gham ki garmi se dil pighalte rahe

By

gham ki garmi se dil pighalte rahe
tajrabe aansuon mein dhalte rahe
ek lamhe ko tum mile the magar
umr bhar dil ko hum masalte rahe
subh ke dar se aankh lag na saki
raat bhar karwaten badalte rahe
zahr tha zindagi ke kuze mein
jaante the magar nigalte rahe
dil raha sarkhushi se begana
garche arman bahut nikalte rahe
apna azm-e-safar na tha apna
hukm milta raha to chalte rahe
zindagi sarkhushi junun wahshat
maut ke nam kyun badalte rahe
ho gae jin pe karwan pamal
sab unhi raston pe chalte rahe
dil hi gar bais-e-halakat tha
rukh hawaon ke kyun badalte rahe
ho gae khamushi se hum rukhsat
sare ahbab hath malte rahe
har khushi 'arsh' wajh-e-dard bani
farsh-e-shabnam pe panw jalte rahe

sang-e-dar us ka har ek dar pe laga milta hai

By

sang-e-dar us ka har ek dar pe laga milta hai
dil ko aawara-mizaji ka maza milta hai
jo bhi gul hai wo kisi pairhan-e-gul par hai
jo bhi kanta hai kisi dil mein chubha milta hai
shauq wo dam ki jo rukhsat-e-parwaz na de
dil wo tair ki use yun bhi maza milta hai
wo jo baithe hain bane naseh-e-mushfiq sar par
koi puchhe to bhala aap ko kya milta hai
hum ki mayus nahin hain unhen pa hi lenge
log kahte hain ki dhunde se khuda milta hai
dam-e-tazwir na ho shauq gulu-gir na ho
mai-kada 'arsh' hamein aaj khula milta hai

band aankhon se na husn-e-shab ka andaza laga

By

band aankhon se na husn-e-shab ka andaza laga
mahmil-e-dil se nikal sar ko hawa taza laga
dekh rah jae na tu khwahish ke gumbad mein asir
ghar banata hai to sab se pahle darwaza laga
han samundar mein utar lekin ubharne ki bhi soch
dubne se pahle gahrai ka andaza laga
har taraf se aaega teri sadaon ka jawab
chup ke changul se nikal aur ek aawaza laga
sar utha kar chalne ki ab yaad bhi baqi nahin
mere jhukne se meri zillat ka andaza laga
lafz mani se gurezan hain to un mein rang bhar
chehra hai be-nur to us par koi ghaza laga
aaj phir wo aate aate rah gaya aur aaj phir
sar-ba-sar bikhra hua hasti ka shiraaza laga
rahm kha kar 'arsh' us ne is taraf dekha magar
ye bhi dil de baithne ka mujh ko khamyaza laga