dard aisa diya ehsas-e-wafa ne hum ko

dard aisa diya ehsas-e-wafa ne hum ko
na dawa ne hi shifa di na dua ne hum ko
ye to sahra ki hawaen hain gila kya un ka
khub jhulsaya hai gulshan ki saba ne hum ko
soz-e-afaq ka ehsas bhi hum ko na hua
itna behosh kiya teri ada ne hum ko
dur hota hi gaya chehra-e-manzil hum se
rah dikhlai hai wo rah-numa ne hum ko
dekhti hi rahi ye aql tamasha-e-junun
jab bhi majbur kiya ahd-e-wafa hum ko
zulf-e-idrak chhupati rukh-e-hasti kab tak
aakhirash tham liya dast-e-faza ne hum ko
dubi kashti jo hamari lab-e-sahil 'khalid'
na-khuda ne nahin dekha ki khuda ne hum ko

ghar apna wadi-e-barq-o-sharar mein rakkha jae

ghar apna wadi-e-barq-o-sharar mein rakkha jae
talluqat ka sauda na sar mein rakkha jae
agar talab ho kabhi chand ghunt pani ki
samundaron ka tasawwur nazar mein rakkha jae
suna hai dukhtar-e-tahzib ghar se bhag gai
chhupa ke bachchon ko hargiz na ghar mein rakkha jae
pata nahin ki kahan rah-zanon ki ho yalghaar
koi difaa bhi rakht-e-safar mein rakkha jae
batao kaise milegi hamein sahih tabir
jab apna khwab hi chashm-e-digar mein rakkha jae
lo ab to hum bhi hawaon ke sath chalne lage
hamara nam bhi ahl-e-hunar mein rakkha jae
kitab zist mein bab-e-alam bhi ho mahfuz
siyah-raat ka manzar sahar mein rakkha jae
qafas ko le ke jo uda jae gulistan ki taraf
wo azm tair-e-be-baal-o-par mein rakkha jae