raushni hi raushni hai shahr mein

raushni hi raushni hai shahr mein
phir bhi goya tirgi hai shahr mein
roz-o-shab ke shor-o-ghul ke bawajud
ek tarah ki khamushi hai shahr mein
rail ki patri pe so jate hain log
kitni aasan khud-kushi hai shahr mein
jo imarat hai wo sar se panw tak
ishtihaaron se saji hai shahr mein
ganw chhode ho chuki muddat magar
'khawar' ab tak ajnabi hai shahr mein

mujhko nahin malum ki wo kaun hai kya hai

mujh ko nahin malum ki wo kaun hai kya hai
jo sae ke manind mere sath laga hai
ek aur bhi hai jism mere jism ke andar
ek aur bhi chehra mere chehre mein chhupa hai
mahtab to aaega na sidhi se utar kar
diwana kis ummid pe raste mein khada hai
milne ki tamanna hai magar us se milen kya
jis shakhs ka is shahr mein ghar hai na pata hai
likhta hun nai nazm-o-ghazal jis ke sabab main
wo zauq-e-sukhan to mujhe wirse mein mila hai
maidan mein chale aao to khul jae ye tum par
kya sham ki sarshaar hawaon mein maza hai
socha tha mere sath chalega jo safar mein
ghar par wo mera khwab-e-hasin chhut gaya hai
hum 'mir' ka diwan the kya fahm pe khulte
akhbar samajh kar hamein logon ne padha hai
kahte hain ki us shahr mein hai dhum hamari
dekha hai kisi ne na jahan hum ko suna hai
bahar se koi aaj to 'khawar' ko pukare
kamre mein bahut roz se wo band pada hai

mahsus ho raha hai jo gham meri zat ka

mahsus ho raha hai jo gham meri zat ka
sach puchhiye to dard hai wo kaenat ka
ghar ki ghutan se dur nikal jae aadmi
sadkon pe khauf ho na agar hadsat ka
apne badan ko aur thakao na dosto
dhal jae din to bojh uthana hai raat ka
ek dusre ko zahr pilate hain log ab
baaton mein shahd ghol ke qand-o-nabaat ka
har shakhs tere shahr mein mujrim bana hua
phirta hai dhundhta hua rishta najat ka
is mein kisi ka aks na chehra dikhai de
dhundla gaya hai aaina 'khawar' hayat ka

jise bhi dekhiye pyasa dikhai deta hai

jise bhi dekhiye pyasa dikhai deta hai
koi maqam ho sahra dikhai deta hai
na jaane kaun hai wo waqt-e-sham jo akasr
gali ke mod pe baitha dikhai deta hai
jo chandni mein nahate hue bhi darta tha
wo jism dhup mein jalta dikhai deta hai
pahunch rahi hai jahan tak nigah sadkon par
na koi ped na saya dikhai deta hai
kanar-e-ab na baitho ki jhil mein 'khawar'
tumhaara aks bhi ulta dikhai deta hai

hai bahut mushkil nikalna shahr ke bazar mein

hai bahut mushkil nikalna shahr ke bazar mein
jab se jakda hun main kamre ke dar-o-diwar mein
chhe baras ke baad ek sune makan ke baam-o-dar
bas gae hain phir kisi ke jism ki mahkar mein
mujh ko apne jism se bahar nikalna chahiye
warna mera dam ghutega is andhere ghaar mein
yaad use ek pal bhi karne ki mujhe fursat nahin
mubtala sadiyon se mera dil hai jis ke pyar mein
dekhte hain log jab 'khawar' purani aankh se
kya nazar aae koi khubi nae fankar mein

bhagte suraj ko pichhe chhoD kar jaenge hum

bhagte suraj ko pichhe chhod kar jaenge hum
sham ke hote hi wapas apne ghar jaenge hum
katne ko ek shab thahre hain tere shahr mein
kya bataen subh hogi to kidhar jaenge hum
dhup mein phulon sa murjha bhi gae to kya hua
shahr se honton ke paimane to bhar jaenge hum
aaj gardun ki bulandi napne mein mahw hain
kal kisi gahre samundar mein utar jaenge hum
dhundte khoya hua chehra kisi shishe mein kyun
jaante gar ye ki sae se bhi dar jaenge hum
kuchh hamara haal bhi 'khawar' hai kundan ki tarah
dukh ke shoalon mein jalenge to nikhar jaenge hum