ye log KHwab bahut karbala ke dekhte hain

By

ye log khwab bahut karbala ke dekhte hain
magar ghanim ko gardan jhuka ke dekhte hain
suna hai barf-ruten raushni se darti hain
so ek charagh ko hum bhi jala ke dekhte hain
unhen kaho ki kabhi jangalon ki samt bhi aaen
jo bastiyon mein karishme khuda ke dekhte hain
junun mein koi izafa nahin hai muddat se
ghubar-e-jism bhi ab ke uda ke dekhte hain
ye dil hai thahri hui jhil ki tarah kab se
ab is mein phir koi patthar gira ke dekhte hain
phir ek khayal ko zanjir kar diya hum ne
phir ek nam ko dil se mita ke dekhte hain

us abr se bhi qabahat ziyaada hoti hai

By

us abr se bhi qabahat ziyaada hoti hai
jise barasne ki aadat ziyaada hoti hai
wo aabshaar hain us ke labon mein poshida
ki jin se pyas ki shiddat ziyaada hoti hai
wo mere pas na aane ko deta hai tarjih
jab us ko meri zarurat ziyaada hoti hai
rahun jo ghar mein to tanhai katne aae
chalun jo rah to wahshat ziyaada hoti hai
main ek shajar hun magar barg-o-bar se aazad
hawa ki mujh pe inayat ziyaada hoti hai
yahan hamare bhi din the buzurg kahte hain
nae lahu mein baghawat ziyaada hoti hai

sach bol ke bachne ki riwayat nahin koi

By

sach bol ke bachne ki riwayat nahin koi
aur mujh ko shahadat ki zarurat nahin koi
main rizq ki aawaz pe labbaik kahunga
han mujh ko zaminon se mohabbat nahin koi
mere bhi kai khwab the mere bhi kai azm
haalat se inkar ki surat nahin koi
main jis ke liye sare zamane se khafa tha
ab yun hai ki us nam se nisbat nahin koi
lahja hai mera talkh mere war hain bharpur
lekin mere sine mein kudurat nahin koi

baDe nadan the hum ret ko aab-e-rawan samjhe

By

bade nadan the hum ret ko aab-e-rawan samjhe
khujuron ke darakhton ko ghanera saeban samjhe
chaman mein mere aansu the jinhen shabnam kaha sab ne
falak par meri aahen thin jinhen sab kahkashan samjhe
kabhi tujh ko ghubar-e-rang mein koi kiran jaana
kabhi tujh ko giraft-e-sang mein jue rawan samjhe
kisi be-mehr-subhon ko ata ki raushni hum ne
kai na mehrban raaton ko bhi hum mehrban samjhe
khizan ke shahr mein bas main bahaaron ki alamat tha
mere zakhmon ko sab phulon ki nazuk pattiyan samjhe
sabhi ko de raha tha wo dua jine ki sadiyon tak
hamare shahr ke sab log us ko bad-zaban samjhe
thake baithe the kuchh panchhi lab-e-dariya jinhen 'asad'
hum apni par-shikasta khwahishon ka karwan samjhe

ye jo sham zar-nigar hai

By

ek udas chand se lagao ke dinon ki yaadgar hai
main manzaron se sarsari guzarne wala shakhs tha
yunhi si ek sham thi aur ek jhil thi
ki jis mein us ka aks tha
so main wahin thahar gaya
wo chand mere sare jism mein utar gaya
ye ek hijr jo azal se mere us ke darmiyan tha
magar ajab junun tha jo chahta tha
duriyon ko tod de
lagam-e-asp-e-asman zamin ki samt mod de
achanak ek subh meri aankhen bujh gain
ya udas chand ko sahar nigal gai
ye jo sham zar-nigar hai
ek udas chand se lagao ke dinon ki yaadgar hai