girya-e-shab ki shahadat ke liye jagte hain

By

girya-e-shab ki shahadat ke liye jagte hain
ye sitare koi saat ke liye jagte hain
khauf aisa hai ki hum band makanon mein bhi
sone walon ki hifazat ke liye jagte hain
umr guzri hai teri sajda-wari mein lekin
aaj hum apni ibaadat ke liye jagte hain
pahle hum karte hain taswir mein uryan tera khwab
aur phir us ki hifazat ke liye jagte hain
lafz-dar-lafz padha karte hain teri surat
raat-bhar teri tilawat ke liye jagte hain

girdab-e-reg-e-jaan se mauj-e-sarab tak

By

girdab-e-reg-e-jaan se mauj-e-sarab tak
zinda hai to lahu mein bas ek iztirab tak
ek main ki ek gham ka taqaza na kar saka
ek wo ki us ne mang liye apne khwab tak
tu lafz lafz lazzat-e-hijran mein hai abhi
hum aa gae hain hijrat-e-gham ke nisab tak
jo zer-e-ab-e-mauj-e-rawan hai khuruj-e-ab
aa jae ek roz agar sath-e-ab tak
milta kahin sawad-e-warud-o-shahud mein
hota meri hudud ka koi hisab tak
tera hi raqs silsila-e-aks-e-khwab hai
is ashk-e-nim-shab se shab-e-mahtab tak
aasar-e-ahd-e-gham hain tah-e-reg-e-jaan ki tu
pahuncha nahin abhi dil-e-khana-kharab tak

ek ek sans mein sadiyon ka safar kaTte hain

By

ek ek sans mein sadiyon ka safar katte hain
khauf ke shahr mein rahte hain so dar katte hain
pahle bhar lete hain kuchh rang tumhaare us mein
aur phir hum usi taswir ka sar katte hain
khwab mutthi mein liye phirte hain sahra sahra
hum wahi log hain jo dhup ke par katte hain
saunp kar us ko tere dard ke sare mausam
phir usi lamhe ko hum zindagi-bhar katte hain
tu nahin hai to tere shahr ki taswir mein hum
sare virane bana dete hain ghar katte hain
us ki yaadon ke parindon ko uda kar 'azhar'
dil se ab dard ka ek ek shajar katte hain

dil kuchh der machalta hai phir yaadon mein yun kho jata hai

By

dil kuchh der machalta hai phir yaadon mein yun kho jata hai
jaise koi ziddi bachcha rote rote so jata hai
sard hawa ya tuta taw puri raat adhura chand
mere aangan ki mitti ko jaane kaun bhigo jata hai
ek ek kar ke dhup ke sare surkh parinde mar jate hain
ret ke zard samundar par jab suraj panw dho jata hai
tujh se bichhad kar raat ka ek ek lamha sadiyon mein katta hai
din ke hote hote ab to ek zamana ho jata hai
raat gae tanhai mujh se akasr puchhne aa jati hai
chup ki is basti ko shor-o-ghul mein kaun dubo jata hai

dar-pesh nahin naql-e-makani kai din se

By

dar-pesh nahin naql-e-makani kai din se
aai na tabiat mein rawani kai din se
phir ret ke dariya pe koi pyasa musafir
likhta hai wahi ek kahani kai din se
dushman ka kinare pe bada sakht hai pahra
aaya na mere shahr mein pani kai din se
saunpe the kahan dhup ke mausam ko ghane ped
main dhundh raha hun wo nishani kai din se
shayad koi bhatka hai wahan qafila 'azhar'
sahra ne meri khak na chhani kai din se

chaak-e-daman-e-qaba dagh-e-junun-saz bahut

By

chaak-e-daman-e-qaba dagh-e-junun-saz bahut
hum ne pae hain dar-e-yar se eazaz bahut
hum se puchho ki gham-e-furqat-e-yaran kya hai
hum ne dekhe hain shab-e-hijr ke andaz bahut
raat bhar chand se hoti rahen teri baaten
raat khole hain sitaron ne tere raaz bahut
aaj kyun pahli si kuchh wahshat-e-dil koi nahin
aaj maddham hai shab-e-gham tera aaghaz bahut
ek hum hi ne sameti hai udasi teri
sham-e-gham hum ne uthae hain tere naz bahut