humne aap ke gham ko ham-safar banaya hai

By

hum ne aap ke gham ko ham-safar banaya hai
yani zindagani ko mo'atabar banaya hai
har gham-e-zamana ko dil mein di jagah hum ne
khub jo mila us ko khub-tar banaya hai
int aur patthar ka ghar nahin mila to kya
dushmanon ke dil mein bhi hum ne ghar banaya hai
ehtiyat sikhi hai be-usul logon se
hum ko chand andhon ne dida-war banaya hai
zist ke gharaunde ko hum ne apne hathon se
umr bhar bigada hai umr bhar banaya hai

hijr mein jo ashk-e-chashm-e-tar gira

By

hijr mein jo ashk-e-chashm-e-tar gira
ek payam haal-e-dil ban kar gira
doston ke tanz ka ek ek tir
barq ban ban kar mere dil par gira
jab uthaya bazm se us shokh ne
main utha uth kar chala chal kar gira
wae ek muflis ka tha sab kuchh wahi
in dinon sailab mein jo ghar gira
kya ghazab hai zindagi ki daud mein
rahzan aage badha rahbar gira

apne chehre par kai chehre liye

By

apne chehre par kai chehre liye
hum bade hi parsa ban kar jiye
raaz ulfat ka chhupane ke liye
zabt-e-girya bhi kiya lab bhi siye
jin mein chalti hain hawaen tez tez
aisi rahon mein jalae hain diye
jo bhi hain is bazm mein madhosh hain
aur ye madhoshiyan hain bin piye
aap ne chhode hain jo naqsh-e-qadam
wo hamare haq mein hain raushan diye
gham ke tufanon ki zad par be-khatar
phir 'jamali' ne jalae hain diye