pahla jashn-e-azadi

ba-sad ghurur ba-sad fakhr-o-naz-e-azadi
machal ke khul gai zulf-e-daraaz-e-azadi
mah-o-nujum hain naghma-taraaz-e-azadi
watan ne chheda hai is tarah saz-e-azadi
zamana raqs mein hai zindagi ghazal-khwan hai
zamana raqs mein hai zindagi ghazal-khwan hai
har ek jabin pe hai ek mauj-e-nur-e-azadi
har ek aankh mein kaif-o-surur-e-azadi
ghulami khak-basar hai huzur-e-azadi
har ek qasr hai ek baam-e-tur-e-azadi
har ek baam pe ek parcham-e-zar-afshan hai
har ek samt nigaran-e-yasmin-paikar
nikal pade hain dar-o-baam se mah-o-akhtar
wo sail-e-nur hai khira hai aadmi ki nazar
ba-sad ghurur-o-ada khanda-zan hai gardun par
zamin-e-hind ki jola-nigah ghazalan hai
sada do anjum-e-aflak raqs farmaen
butan-e-kafir-o-saffak raqs farmaen
sharik halqa-e-idrak raqs farmaen
tarab ka waqt hai bebak raqs farmaen
ki ye bahaar-e-payami-e-sad-bahaaran hai
ye inqalab ka muzhda hai inqalab nahin
ye aaftab ka partaw hai aaftab nahin
wo jis ki tab-o-tawanai ka jawab nahin
abhi wo sai-e-junun-khez kaamyab nahin
ye intiha nahin aaghaz-e-kar-e-mardan hai

shikwa-e-muKHtasar

mujhe shikwa nahin duniya ki un zohra-jabinon se
hui jin se na mere shauq-e-ruswa ki pazirai
mujhe shikwa nahin un pak baatin nukta-chinon se
lab-e-mojiz-numa ne jin ke mujh par aag barsai
mujhe shikwa nahin tahzib ke un pasbanon se
na lene di jinhon ne fitrat-e-shair ko angdai
mujhe shikwa nahin dair-o-haram ke aastanon se
wo jin ke dar pe ki hai muddaton main ne jabin-sai
mujhe shikwa nahin uftadagan-e-aish-o-ishrat se
wo jin ko mere haal-e-zar par aksar hansi aai
mujhe shikwa nahin un sahiban-e-jah-o-sarwat se
nahin aati mere hissa mein jin ki ek bhi pai
zamane ke nizam-e-zang-aluda se shikwa hai
qawanin-e-kuhan aain-e-farsuda se shikwa hai

shahr-e-nigar

rukhsat ai ham-safaro shahr-e-nigar aa hi gaya
khuld bhi jis pe ho qurban wo dayar aa hi gaya
ye junun-zar mera mere ghazalon ka jahan
mera najd aa hi gaya mera tatar aa hi gaya
aaj phir ta-ba-chaman dar-e-pai-e-gul-ha-e-chaman
gungunata hua zambur-e-bahaar aa hi gaya
gesuon walon mein abru ke kaman-daron mein
ek said aa hi gaya ek shikar aa hi gaya
baghbanon ko batao gul-o-nasrin se kaho
ek kharab-e-gul-o-nasrin-e-bahaar aa hi gaya
khair-maqdam ko mere koi ba-hangam-e-sahar
apni aankhon mein liye shab ka khumar aa hi gaya
zulf ka abr-e-siyah bazu-e-simin pe liye
phir koi naghma-zan-e-saz-e-bahaar aa hi gaya
ho gai tishna-labi aaj rahin-e-kausar
mere lab par lab-e-lalin-e-nigar aa hi gaya

KHiraj-aqidat

ek naya paghambar-e-amn-o-aman paida hua
karwan mein ek amir-e-karwan paida hua
ek khizr-e-ahd-e-hazir ek kalim-e-ahd-e-nau
ek sadr-e-mahfil-e-ruhaniyan paida hua
ek hudi-khwan-e-mohabbat ek naqib-e-ittihad
ek fida-e-soz-e-naqus-o-azan paida hua
haq ka saudai haqiqat ka ilm khole hue
sidq ka shaida safa ka pasban paida hua
sar-ba-sar ek muzhda-e-taskin-e-mardan-e-zaif
quwwat-e-bazu-e-yaran-e-jawan paida hua
is chaman ki sarzamin hai ru-kash-e-haft-asman
is chaman mein tair-e-arsh-ashiyan paida hua
ek gul-e-taza jo murjha kar bhi murjhaya nahin
safha-e-hasti pe naqsh-e-jawedan paida hua
khun se is ke aaj bhi gul-rang hai khak-e-watan
fakhr-e-alam nazish-e-hindostan paida hua

hamara jhanDa

sher hain chalte hain darraate hue
baadalon ki tarah mandlate hue
zindagi ki ragni gate hue
aaj jhanda hai hamare hath mein
hum wo hain jo be-rukhi karte nahin
hum wo hain jo maut se darte nahin
hum wo hain jo mar ke bhi marte nahin
aaj jhanda hai hamare hath mein
chain se mahlon mein hum rahte nahin
aish ki ganga mein hum bahte nahin
bhed dushman se kabhi kahte nahin
aaj jhanda hai hamare hath mein
jaante hain ek lashkar aaega
top dikhla kar hamein dhamkaega
par ye jhanda bhi yunhi lahraega
aaj jhanda hai hamare hath mein
kab bhala dhamki se ghabraate hain hum
dil mein jo hota hai kah jate hain hum
aasman hilta hai jab gate hain hum
aaj jhanda hai hamare hath mein
lakh lashkar aaen kab hilte hain hum
aandhiyon mein jang ki khilte hain hum
maut se hans kar gale milte hain hum
aaj jhanda hai hamare hath mein

aaj bhi

main hun 'majaz' aaj bhi zamzama-e-sanj-o-naghma-khwan
shair-e-mahfil-e-wafa mutrib-e-bazm-e-dil-baran
aaj bhi khar-zar-e-gham khuld-e-barin mere liye
aaj bhi rah-guzar-e-ishq mere liye hai kahkashan
aaj bhi ga raha hun main saz-e-junun liye hue
soz-e-nihan se aaj bhi ruh-e-tapan hai dil-tapan
aaj bhi zindagi meri gharq-e-sharab-e-tund-o-tez
aaj bhi hath mein mere jam-e-sharab-e-arghawan
aaj bhi hai rachi hui aaj bhi hai basi hui
mere nafas mein khuld ki nuzhat-o-nikhat-e-jawan
aaj bhi nukta-chin hun main khalwatiyan-e-khas ka
khalwatiyan-e-khas ka aaj bhi hun mizaj-dan
aaj bhi ashk-e-khun mera qashqa jabin-e-naz ka
aaj bhi khak-e-dil meri surma-e-chashm-e-gul-rukhan
aaj bhi dil ko hai mere daulat-e-agahi nasib
aaj bhi hai nazar meri arz-o-saman ki raaz-dan
aaj bhi hai junun mera dair-o-haram pe khanda-zan
aaj bhi mujh se bad-hawas dair-o-haram ke pasban
aaj bhi saz se mere garmi-e-bazm-e-sar-kashi
aaj bhi aatish-e-sukhan shoala-fishan sharar-fishan
aaj bhi hai likhi hui surkh huruf mein 'majaz'
daftar-e-shahr-e-yar mein mere junun ki dastan