agar yaqin na rakhte guman to rakhte

By

agar yaqin na rakhte guman to rakhte
hum apne hone ka koi nishan to rakhte
tamam din jo kadi dhup mein sulagte hain
ye ped sar pe koi saeban to rakhte
hamari baat samajh mein to un ki aa jati
hum apne sath koi tarjuman to rakhte
hamein safar ka khasara pasand tha warna
musafirat ki thakan sar pe tan to rakhte
mushahidat ka dar laziman khula hota
hum apni aankh su-e-shama-dan to rakhte
jila ke baith gae daman-e-sahar 'nasik'
sitare tut rahe the to dhyan to rakhte

yahi jo tere mere dil ki rajdhani thi

By

yahi jo tere mere dil ki rajdhani thi
yahin kahin pe teri aur meri kahani thi
yahin kahin pe adu ne padaw dala tha
yahin kahin pe mohabbat ne haar mani thi
ajib saat-e-be-rang mein tu bachhda tha
ki dil lahu tha mera aur na aankh pani thi
makan badalte hue reza reza kar dale
purane khwab the taswir bhi purani thi
nasib ujadne se pahle ki baat hai 'nasik'
hamare panw ki mitti bhi aasmani thi

yaqin barson ka imkan kuchh dinon ka hun

By

yaqin barson ka imkan kuchh dinon ka hun
main tere shahr mein mehman kuchh dinon ka hun
phir is ke baad mujhe harf harf hona hai
tumhaare hath mein diwan kuchh dinon ka hun
kisi bhi din ise sar se utar phenkunga
main khud pe bojh meri jaan kuchh dinon ka hun
zamin-zade meri umr ka hisab na kar
utha ke dekh le mizan kuchh dinon ka hun
mujhe ye dukh hai ki hasharaat-e-gham tumhaare liye
main khurd-o-nosh ka saman kuchh dinon ka hun

chup-chap habs-e-waqt ke pinjre mein mar gaya

By

chup-chap habs-e-waqt ke pinjre mein mar gaya
jhonka hawa ka aate hi kamre mein mar gaya
suraj lihaf odh ke soya tamam raat
sardi se ek parinda dariche mein mar gaya
jo nakhuda ko kah na saka umr bhar khuda
wo shakhs kal ana ke jazire mein mar gaya
editori ne kat din takhliq ki ragen
achchha-bhala adib risale mein mar gaya
suraj ne aansuon ki tawanai chhin li
shabnam sa shakhs dhup ke qasbe mein mar gaya
is martaba bhi sachchi gawahi usi ne di
is martaba magar wo katahre mein mar gaya
'nasik' wo apni zat mein manzil se kam na tha
wo rah-raw-e-hayat jo raste mein mar gaya