yun to bahut hasin hai bahaar-e-chaman ki yaad

By

yun to bahut hasin hai bahaar-e-chaman ki yaad
dil par magar hai naqsh isi anjuman ki yaad
hum khud gham-e-hayat se sina-figar hain
ai dosto dilao na us gul-badan ki yaad
is intha-e-talkhi-e-dauran ke bawajud
taza hai aaj bhi kisi shirin-dahan ki yaad
phir ji mein hai ki khaiye koi naya fareb
phir aa rahi hai ek but-e-wada-shikan ki yaad
rangin baadalon ke ye tukde ye chandni
aksar dila gae hain tere bankpan ki yaad
uljhan gham-e-hayat ki kuchh aur badh gai
aai hai jab bhi zulf shikan-dar-shikan ki yaad
'arshad' dayar-e-ghair mein sab kuchh luta ke hum
dil se lagae phirte hain apne watan ki yaad

tere baghair gul-o-nastaran pe kya guzri

By

tere baghair gul-o-nastaran pe kya guzri
na puchh ab ke bahaar-e-chaman pe kya guzri
maal-e-jurat-e-mansur kuchh sahi lekin
sawal ye hai ki dar-o-rasan pe kya guzri
hamin to hain ki jo barq-o-sharar se khele hain
hamin se puchh rahe ho chaman pe kya guzri
qafas mein aaj ye kaise charagh raushan hain
ilahi khair na jaane chaman pe kya guzri
pahunch ke manzil-e-maqsad pe ye bhi sochenge
ki shab-rawi mein dil-e-rahzan pe kya guzri
mujhe shikast-e-nasheman ka gham nahin lekin
ye sochta hun ki ahl-e-chaman pe kya guzri
taraqqiyan to zamane ne kin bahut 'arshad'
magar batao to arbab-e-fan pe kya guzri

sitam ke mare lahu mein Dube hue nazaron ka kya karunga

By

sitam ke mare lahu mein dube hue nazaron ka kya karunga
sisakte ghuncho tumhin batao main in bahaaron ka kya karunga
jinhen bharosa ho aasman par wo aasman se panah mangen
main apne zarron se mutmain hun main chand-taron ka kya karunga
agar mujhe de sake zamana to kuchh nae zakhm aur de de
main ghamgusaron ko jaanta hun main ghamgusaron ka kya karunga
hain sham-e-ghurbat ki tirgi mein mujhe mere ashk hi ghanimat
ho jin ki qismat mein khud hi gardish main un sitaron ka kya karunga
main khud hi tufan hun apna sahil nikal lunga yahin kahin se
jahan safine bhi dub jaen main un kinaron ka kya karunga
tumhaare dair-o-haram ke jalwe tumhein mubarak tumhin sambhaalo
mujhe haqiqat ki justuju hai main khwab-zaron ka kya karunga
abhi to daman-e-ghuncha-o-gul se lunga main intiqam 'arshad'
abhi junun mo'atabar nahin hai abhi bahaaron ka kya karunga

sarishk-e-gham simaT kar dil ke armanon ko le Dube

By

sarishk-e-gham simat kar dil ke armanon ko le dube
ye sahab-khana apne sath mehmanon ko le dube
dikha kar khwab-e-khush-ainda firdaus-khayali ke
nae shaddad hum masum insanon ko le dube
banate rah gae tanzim-e-nau ke barahman khake
buton ke hausle tab tak sanam-khanon ko le dube
na jaane kah diya shabnam ne kya aankhon hi aankhon mein
ki ghunche thartharae aur gulistanon ko le dube
khumar-e-chashm-e-saqi is qadar tauba-shikan tauba
ye do saghar na jaane kitne paimanon ko le dube
sahar hone se pahle aisi ek angdai ai saqi
jo paimanon se ubhre aur mai-khanon ko le dube
fazaon ko umid-e-rang-o-bu thi jin se ai 'arshad'
wo ghunche aaj khilte hi gulistanon ko le dube

main pursish-e-gham-e-furqat ki dad deta hun

By

main pursish-e-gham-e-furqat ki dad deta hun
teri latif nadamat ki dad deta hun
malal-e-tark-e-marasim to kuchh nahin lekin
is ehtiyat-e-mohabbat ki dad deta hun
kahan bahisht kahan zindagi magar naseh
main tere husn-e-aqidat ki dad deta hun
tabahiyan bhi mohabbat ko ras aa na sakin
sitam-zarifi-e-fitrat ki dad deta hun
o muskura ke nigahon ko pherne wale
main tere azm-e-baghawat ki dad deta hun
mere khulus ko lafzon se napne walo
tumhaare husn-e-basirat ki dad deta hun
kisi se sunta hun jab dushmani ka zikr 'arshad'
to doston ki inayat ki dad deta hun

kitne saqi ma-e-gulfam liye phirte hain

By

kitne saqi ma-e-gulfam liye phirte hain
aur hum hain ki tahi-jam liye phirte hain
umr guzri ke tabassum ki tarah honton par
talkhi-e-gardish-e-ayyam liye phirte hain
tazkire hain ye chaman mein ki sabhi lala-o-gul
nikhat-e-ariz-e-gulfam liye phirte hain
sharm ai husn-e-jafa-pesha ki kuche mein tere
aaj tak hum dil-e-nakaam liye phirte hain
jaane kya dekha hai un shokh nigahon mein ki hum
apne sar muft ka ilzam liye phirte hain
jab se hum ne tere kuche se guzarna chhoda
nama-bar shahr mein paigham liye phirte hain
kya karenge wo meri raaton ko raushan 'arshad'
rukh pe jo zulf-e-siyah-fam liye phirte hain