us lab ki KHamushi ke sabab TuTta hun main

By

us lab ki khamushi ke sabab tutta hun main
dast-e-dua mein rakkha hua aaina hun main
ab ja ke ho sakegi mohabbat wasuq se
khud se bichhadte waqt kisi se mila hun main
aabaad hai khazane ki afwah se wajud
matruk jangalon ka koi rasta hun main
dastar kaghzi hai fazilat hai nam ki
chhoton ki mehrbani se ghar mein bada hun main
ro kar na soya jae to kya nind ka jawaz
bistar ki har shikan mein pada jagta hun main
hun apni raushni ki aziyyat mein mubtala
jalta hua charagh hun ulta pada hun main

koi silsila nahin jawedan tere sath bhi tere baad bhi

By

koi silsila nahin jawedan tere sath bhi tere baad bhi
main to har tarah se hun raegan tere sath bhi tere baad bhi
mere ham-nafas tu charagh tha tujhe kya khabar mere haal ki
ki jiya main kaise dhuan dhuan tere sath bhi tere baad bhi
na tera visal visal tha na teri judai judai hai
wahi haalat-e-dil-e-bad-guman tere sath bhi tere baad bhi
main ye chahta hun ki umr-bhar rahe tishnagi mere ishq mein
koi justuju rahe darmiyan tere sath bhi tere baad bhi
mere naqsh-e-pa tujhe dekh kar ye jo chal rahe hain unhen bata
hai mera suragh mera nishan tere sath bhi tere baad bhi

koi bhi shakl mere dil mein utar sakti hai

By

koi bhi shakl mere dil mein utar sakti hai
ek rifaqat mein kahan umr guzar sakti hai
tujh se kuchh aur talluq bhi zaruri hai mera
ye mohabbat to kisi waqt bhi mar sakti hai
meri khwahish hai ki phulon se tujhe fath karun
warna ye kaam to talwar bhi kar sakti hai
ho agar mauj mein hum jaisa koi andha faqir
ek sikke se bhi taqdir sanwar sakti hai
subh-dam surkh ujala hai khule pani mein
chand ki lash kahin se bhi ubhar sakti hai

kami hai kaun si ghar mein dikhane lag gae hain

By

kami hai kaun si ghar mein dikhane lag gae hain
charagh aur andhera badhane lag gae hain
ye e'timad bhi mera diya hua hai tujhe
jo mere mashware be-kar jaane lag gae hain
main itna wada-faramosh bhi nahin hun ki aap
mere libas pe girhen lagane lag gae hain
wo pahle tanha khazane ke khwab dekhta tha
ab apne hath bhi naqshe purane lag gae hain
faza badal gai andar se hum parindon ki
jo bol tak nahin sakte the gane lag gae hain
kahin hamara talatum thame to faisla ho
hum apni mauj mein kya kya bahane lag gae hain
nahin baid ki jangal mein sham pad jae
hum ek ped ko rasta batane lag gae hain

jate hue nahin raha phir bhi hamare dhyan mein

By

jate hue nahin raha phir bhi hamare dhyan mein
dekhi bhi hum ne machhliyan shishe ke martaban mein
pahle bhi apni jholiyan jhad kar uth gae the hum
aisi hi ek raat thi aisi hi dastan mein
sath zaif bap ke lag gain kaam-kaj par
gahne chhupa ke ladkiyan dadi ke pan-dan mein
ghanti baja ke bhagte bachchon ko thodi ilm hai
rahta nahin hai koi bhi aadmi is makan mein
yani majal kuchh nahin zarron ke ijtima ki
yani sabhi mah-o-nujum ek hi khandan mein
itna bhi mukhtalif nahin mera tumhaara tajraba
jaise ki tum muqim ho aur kisi jahan mein

hansne-hansane paDhne-paDhane ki umr hai

By

hansne-hansane padhne-padhane ki umr hai
ye umr kab hamare kamane ki umr hai
le aai chhat pe kyun mujhe be-waqt ki ghutan
teri to khair baam pe aane ki umr hai
tujh se bichhad ke bhi tujhe milta rahunga main
mujh se tawil mere zamane ki umr hai
aulad ki tarah hai mohabbat ka mujh pe haq
jab tak kisi ka bojh uthane ki umr hai
ghurbat ko kyun na main bhi shararat ka nam dun
diwar-o-dar pe phul banane ki umr hai
koi muzaiqa nahin piri ke ishq mein
waise bhi ye sawab kamane ki umr hai