zamin ki raat

By

zamin ki raat ki hai hukmarani
usi ka elchi suraj hai
aao!
bujhi jo raushni deti hain wo shamen jalao
usi ke ye khizan-dida chaman hain
damakte aansuon ke bich bo kar
zamin-e-khwab se apna koi gulshan ugao
usi ke hain ye chashme talkh sare
azal ki tishnagi ko sath le kar
sar-e-sahra khade ho kar sarabon ko bulao

tazlil

By

tum ne suna
mausam ne sabze ki zabani kya kaha?
ye nahin un ki jagah
ye bhi kaha ki
mutribon ka taifa
un ke liye hai sirf jin ka samea
mo'taqid hai subh-e-nau ke tarbiya ilhan ka
aur taeron ne yak zaban
is baat ki tasdiq ki
gardan hilai saq par
har phul ne
aur pith de kar apni khushbu rok li
munh mod kar shakhon ne roki hai hawa
katra ke guzri hai rawish dekho sahar
jo thi hamari dost
ab hum ko nahin pahchanti
kya kar rahe hain hum yahan?
uttho chalo!
kuchh hai hamara bhi waqar
dekho! ishaare se bulata hai hamein wo reg-zar

talash

By

ghusl-e-tahaarat ke liye duba ufuq mein aaftab
afrokhta qindil apni hath mein apne liye
rahibana raat phirti hai
falak par sogwar
justuju se shal hain ab
chappu chalate hath mah o sal ke
be-sabr, jhuk kar hath se apne fana
wast-e-samandar mein uthati hai bhanwar
hoti hai mohlat khatm
ab to parda-e-ikhfa utha
mere muqaddas khwab ki tabir tu
apni jhalak mujh ko dikha de ek bar
ki chhin lene ko fana hai mujh se tera intizar

taKHliq

By

nabud ke kaamil sannate mein
zehn-e-afaqi
shor khayalon ka apne sunta hai
aamaq ki tariki se ubhar kar
nur ka ek aazam zarra
shaq ho ke adam ke sannate ko todta hai
pithon pe hawa-e-shamsi marti hai durre
duri harakat mein aate hain sakit kurre
afkar ka warta bain-un-najm khalaon mein
aawaz-e-muhib se ghumta hai
suraj ke darakhshan baatin mein
tariki ka pur-haul hayula kudta hai
shab ki aqlim ke haikal par
kala baadal apna bijli ka sah shanakha lahraata hai
khud se mubariz-andesha
sangin kohsar mein dhalta hai
jis ki makhruti choti se
patal ki gahrai ka khabt uchhalta hai
fauladi pani maujon ki talwaron se
patthar ki chatanen katta hai
aashob wafur-e-qudrat ka
bahr-e-zakhkhar ki tah mein palta hai
talbida taulid pe sahil se sarzan
makhluq kasir-ul-aza ka shewan
tashkil mein hai aamil quwwat ka mansuba
kohre se zahir hota hai ek kashti ka khaka
mastul ke bal khamoshi se jo
tufan wasil hota hai
matlub, nihan-khane mein apne ruh-e-insani
dahshat ki god mein baalida hoti hai

shayad

By

wo jhuk ke zamin par
baghlon mein de kar hath hamari
hum ko uthata hai
taron tak lata hai
phir hath hata kar
hum ko girne chhodta hai
sard o tarik khalaon mein
shayad us ki ye khwahish hoti hai
hum apne donon bazu lahraen
aur upar uthte jaen
hatta ki
tanhai ke abad mein us ke dakhil hon
aur hath badha kar
kanpti poron se apni
us ke ghamgin chehre ko chhu len

raaz

By

sham o sahar ke manzar gahri udasiyon ke
parde gira rahe hain
waqif to thin hamesha un se meri nigahen
odhe na thin fazaen
yun kohar ki abaen
kuchh tha jo kho gaya hai?
shakh-e-nazar pe dahka
barg-e-hina ka shola
yun kanpta hai jaise
mitta koi hayula
sham o sahar se koi mafrur ho gaya hai?
sine mein main taqatur
bundon ka sun raha hun
ek khwab bun raha hun
is mein kise bulane?
be-nam aarzu ka ye raaz kaun jaane