tere taqazon pe chehre badal raha hun main

By

tere taqazon pe chehre badal raha hun main
nae zamane tere sath chal raha hun main
charagh-e-akhir-e-shab hun magar abhi suraj
sukun se tu nikalna ki jal raha hun main
ye chahta hun ki har rukh se dekh lun duniya
ye zawiye jo nazar ke badal raha hun main
nai hawaen abhi sab gharon tak aai nahin
abhi to hath ka pankha hi jhal raha hun main
mere nashe mujhe ab ladkhadane mat dena
sharab-khane se bahar nikal raha hun main
zara sa waqt hai aur dur meri manzil hai
isi liye to bahut tez chal raha hun main

fan uDanon ka jab ijad kiya tha maine

By

fan udanon ka jab ijad kiya tha main ne
kuchh parindon ko bhi aazad kiya tha main ne
ab koi shahr ujadta hai to ye lagta hai
jaise is shahr ko aabaad kiya tha main ne
shor itna hua aangan mein ki phir bhul gaya
aaj barson mein use yaad kiya tha main ne
aap ayyash nahin aap bura man gae
zikr-e-sarmaya-e-ajdad kiya tha main ne
aaj-kal kuchh bhi nahin man raha hai 'azhar'
apne qabu mein jo ham-zad kiya tha main ne

banae zehn parindon ki ye qatar mera

By

banae zehn parindon ki ye qatar mera
isi nazare se kuchh kam ho intishaar mera
jo main bhi aag mein hijrat ka tajraba karta
muhajiron hi mein hota wahan shumar mera
phir apni aankhen sajae hue main ghar aaya
safar ek aur raha ab ke khush-gawar mera
tamam umr to khwabon mein kat nahin sakti
bahut dinon to kiya us ne intizar mera
ye mera shahr meri khamiyon se waqif hai
yahan kisi ko na aaega e'tibar mera
ye log sirf meri zindagi ke dushman hain
mujassama ye banaenge shandar mera
meri bisat se 'azhar' bahut ziyaada thin
tawaqquat jo rakhta tha mujh se yar mera

aziyyat uski zehni dur kar de

By

aziyyat us ki zehni dur kar de
use bhi ai khuda mashhur kar de
isi mein fath ka teri hai imkan
mujhe ghar mein mere mahsur kar de
ye chehre ye fareb-alud chehre
inhen koi nazar se dur kar de
adab kis ka wahan aadab kaise
banawat dil mein jab nasur kar de
wahi tazim ke laeq hai 'azhar'
jo khud tazim par majbur kar de