har ek maqam se aage guzar gaya mah-e-nau

By

har ek maqam se aage guzar gaya mah-e-nau
kamal kis ko mayassar hua hai be-tag-o-dau
nafas ke zor se wo ghuncha wa hua bhi to kya
jise nasib nahin aaftab ka partaw
nigah pak hai teri to pak hai dil bhi
ki dil ko haq ne kiya hai nigah ka pairaw
panap saka na khayaban mein lala-e-dil-soz
ki sazgar nahin ye jahan-e-gandum-o-jau
rahe na 'aibak' o 'ghauri' ke marke baqi
hamesha taza o shirin hai naghma-e-'khusrau'

har chiz hai mahw-e-KHud-numai

By

har chiz hai mahw-e-khud-numai
har zarra shahid-e-kibriyai
be-zauq-e-numud zindagi maut
tamir-e-khudi mein hai khudai
rai zor-e-khudi se parbat
parbat zof-e-khudi se rai
tare aawara o kam-amez
taqdir-e-wajud hai judai
ye pichhle pahar ka zard-ru chand
be-raaz o niyaz-e-ashnai
teri qindil hai tera dil
tu aap hai apni raushnai
ek tu hai ki haq hai is jahan mein
baqi hai numud-e-simyai
hain uqda-kusha ye khar-e-sahra
kam kar gila-e-barhana-pai

fitrat ne na baKHsha mujhe andesha-e-chaalak

By

fitrat ne na bakhsha mujhe andesha-e-chaalak
rakhti hai magar taqat-e-parwaz meri khak
wo khak ki hai jis ka junun saiqal-e-idrak
wo khak ki jibril ki hai jis se qaba chaak
wo khak ki parwa-e-nasheman nahin rakhti
chunti nahin pahna-e-chaman se khas o khashak
is khak ko allah ne bakhshe hain wo aansu
karti hai chamak jin ki sitaron ko araq-nak

faqr ke hain mojazat taj o sarir o sipah

By

faqr ke hain mojazat taj o sarir o sipah
faqr hai miron ka mir faqr hai shahon ka shah
ilm ka maqsud hai paki-e-aql o khirad
faqr ka maqsud hai iffat-e-qalb-o-nigah
ilm faqih o hakim faqr masih o kalim
ilm hai juya-e-rah faqr hai dana-e-rah
faqr maqam-e-nazar ilm maqam-e-khabar
faqr masti sawab ilm mein masti gunah
ilm ka maujud aur faqr ka maujud aur
ashhado an la ilah ashhado an la ilah
chadhti hai jab faqr ki san pe tegh-e-khudi
ek sipahi ki zarb karti hai kar-e-sipah
dil agar is khak mein zinda o bedar ho
teri nigah tod de aaina-e-mehr-o-mah

ejaz hai kisi ka ya gardish-e-zamana

By

ejaz hai kisi ka ya gardish-e-zamana
tuta hai asia mein sehr-e-firangiyana
tamir-e-ashiyan se main ne ye raaz paya
ahl-e-nawa ke haq mein bijli hai aashiyana
ye bandagi khudai wo bandagi gadai
ya banda-e-khuda ban ya banda-e-zamana
ghafil na ho khudi se kar apni pasbani
shayad kisi haram ka tu bhi hai aastana
ai la ilah ke waris baqi nahin hai tujh mein
guftar-e-dilbarana kirdar-e-qahirana
teri nigah se dil sinon mein kanpte the
khoya gaya hai tera jazb-e-qalandarana
raaz-e-haram se shayad 'iqbaal' ba-khabar hai
hain is ki guftugu ke andaz mahramana