nelson mandela

By

ye barr-e-azam ki sari balaen
suna hai ki ab muntashir ho rahi hain
falak-bos tahzib ke cactus jhonpadon ki riwayat ko das rahe hain
magar
kam nahin ye ki apni zamin aur apni faza mein
siyah paikaron ki do-dhaari ana aur aahan iradon ne
apne liye ab nae tewaron ke ujale tarashe
andheri zaminon se mere nikale
khat-e-ustuwa ke ghane jangalon ki amal-dariyon mein hain dipak jalae
qabilon ki har bahami jang ko shakh-e-zaitun ke zamzame hain sunae
dahakte hue reg-zaron ke niche
siyah zar ke chashmon ko mahmez di hai
ye tahrik ye inqalab sare
nelson madela
tumhaari ragon mein naya khun shab-o-roz pahuncha rahe hain
tumhaari hatheli ko suraj mein tabdil karne lage hain
tumhaari nazar mein bhare manzaron ki dhanak bo rahe hain
salakhon ke pichhe akele nahin tum
siyah barr-e-azam tumhaari jilau mein
nahin
sari duniya tumhaari jilau mein

babul ke daraKHt se kaho

By

babul ke darakht se kaho
abhi masham-e-jaan mein har singhaar ki shaguftagi
bade hi inhimak se bahaar-pash hai yahan
jo mud ke dekhta hun adh-jale gulab ka badan
shahadaton ke ramz par singhaar bhi luta gaya
jo mud ke dekhta hun fakhta ka ahmarin lahu
jabin-e-jaur ki sabhi runaten mita gaya
mere khilaf sazishon ka ye muhib silsila
meri ana ke bankpan mein dafatan sama gaya
chinar ke darakht se hai nariyal ke ped tak
rawan dawan hamari khushbuon ka shokh silsila
kabutaron ke ghol ki phaban hiran ki chaukdi
hawa ke dosh-e-maghzar ko dulhan bana gai
abhi meri zamin ki fazaen subh-e-fam hain
dhuen ke nag se kaho
badi hi sakht-jaan hain hamari wadiyon mein rang-o-nur ki latafaten
samundaron ki sipiyon se pokharon ki ghoghiyon ne
baiaton ke waste sipurd kab kiya hai ghairaton ke lala-zar ko
abhi hisar-e-sang mein kanwal ke phul hain khile
zaban-e-reg-e-surkh se kaho
hamare panw jal gae to kya hua
bahaar-e-sabz ke liye zamin to aaj mil gai

yudhishthir

By

abhi chid ke jangalon se guzarna bahut jaan-faza hai
kai mil ke baad barfile tudon ka sahra milega
jahan sard purwaiyon ke thapede thirakte milenge
umudi dhalanon ka ek silsila bhi milega achanak
jise par karne ki dhun mein tumhein apne sab sathiyon ko galana padega
hasin daraupadi aur tumhaare jari bhaiyon ki jamaat
inhin barf-zaron ka hissa banegi
magar ye bhi hoga yudhishthir! tumhaara wafadar kutta
tumhaare aqab mein ba-sad-shauq har waqt chalta rahega
mukhalif faza mein tumhaari hi dhadkan ka hissa rahega
use yakh jahannam nahin chhu sakega
tumhaare jari bhaiyon ki wajahat tumhaari hasin daraupadi ki malahat
tumhaare wafadar kutte ke aage pashiman rahegi

sukhi Tahni par hariyal

By

ham-chashmon ke ghol magan hain shakhon par
khush-raftar hawaen pankhe jhalti hain
gular ke kachche phal bhi har jaanib hain
mithe pani wali jhil hai pahlu mein
mausam ki shatranji chaalen anqa hain
koi shikari bhi is samt nahin aata
hare-bhare jangal ki mushfiq banhon mein
raat gae jaane kya barsa hai dil par
alag-thalag bargad ki sukhi tahni par
hariyal pankh bichhae gum-sum baitha hai

mujhe KHabar hai mujhe yaqin hai

By

mujhe khabar hai
ye aabnusi chattan jo dub ke sabz takhte pe aa giri hai
nai subuk narm pattiyon ka singhaar pi kar
sunahre lamhon ki sans mein phans ban kar atak gai hai
mujhe yaqin hai
ki mausamon ke tilism ye tirgi uda kar
isi sulagti chattan par dub ki sabz zulfen bikher denge
mujhe yaqin hai
mere kate bazuon ki taqat meri ragon se nahin gai hai
mere lahu ke ye surkh dhaare nai hikayat ke pesh-rau hain
nai umangon nae ujalon nae shafaq-zar ke amin hain
mujhe khabar hai
ki ghol chidiyon ke lashkar-e-abrha ki ab kuchh khabar na lenge
hamari aankhon mein raushni hai magar dilon mein siyahiyan hain
udasiyon ke ghane dhuwen mein chhupi hui kaamraniyan hain
mujhe yaqin hai
ki is faza mein faraaz-e-sahra-e-be-aman hain
hazaron masum ediyan ragad chuke hain ragad rahe hain
ubal padega zarur koi hayat-afroz aab-e-shirin
sadaqaton ke bahaar-zaron ko aakhirash tazgi milegi
mujhe khabar hai mujhe yaqin hai

imbisat-e-azli

By

unchi nichi dub par lahraata hua kala nag
jhil ke banhon se phutta hua jwalamukhi
rang-birange panchhi ko panjon mein dabae hue baz
chattanon ke pichhe murda jaanwar ki saf-o-shaffaf thithuri par
bhagte hue siyah chuhon ki qatar
chandni raat mein machhli par jhapatta hua ud-bilaw
patinge ko pakadne ke liye lapakti hui chhipkili
surmai sham ke malgaje aakash par chadhti hui aandhi
ye sare manazir maha-nagar ke ek kamre mein
wideo par dekh raha hun
aur
ahd-e-hajar ke apne buzurgon ke fitri khauf-o-tajassus se bhare hue
imbisat ko apni ragon se
sargoshiyan karte hue pa raha hun