sola december

By

tu ilm-o-hunar se khaif hai
tu raushniyon se darta hai
o amn ke ghaarat-gar dushman
tu us din se bhi dar dushman
jab tujh ko tere apne hi
bachchon ka dushman kar dunga
talim se raushan kar dunga

visal ki tisri samt

By

mazarat chahta hun dost
main ab intizar nahin karta
balki khud chal padta hun apni taraf
ek poshida chap ke taaqub mein
khud se bahar nikalta hun
aur apne hi jaise kisi hujum ka hissa ban kar
apne wajud par iktifa karta hun
apni amiq raushni se naya janm lete hue
khud ki bunat mein bejod hone ki kawish
raegan nahin jati
suno!
samay ke bhed-bhao mein apna takhmina lagate hue
zat ki jama-punji mein se
main tumhein apni hissiyat se mustarad nahin karta
bisat bhar sabr aur ek mutthi visal ke ewaz
main tumhein kashid karta hun apne atraf se
aur gunjaish paida karta hun tumhaari mezbani ke liye
kisi aur jihat se apne-ap mein
lekin mazarat
main intizar nahin kar sakta
apni ragon mein bahte hue us dukh ke pighalne ka
jo apne bahaw mein meri tawajjoh baha le ja sakta hai
apne sath
main tai-shuda guzargahon ka musafir nahin
mujhe to har imkan se guzar kar aana hai tumhaari samt
aur han
main to apna bhi intizar nahin karta hun ab!!!

TuTe hue pyale

By

main khuda ke hathon se gir kar tuta hua pyala hun
(jo apne bikhre hue tukdon ko
dhundhta phirta hai)
kabhi kabhi (bahut kabhi kabhi)
koi tukda mil kar apni tuti hui jagah se jod banata hai
to azali taskin aur abadi sarshaari ka ehsas milta hai
jaise ki tum!
han payare! jaise tum milte ho to kuchh aisa hi lagta hai
jaise main thoda mukammal ho gaya hun
jaise main phir se apne chaak par aa gaya hun
takmil ki is masafat mein
ek sawal bund bund mujh se rista hai
itni badi kaenat mein
tute hue pyale ke tukde kahan kahan
bikhre pade hain
kya khabar, kab hum apne baqi-manda tukdon ko pa saken
jaane kab hamein azali taskin mil sake
aur jaane kab khuda ki pyas bujhe
han pyare!
hum khuda ke hathon se gir ke tute hue
pyale hain!!!

tanhai ka safarnama

By

sham hote hi ghar mujh se chhota pad jata hai
main raston ki bad-dua par nikla hun
jahan aankhon ko chehre kamane se fursat nahin
lagta hai tanhai mujh se ub gai hai
sansen maili ho rahi thin
mitti ne mujhe phul bana diya
khushbu hawa ki dost ho jae
to be-range log rang rang ki baaten
karte hi hain
(wo khwah kitne bhi chhote ho jaen
achchha mausam in par kabhi pura nahin aata)
bad-zabanon ko malum nahin
uryani sirf aankhon par jachti hai
main zamin par gira hua chand hun
qadmon se pahle diwar mujhe phalang rahi hai
munder par dhara charagh mujh se ziyaada raushan hai!
main bhi to main hun
ek gunah ke ewaz apna sari nekiyan
kharch kar baithta hun
khamoshi ke khali badan mein
koi dhun mujhe gungunati rahti hai
udasi aur kahan rahe
kash khuda mujhe dekh raha ho!

taKHliq ki saaton mein

By

kuchh kahun to dam ghutta hai
aur khamoshi mujhe andar se katti hai
khayalat par lafzon ke pahnawe
pure nahin aate
kaghazon par dukh utarna bhi to dukh ki baat hai
nazmen mujhe khali kar deti hain
ye shairi to mujhe uryan kar degi!
main aur kitne chehre pahnun
binai ke jamghate mein
bar bar khud se bichhad jata hun
so main ne apni yaad-dasht mein ek
tanhai takhliq ki
taki us mein baith kar mujhe khud ko dohrane
ka mauqa milta rahe
fursat ne mujhe thaka diya tha
shukr hai! main apne kisi kaam to aaya!

sargoshi

By

raat par nigah rahe!
ye hamare sae churane aai hai
magar charagh ki lau kis khauf se kanp rahi hai?
aao use apne lams ka hausla den
warna badan to hamare lams basi kar dete hain
un hun
kapde nahin, badan utar kar aao
dekhun to
meri ruh par tumhaara badan pura bhi aata hai?