KHwab aankhon mein nahin dil mein tamanna bhi nahin

By

khwab aankhon mein nahin dil mein tamanna bhi nahin
ishq mayus hua ho magar aisa bhi nahin
un ki ulfat mein uthae hain hazaron ilzam
aaj tak aankh utha kar jinhen dekha bhi nahin
rah-e-hasti mein nigahen to bhatak sakti hain
dil bhatak jae magar itna andhera bhi nahin
badh ke aae the kai gham pae taskin lekin
gham-e-dauran ke muqabil koi thahra bhi nahin
sharam ai baada-gusaron ki bhari mahfil mein
badh ke khud jam utha le koi aisa bhi nahin
kya tamasha hai ki aae hain tasalli dene
wo jinhen dard-shanasi ka saliqa bhi nahin
har nazar sath-e-tabassum pe thahar jati hai
kya zamane mein koi gham ka shanasa bhi nahin
lakh nazuk sahi ummid ka rishta lekin
dil ko ehsas ki tauhin gawara bhi nahin
zindagi ko nae khwabon se saja kar lao
ye tabassum to mere gham ka mudawa bhi nahin
hadse ho chuke 'arshad' gham-e-ulfat ke tamam
ab to shayad dil-e-mayus tadapta bhi nahin

inqilab-e-sahar-o-sham ki kuchh baat karo

By

inqilab-e-sahar-o-sham ki kuchh baat karo
dosto gardish-e-ayyam ki kuchh baat karo
jam-o-mina to kahin aur se le aaenge
mai-kasho saqi-e-gulfam ki kuchh baat karo
ghair ki subh-e-darakhshan ka tasawwur kab tak
apni kajlai hui sham ki kuchh baat karo
phir jalana mah-o-khurshid ki mahfil mein charagh
pahle apne hi dar-o-baam ki kuchh baat karo
kya ye tute hue paimane liye baithe ho
baada-nosho sitam-e-am ki kuchh baat karo
zikr-e-firdaus-o-iram kal pe utha rakhte hain
aaj to aariz-e-asnam ki kuchh baat karo
main to khair apni wafaon pe hun nazan lekin
wo jo tum par hai us ilzam ki kuchh baat karo
talkhi-e-kaam-o-dahan se kahin gham dhulte hain
zalimo talkhi-e-ayyam ki kuchh baat karo
itna sannata ki ehsas ka dam ghutta hai
subh ka zikr karo sham ki kuchh baat karo
wahi 'arshad' ki jalata hai jo aandhi mein charagh
han usi shair-e-badnam ki kuchh baat karo

husn-e-masum agar raaz-e-nihan tak pahunche

By

husn-e-masum agar raaz-e-nihan tak pahunche
gham ka mear khuda jaane kahan tak pahunche
ishq mein yun to sabhi sud-o-ziyan tak pahunche
kam hain aise jo mere azm-e-jawan tak pahunche
hum pahunchne ko to har wahm-o-guman tak pahunche
tum wahan ho ki nazar bhi na jahan tak pahunche
wo musibat jise duniya gham-e-dil kahti hai
main na rokun to khuda jaane kahan tak pahunche
tum kahin ja ke chhupo dawat-e-nazzara to do
phir ye maqdur-e-nazar hai ki jahan tak pahunche
hukm hai chahe gulistan ka gulistan jal jae
hath lekin na koi barq-e-tapan tak pahunche
tum rah-e-ishq mein lillah mera sath na do
silsila gham ka khuda jaane kahan tak pahunche
uf wo nazren jo mohabbat ka bharam rakh na saken
hae wo kaif jo ehsas-e-garan tak pahunche
raaz-e-ulfat main chhupata to hun lekin 'arshad'
dar hai ehsas ki talkhi na zaban tak pahunche

dilon se yas-o-alam ke naqab utaro to

By

dilon se yas-o-alam ke naqab utaro to
sahar bhi rup dikhaegi shab guzaro to
faza ke sine mein naghmon ke lai utaro to
usi ada se zara phir mujhe pukaro to
mere ghamon ke dhundalke bhi chhat hi jaenge
tum apne gesu-e-shab-rang ko sanwaro to
kahan gae mujhe tarikiyon mein uljha kar
hayat-e-rafta ke lamho zara pukaro to
khizan-rasida fazaon ko rooge kab tak
bahaar gosh-bar-awaz hai pukaro to
phir is ke baad sahar hi sahar hai ai 'arshad'
rukh-e-hayat ke tewar zara nikhaaro to