nigah-e-shauq ko yun aaina-samani de

By

nigah-e-shauq ko yun aaina-samani de
ishq ko husn bana husn ko hairani de
dil-nawazi mein bhi iza hai mohabbat ki qasam
tujh ko fursat jo kabhi shughl-e-sitam-rani de
kuchh teri chashm-e-sukhan-saz ka ima na khula
lab-e-mai-nosh ko taklif-e-gul-afshani de
phul wo hai jo mayassar chadhe ye sunta tha
ab khula dil ki rah-e-ishq mein qurbani de
aaina sang-e-dar-e-dost hua bhi to kya
sar jo sajde mein jhuke lau teri peshani de
uf wo purkar jo sunte hi taghaful ka gila
ishwa-o-naz ko talim-e-pashimani de
dil-e-betab-e-tamasha ki tasalli malum
apne har jalwe ko ek paikar-e-insani de
us ki angdai ka aalam to kabhi dekh ai gul
aur hi husn teri chaak-garebani de
aao shiraaza-e-hasti ko pareshan kar den
yun ki us zulf ko paigham-e-pareshani de
teri sarkar ghani tera gada bhi hai ghani
kuchh na de aur jo de gham ki farawani de
is tawaqqo pe hun khamosh ki wo shokh-nigah
phir tahoka pa-e-taqrib-e-ghazal-khwani de

ishq ki garmi-e-bazar kahan se laun

By

ishq ki garmi-e-bazar kahan se laun
yusuf-e-dil ka kharidar kahan se laun
sunte hi naghmon ki ek lahr ragon mein daude
main teri shokhi-e-guftar kahan se laun
wahi shorida-sari hai wahi iza-talabi
ishq mein jada-e-hamwar kahan se laun
ho gain aankhon se wo mast nigahen ojhal
ishrat-khana-e-khummar kahan se laun
dil ki dhadkan mein suna karta tha paigham tera
ab wo hangama-e-bisyar kahan se laun
us par aaina ho kis tarah haqiqat dil ki
shauq-e-minnat-kash-e-izhaar kahan se laun
mabad-e-dil mein parastar-e-mohabbat hun 'asar'
rawish-e-kafir-o-din-dar kahan se laun