nelson mandela

By

ye barr-e-azam ki sari balaen
suna hai ki ab muntashir ho rahi hain
falak-bos tahzib ke cactus jhonpadon ki riwayat ko das rahe hain
magar
kam nahin ye ki apni zamin aur apni faza mein
siyah paikaron ki do-dhaari ana aur aahan iradon ne
apne liye ab nae tewaron ke ujale tarashe
andheri zaminon se mere nikale
khat-e-ustuwa ke ghane jangalon ki amal-dariyon mein hain dipak jalae
qabilon ki har bahami jang ko shakh-e-zaitun ke zamzame hain sunae
dahakte hue reg-zaron ke niche
siyah zar ke chashmon ko mahmez di hai
ye tahrik ye inqalab sare
nelson madela
tumhaari ragon mein naya khun shab-o-roz pahuncha rahe hain
tumhaari hatheli ko suraj mein tabdil karne lage hain
tumhaari nazar mein bhare manzaron ki dhanak bo rahe hain
salakhon ke pichhe akele nahin tum
siyah barr-e-azam tumhaari jilau mein
nahin
sari duniya tumhaari jilau mein

babul ke daraKHt se kaho

By

babul ke darakht se kaho
abhi masham-e-jaan mein har singhaar ki shaguftagi
bade hi inhimak se bahaar-pash hai yahan
jo mud ke dekhta hun adh-jale gulab ka badan
shahadaton ke ramz par singhaar bhi luta gaya
jo mud ke dekhta hun fakhta ka ahmarin lahu
jabin-e-jaur ki sabhi runaten mita gaya
mere khilaf sazishon ka ye muhib silsila
meri ana ke bankpan mein dafatan sama gaya
chinar ke darakht se hai nariyal ke ped tak
rawan dawan hamari khushbuon ka shokh silsila
kabutaron ke ghol ki phaban hiran ki chaukdi
hawa ke dosh-e-maghzar ko dulhan bana gai
abhi meri zamin ki fazaen subh-e-fam hain
dhuen ke nag se kaho
badi hi sakht-jaan hain hamari wadiyon mein rang-o-nur ki latafaten
samundaron ki sipiyon se pokharon ki ghoghiyon ne
baiaton ke waste sipurd kab kiya hai ghairaton ke lala-zar ko
abhi hisar-e-sang mein kanwal ke phul hain khile
zaban-e-reg-e-surkh se kaho
hamare panw jal gae to kya hua
bahaar-e-sabz ke liye zamin to aaj mil gai

ab qabile ki riwayat hai bikharne wali

By

ab qabile ki riwayat hai bikharne wali
har nazar khud mein koi shahr hai bharne wali
khush-gumani ye hui sukh gaya jab dariya
ret se ab meri kashti hai ubharne wali
khushbuon ke nae jhonke hain har ek dhadkan mein
kaun si rut hai mere dil mein thaharne wali
kuchh parinde hain magan mausami parwazon mein
ek aandhi hai par-o-baal katarne wali
hum bhi ab sikh gae sabz pasine ki zaban
sang-zaron ki jabinen hain sanwarne wali
tez dhun par the sabhi raqs mein kyun kar sunte
chand lamhon mein balaen thin utarne wali
bas usi waqt kai jwala-mukhi phut pade
motiyon se meri har naw thi bharne wali
dhak liya chand ke chehre ko siyah baadal ne
chandni thi mere aangan mein utarne wali
dafatan tut pade chand bagule 'amabar'
khushbuen thin meri basti se guzarne wali