kis ke chamke chand se ruKHsar qiasar-bagh mein

By

kis ke chamke chand se rukhsar qiasar-bagh mein
chandni hai saya-e-diwar qiasar-bagh mein
fil-haqiqat ye bhi kam gulzar-e-jannat se nahin
huren phirti hain sar-e-bazar qiasar-bagh mein
panw ka yan zikr kaisa saf hai aisi zamin
dil phisalte hain dam-e-raftar qiasar-bagh mein
zer-e-shakh-e-gul agar sabza kabhi sone laga
shor-e-bulbul ne kiya bedar qiasar-bagh mein
itne patte bhi na honge gulshan-e-firdaus mein
jis qadar phulon ke hain ambar qiasar-bagh mein
tishnigan-e-shauq hain shirin-labon ke mehman
bat raha hai sharbat-e-didar qiasar-bagh mein
qatre shabnam ke rag-e-gul par dikhate hain bahaar
gundh rahe hain motiyon ke haar qiasar-bagh mein
saya-e-baal-e-huma kya dhundhta hai ai 'amir'
baith zer-e-saya-e-diwar qiasar-bagh mein

hua jo paiwand main zamin ka to dil hua shad mujh hazin ka

By

hua jo paiwand main zamin ka to dil hua shad mujh hazin ka
bas ab irada nahin kahin ka ki rahne wala hun main yahin ka
qarib hai yaro roz-e-mahshar chhupega kushton ka khun kyunkar
jo chup rahegi zaban-e-khanjar lahu pukarega aastin ka
ajab muraqqa hai bagh-e-duniya ki jis ka sanea nahin huwaida
hazar-ha suraten hain paida pata nahin surat-afrin ka
hawa-e-mai mein hun mahw aisa chaman mein ghir kar jo abr aaya
siyah-masti mein main ye samjha jahaz hai aab-e-atashin ka
'amir' dekha jo us ka naqsh to naqsh yusuf ka dil se utra
ki naqsh-e-sani ke aage hota farogh kya naqsh-e-awwalin ka

dil ko tarz-e-nigah-e-yar jatate aae

By

dil ko tarz-e-nigah-e-yar jatate aae
tir bhi aae to be-par ki udate aae
baadshahon ka hai darbar dar-e-pir-e-mughan
saikdon jate gae saikdon aate aae
chhup ke bhi aae mere ghar to wo darbanon ko
apni pazeb ki jhankar sunate aae
roz-e-mahshar jo bulae gae diwana-e-zulf
bediyan pahne hue shor machate aae
kya kahenge koi mahshar mein jo puchhega 'amir'
kyun na bigdi hui baaton ko banate aae

dil juda mal juda jaan juda lete hain

By

dil juda mal juda jaan juda lete hain
apne sab kaam bigad kar wo bana lete hain
ho hi rahta hai kisi but ka nazara ta-sham
subh ko uth ke jo hum nam-e-khuda lete hain
majlis-e-waz mein jab baithte hain hum mai-kash
dukhtar-e-raz ko bhi pahlu mein bitha lete hain
aise bose ke ewaz mangte hain dil kya khub
ji mein sochen to wo kya dete hain kya lete hain
apni mahfil se uthae hain abas hum ko huzur
chupke baithe hain alag aap ka kya lete hain
but bhi kya chiz hain allah salamat rakkhe
galiyan de ke gharibon ki dua lete hain
shakh-e-marjaan mein jawahar nazar aate hain 'amir'
kabhi ungli jo wo danton mein daba lete hain