na jaane kitni riwayaten munhadim huin hain

By

na jaane kitni riwayaten munhadim huin hain
bapa jahan bhi hai shor-e-mahshar khada hua hun
ye kaisa manzar hai us ko kis zawiye se dekhun
ki khud bhi is daere ke andar khada hua hun
ab is nazare ki tab laun to kaise laun
wahi hai maidan wahi hai lashkar khada hua hun
hazar tufan-e-barq-o-baran hain sahilon par
liye hue ek shikasta langar khada hua hun

aane wali kal ki de kar KHabar gaya ye din bhi

By

aane wali kal ki de kar khabar gaya ye din bhi
mah-e-visal ki shiryanon mein utar gaya ye din bhi
lamha lamha saat saat pal pal mein taqsim hua
reza reza hote hote bikhar gaya ye din bhi
us ki tabani par kitne hi suraj qurban hue
apne hone ka dukh sah kar magar gaya ye din bhi
sard hawa ka jhonka tha jo sannato ko chir gaya
kitne dilon par dastak de kar guzar gaya ye din bhi
hum to apni nindon mein khwabon ko jaga kar khwar hue
mauj-e-sarab mein dhal kar jaane kidhar gaya ye din bhi