mahkum agar
phir sula deti hai us ko hukmaran ki sahiri
jadu-e-mahmud ki tasir se chashm-e-ayaz
dekhti hai halqa-e-gardan mein saz-e-dil-bari
khun-e-israil aa jata hai aakhir josh mein
tod deta hai koi musa tilism-e-samari
sarwari zeba faqat us zat-e-be-hamta ko hai
hukmaran hai ek wahi baqi butan-e-azari
az ghulami fitrat-e-azad ra ruswa makun
ta-tarashi khwaja-e-az-barahman kafir teri
hai wahi saz-e-kuhan maghrib ka jamhuri nizam
jis ke pardon mein nahin ghair-az-nawa-e-qaisari
dew-e-istibdad jamhuri qaba mein pa-e-kub
tu samajhta hai ye aazadi ki hai nilam-pari
majlis-e-ain-o-islah-o-riayat-o-huquq
tibb-e-maghrib mein maze mithe asar khwab-awari
garmi-e-guftar aaza-e-majalis al-aman
ye bhi ek sarmaya-daron ki hai jang-e-zargari
is sarab-e-rang-o-bu ko gulistan samjha hai tu
aah ai nadan qafas ko aashiyan samjha hai tu
sarmaya-o-mehnat
banda-e-mazdur ko ja kar mera paigham de
khizr ka paigham kya hai ye payam-e-kaenat
ai ki tujh ko kha gaya sarmaya-dar-e-hila-gar
shakh-e-ahu par rahi sadiyon talak teri baraat
dast-e-daulat-afrin ko muzd yun milti rahi
ahl-e-sarwat jaise dete hain gharibon ko zakat
sahir-al-mut ne tujh ko diya barg-e-hashish
aur tu ai be-khabar samjha use shakh-e-nabaat
nasl qaumiyat kalisa saltanat tahzib rang
khwajgi ne khub chun chun ke banae muskiraat
kat mara nadan khayali dewtaon ke liye
sukr ki lazzat mein tu lutwa gaya naqd-e-hayat
makr ki chaalon se bazi le gaya sarmaya-dar
intiha-e-sadgi se kha gaya mazdur mat
uth ki ab bazm-e-jahan ka aur hi andaz hai
mashriq-o-maghrib mein tere daur ka aaghaz hai
himmat-e-ali to dariya bhi nahin karti qubul
ghuncha san ghafil tere daman mein shabnam kab talak
naghma-e-bedari-e-jamhur hai saman-e-aish
qissa-e-khwab-awar askandar-o-jam kab talak
aaftab-e-taza paida batn-e-giti se hua
aasman dube hue taron ka matam kab talak
tod dalin fitrat-e-insan ne zanjiren tamam
duri-e-jannat se roti chashm-e-adam kab talak
baghban-e-chaara-farma se ye kahti hai bahaar
zakhm-e-gul ke waste tadbir-e-marham kab talak
kirmak-e-nadan tawaf-e-shama se aazad ho
apni fitrat ke tajalli-zar mein aabaad ho
duniya-e-islam
kya sunata hai mujhe turk-o-arab ki dastan
mujh se kuchh pinhan nahin islamiyon ka soz-o-saz
le gae taslis ke farzand miras-e-khalil
khisht-e-buniyaad-e-kalisa ban gai khak-e-hijaz
ho gai ruswa zamane mein kulah-e-lala-rang
jo sarapa naz the hain aaj majbur-e-niyaz
le raha hai mai-faroshan-e-farangistan se pars
wo mai-e-sarkash hararat jis ki hai mina-gudaz
hikmat-e-maghrib se millat ki ye kaifiyyat hui
tukde tukde jis tarah sone ko kar deta hai gaz
ho gaya manind-e-ab arzan musalman ka lahu
muztarib hai tu ki tera dil nahin dana-e-raaz
guft rumi har bana-e-kuhana ki-abaadan kunand
mi na-dani awwal aan buniyaad ra viran kunand
mulk hathon se gaya millat ki aankhen khul gain
haq tera chashme ata kar dast-e-ghafil dar nigar
momyai ki gadai se to behtar hai shikast
mor-e-be-par hajate pesh-e-sulaimane mabar
rabt-o-zabt-e-millat-e-baiza hai mashriq ki najat
asia wale hain is nukte se ab tak be-khabar
phir siyasat chhod kar dakhil hisar-e-din mein ho
mulk-o-daulat hai faqat hifz-e-haram ka ek samar
ek hun muslim haram ki pasbani ke liye
nil ke sahil se le kar ta-ba-khak-e-kashghar
jo karega imtiyaz-e-rang-o-khun mit jaega
turk-e-khargahi ho ya aarabi-e-wala-guhar
nasl agar muslim ki mazhab par muqaddam ho gai
ud gaya duniya se tu manind-e-khak-e-rah-guzar
ta-khilafat ki bina duniya mein ho phir ustuwar
la kahin se dhund kar aslaf ka qalb-o-jigar
ai ki na-shinasi khafi ra az jali hushiyar bash
ai giraftar-e-abu-bakr-o-ali hushiyar-bash
ishq ko fariyaad lazim thi so wo bhi ho chuki
ab zara dil tham kar fariyaad ki tasir dekh
tu ne dekha satwat-e-raftar-e-dariya ka uruj
mauj-e-muztar kis tarah banti hai ab zanjir dekh
aam hurriyat ka jo dekha tha khwab islam ne
ai musalman aaj to us khwab ki tabir dekh
apni khakistar samundar ko hai saman-e-wajud
mar ke phir hota hai paida ye jahan-e-pir dekh
khol kar aankhen mere aaina-e-guftar mein
aane wale daur ki dhundli si ek taswir dekh
aazmuda fitna hai ek aur bhi gardun ke pas
samne taqdir ke ruswai-e-tadbir dekh
muslim asti sina ra az aarzu-abaad dar
har zaman pesh-e-nazar la-yukhlif-ul-miad dar

gul-e-rangin

By

tu shanasa-e-kharash-e-uqda-e-mushkil nahin
ai gul-e-rangin tere pahlu mein shayad dil nahin
zeb-e-mahfil hai sharik-e-shorish-e-mahfil nahin
ye faraghat bazm-e-hasti mein mujhe hasil nahin
is chaman mein main sarapa soz-o-saz-e-arzu
aur teri zindagani be-gudaz-e-arzu
tod lena shakh se tujh ko mera aain nahin
ye nazar ghair-az-nigah-e-chashm-e-surat-bin nahin
aah ye dast-e-jafa jo ai gul-e-rangin nahin
kis tarah tujh ko ye samjhaun ki main gulchin nahin
kaam mujh ko dida-e-hikmat ke uljhedon se kya
dida-bulbul se mein karta hun nazzara tera
sau zabanon par bhi khamoshi tujhe manzur hai
raaz wo kya hai tere sine mein jo mastur hai
meri surat tu bhi ek barg-e-riyaz-e-tur hai
main chaman se dur hun tu bhi chaman se dur hai
mutmain hai tu pareshan misl-e-bu rahta hun main
zakhmi-e-shamshir-e-zauq-e-justuju rahta hun main
ye pareshani meri saman-e-jamiyat na ho
ye jigar-sozi charagh-e-khana-e-hikmat na ho
na-tawani hi meri sarmaya-e-quwwat na ho
rashk-e-jam-e-jam mera aaina-e-hairat na ho
ye talash-e-muttasil sham-e-jahan-afroz hai
tausan-e-idrak-e-insan ko khiram-amoz hai

zauq o shauq

By

qalb o nazar ki zindagi dasht mein subh ka saman
chashma-e-aftab se nur ki naddiyan rawan!
husn-e-azal ki hai numud chaak hai parda-e-wajud
dil ke liye hazar sud ek nigah ka ziyan!
surkh o kabud badliyan chhod gaya sahab-e-shab!
koh-e-izam ko de gaya rang-ba-rang tailisan!
gard se pak hai hawa barg-e-nakhil dhul gae
reg-e-nawah-e-kazima narm hai misl-e-parniyan
aag bujhi hui idhar, tuti hui tanab udhar
kya khabar is maqam se guzre hain kitne karwan
aai sada-e-jibrail tera maqam hai yahi
ahl-e-firaq ke liye aish-e-dawam hai yahi
kis se kahun ki zahr hai mere liye mai-e-hayat
kohna hai baz-e-kainat taza hain mere wardat!
kya nahin aur ghaznawi kargah-e-hayat mein
baithe hain kab se muntazir ahl-e-haram ke somnat!
zikr-e-arab ke soz mein, fikr-e-ajam ke saz mein
ne arabi mushahidat, ne ajami takhaiyyulat
qafila-e-hijaz mein ek husain bhi nahin
garche hai tab-dar abhi gesu-e-dajla-o-furaat!
aql o dil o nigah ka murshid-e-awwalin hai ishq
ishq na ho to shar-o-din butkada-e-tasawwuraat!
sidq-e-khalil bhi hai ishq sabr-e-husain bhi hai ishq!
marka-e-wajud mein badr o hunain bhi hai ishq!
aaya-e-kaenat ka mani-e-der-yab tu!
nikle teri talash mein qafila-ha-e-rang-o-bu!
jalwatiyan-e-madrasa kor-nigah o murda-zauq
jalwatyan-e-maikada kam-talab o tahi-kadu!
main ki meri ghazal mein hai aatish-e-rafta ka suragh
meri tamam sarguzisht khoe huon ki justuju!
baad-e-saba ki mauj se nash-o-numa-e-khar-o-khas!
mere nafas ki mauj se nashw-o-numa-e-arzu!
khun-e-dil o jigar se hai meri nawa ki parwarish
hai rag-e-saz mein rawan sahib-e-saz ka lahu!
fursat-e-kashmukash mein in dil be-qarar ra
yak do shikan zyaada kun gesu-e-tabdar ra
lauh bhi tu, qalam bhi tu, tera wajud al-kitab!
gumbad-e-abgina-rang tere muhit mein habab!
aalam-e-ab-o-khak mein tere zuhur se farogh
zarra-e-reg ko diya tu ne tulu-e-aftab!
shaukat-e-sanjar-o-salim tere jalal ki numud!
faqr-e-'juned'-o-'bayazid' tera jamal be-naqab!
shauq tera agar na ho meri namaz ka imam
mera qayam bhi hijab! mera sujud bhi hijab!
teri nigah-e-naz se donon murad pa gae
aql, ghayab o justuju ishq, huzur o iztirab!
tira-o-tar hai jahan gardish-e-aftab se!
tab-e-zamana taza kar jalwa-e-be-hijab se!
teri nazar mein hain tamam mere guzishta roz o shab
mujh ko khabar na thi ki hai ilm-e-nakhil be-rutab!
taza mere zamir mein marka-e-kuhan hua!
ishq tamam mustafa! aql tamam bu-lahab!
gah ba-hila mi-barad, gah ba-zor mi-kashad
ishq ki ibtida ajab ishq ki intiha ajab!
aalam-e-soz-o-saz mein wasl se badh ke hai firaq
wasl mein marg-e-arzu! hijr mein lazzat-e-talab!
ain-e-visal mein mujhe hausla-e-nazar na tha
garche bahana-ju rahi meri nigah-e-be-adab!
garmi-e-arzu firaq! shorish-e-ha-o-hu firaq!
mauj ki justuju firaq! qatre ki aabru firaq!

saqi-nama

By

hua khema-zan karwan-e-bahaar
iram ban gaya daman-e-koh-sar
gul o nargis o sosan o nastaran
shahid-e-azal lala-khunin kafan
jahan chhup gaya parda-e-rang mein
lahu ki hai gardish rag-e-sang mein
faza nili nili hawa mein surur
thaharte nahin aashiyan mein tuyur
wo ju-e-kohistan uchakti hui
atakti lachakti sarakti hui
uchhalti phisalti sambhalti hui
bade pech kha kar nikalti hui
ruke jab to sil chir deti hai ye
pahadon ke dil chir deti hai ye
zara dekh ai saqi-e-lala-fam
sunati hai ye zindagi ka payam
pila de mujhe wo mai-e-parda-soz
ki aati nahin fasl-e-gul roz roz
wo mai jis se raushan zamir-e-hayat
wo mai jis se hai masti-e-kaenat
wo mai jis mein hai soz-o-saz-e-azal
wo mai jis se khulta hai raaz-e-azal
utha saqiya parda is raaz se
lada de mamule ko shahbaz se
zamane ke andaz badle gae
naya rag hai saz badle gae
hua is tarah fash raaz-e-farang
ki hairat mein hai shisha-baz-e-farang
purani siyasat-gari khwar hai
zamin mir o sultan se be-zar hai
gaya daur-e-sarmaya-dar gaya
tamasha dikha kar madari gaya
giran khwab chini sambhalne lage
himala ke chashme ubalne lage
dil-e-tur-e-sina-o-faran do-nim
tajalli ka phir muntazir hai kalim
musalman hai tauhid mein garam-josh
magar dil abhi tak hai zunnar-posh
tamaddun tasawwuf shariat-e-kalam
butan-e-ajam ke pujari tamam
haqiqat khurafat mein kho gai
ye ummat riwayat mein kho gai
lubhata hai dil ko kalam-e-khatib
magar lazzat-e-shauq se be-nasib
bayan is ka mantiq se suljha hua
lughat ke bakhedon mein uljha hua
wo sufi ki tha khidmat-e-haq mein mard
mohabbat mein yakta hamiyat mein fard
ajam ke khayalat mein kho gaya
ye salik maqamat mein kho gaya
bujhi ishq ki aag andher hai
musalman nahin rakh ka dher hai
sharab-e-kuhan phir pila saqiya
wahi jam gardish mein la saqiya
mujhe ishq ke par laga kar uda
meri khak jugnu bana kar uda
khirad ko ghulami se aazad kar
jawanon ko piron ka ustad kar
hari shakh-e-millat tere nam se hai
nafas is badan mein tere dam se hai
tadapne phadakne ki taufiq de
dil-e-murtaza soz-e-siddiq de
jigar se wahi tir phir par kar
tamanna ko sinon mein bedar kar
tere aasmanon ke taron ki khair
zaminon ke shab zinda-daron ki khair
jawanon ko soz-e-jigar bakhsh de
mera ishq meri nazar bakhsh de
meri naw girdab se par kar
ye sabit hai to is ko sayyar kar
bta mujh ko asrar-e-marg-o-hayat
ki teri nigahon mein hai kaenat
mere dida-e-tar ki be-khwabiyan
mere dil ki poshida betabiyan
mere nala-e-nim-shab ka niyaz
meri khalwat o anjuman ka gudaz
umangen meri aarzuen meri
ummiden meri justujuen meri
meri fitrat aaina-e-rozgar
ghazalan-e-afkar ka murgh-zar
mera dil meri razm-gah-e-hayat
gumanon ke lashkar yaqin ka sabaat
yahi kuchh hai saqi mata-e-faqir
isi se faqiri mein hun main amir
mere qafile mein luta de ise
luta de thikane laga de ise
dama-dam rawan hai yam-e-zindagi
har ek shai se paida ram-e-zindagi
isi se hui hai badan ki numud
ki shole mein poshida hai mauj-e-dud
giran garche hai sohbat-e-ab-o-gil
khush aai ise mehnat-e-ab-o-gil
ye sabit bhi hai aur sayyar bhi
anasir ke phandon se be-zar bhi
ye wahdat hai kasrat mein har dam asir
magar har kahin be-chugon be-nazir
ye aalam ye but-khana-e-shash-jihat
isi ne tarasha hai ye somnat
pasand is ko takrar ki khu nahin
ki tu main nahin aur main tu nahin
man o tu se hai anjuman-afrin
magar ain-e-mahfil mein khalwat-nashin
chamak us ki bijli mein tare mein hai
ye chandi mein sone mein pare mein hai
usi ke bayaban usi ke babul
usi ke hain kante usi ke hain phul
kahin us ki taqat se kohsar chur
kahin us ke phande mein jibrail o hur
kahin jaza hai shahin simab rang
lahu se chakoron ke aaluda chang
kabutar kahin aashiyane se dur
phadakta hua jal mein na-subur
fareb-e-nazar hai sukun o sabaat
tadapta hai har zarra-e-kaenat
thaharta nahin karwan-e-wajud
ki har lahz hai taza shan-e-wajud
samajhta hai tu raaz hai zindagi
faqat zuaq-e-parwaz hai zindagi
bahut us ne dekhe hain past o buland
safar us ko manzil se badh kar pasand
safar zindagi ke liye barg o saz
safar hai haqiqat hazar hai majaz
ulajh kar sulajhne mein lazzat use
tadapne phadakne mein rahat use
hua jab use samna maut ka
kathin tha bada thamna maut ka
utar kar jahan-e-makafat mein
rahi zindagi maut ki ghat mein
mazaq-e-dui se bani zauj zauj
uthi dasht o kohsar se fauj fauj
gul is shakh se tutte bhi rahe
isi shakh se phutte bhi rahe
samajhte hain nadan use be-sabaat
ubharta hai mit mit ke naqsh-e-hayat
badi tez jaulan badi zud-ras
azal se abad tak ram-e-yak-nafs
zamana ki zanjir-e-ayyam hai
damon ke ulat-pher ka nam hai
ye mauj-e-nafs kya hai talwar hai
khudi kya hai talwar ki dhaar hai
khudi kya hai raaz-darun-hayat
khudi kya hai bedari-e-kaenat
khudi jalwa badmast o khalwat-pasand
samundar hai ek bund pani mein band
andhere ujale mein hai tabnak
man o tu mein paida man o tu se pak
azal us ke pichhe abad samne
na had us ke pichhe na had samne
zamane ke dariya mein bahti hui
sitam us ki maujon ke sahti hui
tajassus ki rahen badalti hui
dama-dam nigahen badalti hui
subuk us ke hathon mein sang-e-giran
pahad us ki zarbon se reg-e-rawan
safar us ka anjam o aaghaz hai
yahi us ki taqwim ka raaz hai
kiran chand mein hai sharar sang mein
ye be-rang hai dub kar rang mein
ise wasta kya kam-o-besh se
nasheb o faraaz o pas-o-pesh se
azal se hai ye kashmakash mein asir
hui khak-e-adam mein surat-pazir
khudi ka nasheman tere dil mein hai
falak jis tarah aankh ke til mein hai
khudi ke nigah-ban ko hai zahr-nab
wo nan jis se jati rahe us ki aab
wahi nan hai us ke liye arjumand
rahe jis se duniya mein gardan buland
khudi fal-e-mahmud se darguzar
khudi par nigah rakh ayazi na kar
wahi sajda hai laiq-e-ehtimam
ki ho jis se har sajda tujh par haram
ye aalam ye hangama-e-rang-o-saut
ye aalam ki hai zer-e-farman-e-maut
ye aalam ye but-khana-e-chashm-o-gosh
jahan zindagi hai faqat khurd o nosh
khudi ki ye hai manzil-e-awwalin
musafir ye tera nasheman nahin
teri aag is khak-dan se nahin
jahan tujh se hai tu jahan se nahin
badhe ja ye koh-e-giran tod kar
tilism-e-zaman-o-makan tod kar
khudi sher-e-maula jahan us ka said
zamin us ki said aasman us ka said
jahan aur bhi hain abhi be-numud
ki khali nahin hai zamir-e-wajud
har ek muntazir teri yalghaar ka
teri shaukhi-e-fikr-o-kirdar ka
ye hai maqsad gardish-e-rozgar
ki teri khudi tujh pe ho aashkar
tu hai fatah-e-alam-e-khub-o-zisht
tujhe kya bataun teri sarnawisht
haqiqat pe hai jama-e-harf-e-tang
haqiqat hai aaina-e-guftar-e-zang
farozan hai sine mein sham-e-nafas
magar tab-e-guftar rakhti hai bas
agar yak-sar-e-mu-e-bartar param
farogh-e-tajalli ba-sozad param

lenin

By

khuda ke huzur mein
ai anfus o aafaq mein paida teri aayat
haq ye hai ki hai zinda o painda teri zat
main kaise samajhta ki tu hai ya ki nahin hai
har dam mutaghayyar the khirad ke nazriyat
mahram nahin fitrat ke surud-e-azli se
bina-e-kawakib ho ki dana-e-nabaatat
aaj aankh ne dekha to wo aalam hua sabit
main jis ko samajhta tha kalisa ke khurafat
hum band-e-shab-o-roz mein jakde hue bande
tu khaliq-e-asar-o-nigaranda-e-anat
ek baat agar mujh ko ijazat ho to puchhun
hal kar na sake jis ko hakimon ke maqalat
jab tak main jiya khema-e-aflak ke niche
kante ki tarah dil mein khatakti rahi ye baat
guftar ke uslub pe qabu nahin rahta
jab ruh ke andar mutalatum hon khayalat
wo kaun sa aadam hai ki tu jis ka hai mabud
wo aadam-e-khaki ki jo hai zer-e-samawat
mashriq ke khudawand safedan-e-firangi
maghrib ke khudawand darakhshinda filizzat
europe mein bahut raushni-e-ilm-o-hunar hai
haq ye hai ki be-chashma-e-haiwan hai ye zulmat
ranai-e-tamir mein raunaq mein safa mein
girjon se kahin badh ke hain bankon ki imaraat
zahir mein tijarat hai haqiqat mein jua hai
sud ek ka lakhon ke liye marg-e-mufajat
ye ilm ye hikmat ye tadabbur ye hukumat
pite hain lahu dete hain talim-e-musawat
bekari o uryani o mai-khwari o aflas
kya kam hain farangi madniyat ki futuhat
wo qaum ki faizan-e-samawi se ho mahrum
had us ke kamalat ki hai barq o bukharaat
hai dil ke liye maut mashinon ki hukumat
ehsas-e-murawwat ko kuchal dete hain aalat
aasar to kuchh kuchh nazar aate hain ki aakhir
tadbir ko taqdir ke shatir ne kiya mat
mai-khana ne ki buniyaad mein aaya hai tazalzul
baithe hain isi fikr mein piran-e-kharabaat
chehron pe jo surkhi nazar aati hai sar-e-sham
ya ghaza hai ya saghar o mina ki karamat
tu qadir o aadil hai magar tere jahan mein
hain talkh bahut banda-e-mazdur ke auqat
kab dubega sarmaya-parasti ka safina
duniya hai teri muntazir-e-roz-e-mukafat

jawab-e-shikwa

By

dil se jo baat nikalti hai asar rakhti hai
par nahin taqat-e-parwaz magar rakhti hai
qudsi-ul-asl hai rifat pe nazar rakhti hai
khak se uthti hai gardun pe guzar rakhti hai
ishq tha fitnagar o sarkash o chaalak mera
aasman chir gaya nala-e-bebak mera
pir-e-gardun ne kaha sun ke kahin hai koi
bole sayyare sar-e-arsh-e-barin hai koi
chand kahta tha nahin ahl-e-zamin hai koi
kahkashan kahti thi poshida yahin hai koi
kuchh jo samjha mere shikwe ko to rizwan samjha
mujh ko jannat se nikala hua insan samjha
thi farishton ko bhi hairat ki ye aawaz hai kya
arsh walon pe bhi khulta nahin ye raaz hai kya
ta-sar-e-arsh bhi insan ki tag-o-taz hai kya
aa gai khak ki chutki ko bhi parwaz hai kya
ghafil aadab se sukkan-e-zamin kaise hain
shokh o gustakh ye pasti ke makin kaise hain
is qadar shokh ki allah se bhi barham hai
tha jo masjud-e-malaik ye wahi aadam hai
aalim-e-kaif hai dana-e-rumuz-e-kam hai
han magar ijz ke asrar se na-mahram hai
naz hai taqat-e-guftar pe insanon ko
baat karne ka saliqa nahin na-danon ko
aai aawaz gham-angez hai afsana tera
ashk-e-betab se labrez hai paimana tera
aasman-gir hua nara-e-mastana tera
kis qadar shokh-zaban hai dil-e-diwana tera
shukr shikwe ko kiya husn-e-ada se tu ne
ham-sukhan kar diya bandon ko khuda se tu ne
hum to mail-ba-karam hain koi sail hi nahin
rah dikhlaen kise rah-raw-e-manzil hi nahin
tarbiyat aam to hai jauhar-e-qabil hi nahin
jis se tamir ho aadam ki ye wo gil hi nahin
koi qabil ho to hum shan-e-kai dete hain
dhundne walon ko duniya bhi nai dete hain
hath be-zor hain ilhad se dil khugar hain
ummati bais-e-ruswai-e-paighambar hain
but-shikan uth gae baqi jo rahe but-gar hain
tha brahim pidar aur pisar aazar hain
baada-asham nae baada naya khum bhi nae
haram-e-kaba naya but bhi nae tum bhi nae
wo bhi din the ki yahi maya-e-ranai tha
nazish-e-mausam-e-gul lala-e-sahrai tha
jo musalman tha allah ka saudai tha
kabhi mahbub tumhaara yahi harjai tha
kisi yakjai se ab ahd-e-ghulami kar lo
millat-e-ahmad-e-mursil ko maqami kar lo
kis qadar tum pe giran subh ki bedari hai
hum se kab pyar hai han nind tumhein pyari hai
tab-e-azad pe qaid-e-ramazan bhaari hai
tumhin kah do yahi aain-e-wafadari hai
qaum mazhab se hai mazhab jo nahin tum bhi nahin
jazb-e-baham jo nahin mahfil-e-anjum bhi nahin
jin ko aata nahin duniya mein koi fan tum ho
nahin jis qaum ko parwa-e-nasheman tum ho
bijliyan jis mein hon aasuda wo khirman tum ho
bech khate hain jo aslaf ke madfan tum ho
ho niko nam jo qabron ki tijarat kar ke
kya na bechoge jo mil jaen sanam patthar ke
safha-e-dahr se baatil ko mitaya kis ne
nau-e-insan ko ghulami se chhudaya kis ne
mere kabe ko jabinon se basaya kis ne
mere quran ko sinon se lagaya kis ne
the to aaba wo tumhaare hi magar tum kya ho
hath par hath dhare muntazir-e-farda ho
kya kaha bahr-e-musalman hai faqat wada-e-hur
shikwa beja bhi kare koi to lazim hai shuur
adl hai fatir-e-hasti ka azal se dastur
muslim aain hua kafir to mile hur o qusur
tum mein huron ka koi chahne wala hi nahin
jalwa-e-tur to maujud hai musa hi nahin
manfat ek hai is qaum ka nuqsan bhi ek
ek hi sab ka nabi din bhi iman bhi ek
haram-e-pak bhi allah bhi quran bhi ek
kuchh badi baat thi hote jo musalman bhi ek
firqa-bandi hai kahin aur kahin zaten hain
kya zamane mein panapne ki yahi baaten hain
kaun hai tarik-e-ain-e-rasul-e-mukhtar
maslahat waqt ki hai kis ke amal ka mear
kis ki aankhon mein samaya hai shiar-e-aghyar
ho gai kis ki nigah tarz-e-salaf se be-zar
qalb mein soz nahin ruh mein ehsas nahin
kuchh bhi paigham-e-mohammad ka tumhein pas nahin
ja ke hote hain masajid mein saf-ara to gharib
zahmat-e-roza jo karte hain gawara to gharib
nam leta hai agar koi hamara to gharib
parda rakhta hai agar koi tumhaara to gharib
umara nashsha-e-daulat mein hain ghafil hum se
zinda hai millat-e-baiza ghoraba ke dam se
waiz-e-qaum ki wo pukhta-khayali na rahi
barq-e-tabi na rahi shola-maqali na rahi
rah gai rasm-e-azan ruh-e-bilali na rahi
falsafa rah gaya talqin-e-ghazali na rahi
masjiden marsiyan-khwan hain ki namazi na rahe
yani wo sahib-e-ausaf-e-hijazi na rahe
shor hai ho gae duniya se musalman nabud
hum ye kahte hain ki the bhi kahin muslim maujud
waza mein tum ho nasara to tamaddun mein hunud
ye musalman hain jinhen dekh ke sharmaen yahud
yun to sayyad bhi ho mirza bhi ho afghan bhi ho
tum sabhi kuchh ho batao to musalman bhi ho
dam-e-taqrir thi muslim ki sadaqat bebak
adl us ka tha qawi laus-e-maraat se pak
shajar-e-fitrat-e-muslim tha haya se namnak
tha shujaat mein wo ek hasti-e-fauq-ul-idrak
khud-gudazi nam-e-kaifiyat-e-sahba-yash bud
khali-az-khesh shudan surat-e-mina-yash bud
har musalman rag-e-baatil ke liye nashtar tha
us ke aaina-e-hasti mein amal jauhar tha
jo bharosa tha use quwwat-e-bazu par tha
hai tumhein maut ka dar us ko khuda ka dar tha
bap ka ilm na bete ko agar azbar ho
phir pisar qabil-e-miras-e-pidar kyunkar ho
har koi mast-e-mai-e-zauq-e-tan-asani hai
tum musalman ho ye andaz-e-musalmani hai
haidari faqr hai ne daulat-e-usmani hai
tum ko aslaf se kya nisbat-e-ruhani hai
wo zamane mein muazziz the musalman ho kar
aur tum khwar hue tarik-e-quran ho kar
tum ho aapas mein ghazabnak wo aapas mein rahim
tum khata-kar o khata-bin wo khata-posh o karim
chahte sab hain ki hon auj-e-surayya pe muqim
pahle waisa koi paida to kare qalb-e-salim
takht-e-faghfur bhi un ka tha sarir-e-kae bhi
yun hi baaten hain ki tum mein wo hamiyat hai bhi
khud-kushi shewa tumhaara wo ghayur o khuddar
tum ukhuwwat se gurezan wo ukhuwwat pe nisar
tum ho guftar sarapa wo sarapa kirdar
tum taraste ho kali ko wo gulistan ba-kanar
ab talak yaad hai qaumon ko hikayat un ki
naqsh hai safha-e-hasti pe sadaqat un ki
misl-e-anjum ufuq-e-qaum pe raushan bhi hue
but-e-hindi ki mohabbat mein birhman bhi hue
shauq-e-parwaz mein mahjur-e-nasheman bhi hue
be-amal the hi jawan din se bad-zan bhi hue
in ko tahzib ne har band se aazad kiya
la ke kabe se sanam-khane mein aabaad kiya
qais zahmat-kash-e-tanhai-e-sahra na rahe
shahr ki khae hawa baadiya-paima na rahe
wo to diwana hai basti mein rahe ya na rahe
ye zaruri hai hijab-e-rukh-e-laila na rahe
gila-e-zaur na ho shikwa-e-bedad na ho
ishq aazad hai kyun husn bhi aazad na ho
ahd-e-nau barq hai aatish-zan-e-har-khirman hai
aiman is se koi sahra na koi gulshan hai
is nai aag ka aqwam-e-kuhan indhan hai
millat-e-khatm-e-rusul shola-ba-pairahan hai
aaj bhi ho jo brahim ka iman paida
aag kar sakti hai andaz-e-gulistan paida
dekh kar rang-e-chaman ho na pareshan mali
kaukab-e-ghuncha se shakhen hain chamakne wali
khas o khashak se hota hai gulistan khali
ghul-bar-andaz hai khun-e-shohda ki lali
rang gardun ka zara dekh to unnabi hai
ye nikalte hue suraj ki ufuq-tabi hai
ummaten gulshan-e-hasti mein samar-chida bhi hain
aur mahrum-e-samar bhi hain khizan-dida bhi hain
saikdon nakhl hain kahida bhi baalida bhi hain
saikdon batn-e-chaman mein abhi poshida bhi hain
nakhl-e-islam namuna hai birau-mandi ka
phal hai ye saikdon sadiyon ki chaman-bandi ka
pak hai gard-e-watan se sar-e-daman tera
tu wo yusuf hai ki har misr hai kanan tera
qafila ho na sakega kabhi viran tera
ghair yak-bang-e-dara kuchh nahin saman tera
nakhl-e-shama asti o dar shola do-resha-e-tu
aaqibat-soz bawad saya-e-andesha-e-tu
tu na mit jaega iran ke mit jaane se
nashsha-e-mai ko talluq nahin paimane se
hai ayan yurish-e-tatar ke afsane se
pasban mil gae kabe ko sanam-khane se
kashti-e-haq ka zamane mein sahaara tu hai
asr-e-nau-raat hai dhundla sa sitara tu hai
hai jo hangama bapa yurish-e-bulghaari ka
ghafilon ke liye paigham hai bedari ka
tu samajhta hai ye saman hai dil-azari ka
imtihan hai tere isar ka khuddari ka
kyun hirasan hai sahil-e-faras-e-ada se
nur-e-haq bujh na sakega nafas-e-ada se
chashm-e-aqwam se makhfi hai haqiqat teri
hai abhi mahfil-e-hasti ko zarurat teri
zinda rakhti hai zamane ko hararat teri
kaukab-e-qismat-e-imkan hai khilafat teri
waqt-e-fursat hai kahan kaam abhi baqi hai
nur-e-tauhid ka itmam abhi baqi hai
misl-e-bu qaid hai ghunche mein pareshan ho ja
rakht-bar-dosh hawa-e-chamanistan ho ja
hai tunak-maya tu zarre se bayaban ho ja
naghma-e-mauj hai hangama-e-tufan ho ja
quwwat-e-ishq se har past ko baala kar de
dahr mein ism-e-mohammad se ujala kar de
ho na ye phul to bulbul ka tarannum bhi na ho
chaman-e-dahr mein kaliyon ka tabassum bhi na ho
ye na saqi ho to phir mai bhi na ho khum bhi na ho
bazm-e-tauhid bhi duniya mein na ho tum bhi na ho
khema-e-aflak ka istada isi nam se hai
nabz-e-hasti tapish-amada isi nam se hai
dasht mein daman-e-kohsar mein maidan mein hai
bahr mein mauj ki aaghosh mein tufan mein hai
chin ke shahr maraqash ke bayaban mein hai
aur poshida musalman ke iman mein hai
chashm-e-aqwam ye nazzara abad tak dekhe
rifat-e-shan-e-rafana-laka-zikrak dekhe
mardum-e-chashm-e-zamin yani wo kali duniya
wo tumhaare shohda palne wali duniya
garmi-e-mehr ki parwarda hilali duniya
ishq wale jise kahte hain bilali duniya
tapish-andoz hai is nam se pare ki tarah
ghota-zan nur mein hai aankh ke tare ki tarah
aql hai teri sipar ishq hai shamshir teri
mere darwesh khilafat hai jahangir teri
ma-siwa-allah ke liye aag hai takbir teri
tu musalman ho to taqdir hai tadbir teri
ki mohammad se wafa tu ne to hum tere hain
ye jahan chiz hai kya lauh-o-qalam tere hain