zamin jaise ki aatish-fishan ko sath liye

zamin jaise ki aatish-fishan ko sath liye
yun ji raha hun main dard-e-nihan ko sath liye
hua shikar siyasat ka ab ke mausam bhi
bahaar aai hai lekin khizan ko sath liye
ruko to yun ki thahar jae gardish-e-dauran
chalo to aise ki sare jahan ko sath liye
nafas nafas hain ujale hazar karb liye
har ek raat hai ek dastan ko sath liye
kise zamin ke masail ki fikr ho 'khalid'
har ek nazar hai yahan aasman ko sath liye

sain apne nafas ko humne yun hi nahin nakaam kiya

sain apne nafas ko hum ne yun hi nahin nakaam kiya
umr guzari dar-ba-dari mein kab kis ja aaram kiya
ghair to aakhir ghair hain yaro kya sochen ab kis ke tain
hum ne kaun jagah apne ko paband-e-ahkaam kiya
ahl-e-khirad ne jashn-e-bahaaran yun bhi manaya ab ke baras
jaib-o-gareban chaak kiye aur diwanon mein nam kiya
har dar pe ek bang lagawen bhala karo bas bhala karo
ek hi shikwa ek hi nala subh kiya aur sham kiya
unche unche mahlon se kya gharaz hai hum banjaron ko
thandi chhaya dekh ke khud ko kabhi na zer-e-baam kiya
main hi tha ek aankh na bhaon wo to ab bhi yar hain tere
jin logon ne tera charcha bazaron mein aam kiya
dukh na pahuncha kisi ko baba tere 'khalid' se
un ne to sau bar khushi ko gham ke ewaz nilam kiya

rah-e-hasti ke har ek moD se bach kar nikle

rah-e-hasti ke har ek mod se bach kar nikle
ahl-e-danish se to diwane hi behtar nikle
waqt ki tez hawaon ne ajab mod liya
phul se hath jo the un mein bhi patthar nikle
teri yaadon ke sahaare jo guzare hum ne
wo hi lamhat faqat apna muqaddar nikle
hum ne ghairon ke bhi ashkon ko liya daman par
chahe khud gham ke samundar mein naha kar nikle
un ki fariyaad ka aahon ka asar hoga
apne hathon se jo ghar apna jala kar nikle
gham zamane ki jafaon ka karen kya 'khalid'
jab gareban hi kanton se saja kar nikle

nigah-e-shauq ko jab tera naqsh-e-pa na mila

nigah-e-shauq ko jab tera naqsh-e-pa na mila
mujhe bhi husn-e-haqiqat ka aaina na mila
jise bhi dekho wahi ajnabi sa lagta hai
tumhaare shahr mein koi bhi aashna na mila
hudud-e-dair-o-kalisa mein khanqahon mein
bahut talash kiya hum ko parsa na mila
tadapte rah gae din mein bhi raushni ke liye
charagh bechne walon ko mashla na mila
hamare dars pe ghairon ne pa liya sahil
hamare apne safine ko nakhuda na mila
sukun milega unhen kis ke aastane par
wo ahl-e-dard jinhen tera aasra na mila
mata-e-dil wo meri lutne chala tha magar
ye aur baat ki rahzan ko hausla na mila
meri wafaon pe ilzam to bahut aae
meri wafaon ka mujh ko magar sila na mila
wafa ke tazkire hum ne bahut sune 'khalid'
magar jahan mein koi hum ko ba-wafa na mila

kuchh sochon ke kuchh fikron ke kuchh the ehsasat ke nam

kuchh sochon ke kuchh fikron ke kuchh the ehsasat ke nam
jitne bhi patthar aae sab aaina-e-jazbaat ke nam
un ki nigahen be-parwa hain kuchh bhi nahin jazbaat ke nam
waqf kiye hain jin logon ne din ke ujale raat ke nam
tapte hue sahra mein jaise shabnam ki be-rang numud
jaane kitne khat likkhe hain main ne bhi barsat ke nam
waqt ke honton pe raqsan hain masti ka ek rag liye
subh-e-qayamat ke hangame husn-e-maujudat ke nam
mauj-e-sukun ke sath mile zanjir-e-alam be-tabi-e-dil
hum ne kitni daulat pai ulfat ki saughat ke nam
un ki tamanna meri koshish baham wade aur qasmen
kuchh meri taqdir ke sadqe baqi sab haalat ke nam
saji hui hai adab ki mahfil haal ke aise naghmon se
be-maqsad be-kaif kitaben husn-e-takhliqat ke nam
hasrat-o-arman bazm-e-tasawwur daman-e-sahra dast-e-junun
khushiyon ke paigham hain 'khalid' gham ke hasin lamhat ke nam

hai meri zist tere gham se farozan jaanan

hai meri zist tere gham se farozan jaanan
kaun kahta hai mujhe be-sar-o-saman jaanan
teri yaaden mere hamrah ba-har-gam hain jab
main ne samjha hi nahin khud ko pareshan jaanan
nabz-e-ehsas bahut sust hui jati hai
dil ko darkar hai phir dard ka paikan jaanan
hanste hanste nazar aate the jahan ghuncha-o-gul
viran viran sa lage hai wo gulistan jaanan
ab na wo soz na wo saz hai dil mein phir bhi
ek aawaz si aati hai ki jaanan jaanan
zikr-e-mazi se gurezan hun ye sach hai lekin
yaad hai aaj bhi mujh ko tera paiman jaanan
itni tanhai ka ehsas musalsal ho agar
apne sae se bhi dar jata hai insan jaanan
tere hathon ki wo mehndi wo tera surkh libas
is tasawwur se bhi dil hai mera larzan jaanan
ek muddat hui go ahd-e-bahaaran guzre
chaak hai aaj talak mera gareban jaanan
main tujhe bhul na paya to ye chahat hai meri
yaad rakkha hai jo tu ne tera ehsan jaanan
aaj 'khalid' ke khayalat ki har rahguzar
hai tere husn ke partaw se charaghan jaanan