yunhi umr-bhar tere rang-o-bu se mere lahu ki wafa rahe

yunhi umr-bhar tere rang-o-bu se mere lahu ki wafa rahe
main charagh ban ke jala karun to gulab ban ke khila rahe
wo zamin ho ki ho aasman ye diya hamesha jala rahe
main kisi safar mein rahun magar mere sath man ki dua rahe
meri kamtari ki bisat hi teri bartari ki dalil hai
main nasheb mein na rahun agar tu faraaz tera daba rahe
nae zakhm hain nai konplen abhi dil pe gham ki bahaar hai
ye dua karo ki khizan mein bhi ye darakht yunhi hara rahe

wahshi ishq-e-junun kam bhi nahin karta hai

wahshi ishq-e-junun kam bhi nahin karta hai
aur yun bhi hai ki ab ram bhi nahin karta hai
tod bhi leta hai wo rabt-e-inayat hum se
rishta-e-dard ko mohkam bhi nahin karta hai
us ka shikwa nahin kar sakte ki wo dil ke tain
khush nahin karta to barham bhi nahin karta hai
mujhe diwar-e-ana se wo giraata bhi nahin
aur uncha mera parcham bhi nahin karta hai
tabr-o-tegh hamari bhi dhari hai kab se
chhed muddat hui aalam bhi nahin karta hai

udas raat ko mahkaen koi chaara karen

udas raat ko mahkaen koi chaara karen
khayal-e-yar ko khushbu ka istiara karen
bala ki tirgi hai chashm-e-mah ko sochen
shua-e-khwab tarah-dar ko sitara karen
mahak ruton ki bulae tasarrufon ki taraf
katile tar magar aur hi ishaara karen
khizan ke din kisi pile pahad jaise din
shaguft gul teri ummid par guzara karen
hamare ishq ke surkhab par wo itrae
hawas-jaan mein hum us ki nazar utara karen
tera hi nam nikalta hai har tariqe se
kisi bhi tarah mohabbat ka istikhara karen
ye dasht-o-khar ye shahr-o-gulab sab tere
shabana rose tere lutf ko nihaara karen

tamam shahr ki aankhon ka mahtab hua

tamam shahr ki aankhon ka mahtab hua
main jab se us ki nigahon mein intikhab hua
hawa ke kandhon ne pahunchaya aasmanon tak
main barg-e-sabz tha sukha to aaftab hua
palat ke dekhun to mujh ko sazaen deta hai
ajab sitara rah-e-gham mein ham-rikab hua
yun qaus-e-chashm mein aaya wo barishon ki tarah
ki harf-e-did kai rangon ki kitab hua
pighal ke aa gai sari udasi lafzon mein
wufur-e-gham mere aaine mein habab hua
main apni khwahishen gum kar ke mil gaya us ko
khusha wo meri mohabbat mein kaamyab hua

qadmon ko Thaharne ka hunar hi nahin aaya

qadmon ko thaharne ka hunar hi nahin aaya
sab manzilen sar ho gain ghar hi nahin aaya
thi tegh usi hath mein qatil bhi wahi tha
jo hath ki maqtal mein nazar hi nahin aaya
ghar khod diya sara khazane ki hawas mein
niw aa gai tah-khane ka dar hi nahin aaya
kya shakhon pe itraiye kya kije gulon ka
pedon pe agar koi samar hi nahin aaya
sau khauf zamane ke simat aae hain dil mein
bas ek khuda-pak ka dar hi nahin aaya

nazar mein sulh bhi sar par lahu bhi dekhta hai

nazar mein sulh bhi sar par lahu bhi dekhta hai
mujhe to rashk se mera adu bhi dekhta hai
main shorishon mein bhi dil ko qarib rakhta hun
yahi to hai jo pas-e-haw-hu bhi dekhta hai
charagh unhin ki wisatat se jal raha hai magar
kabhi hawaon ko ye tund-khu bhi dekhta hai
mujhe ye moti samundar yun hi nahin deta
wo mere hausle bhi justuju bhi dekhta hai
ye dil asir tere naqsh-e-pa ka hai lekin
jo chuk jae to phir chaar-su bhi dekhta hai
mere junun ko donon aziz hain jaanan
ye dasht-o-dar hi nahin aabju bhi dekhta hai
hazar barg-o-samar jama ho gae 'arshad'
magar ye dil ki maal-e-numu bhi dekhta hai