gaurayyon ne jashn manaya mere aangan barish ka

gaurayyon ne jashn manaya mere aangan barish ka
baithe baithe aa gai nind israr tha ye kisi khwahish ka
chand kitaben thode sapne ek kamre mein rahte hain
main bhi yahan gunjaish bhar hun kis ko khayal aaraish ka
thahar thahar kar kaund rahi thi bijli bahar jangal mein
train ruki to sarpat ho gaya ghoda waqt ki sazish ka
tis purane zakhmon ki thi nind uchat gai aankhon se
bhig raha tha karwat karwat gosha gosha baalish ka
kisi ke dil par dastak dunga kisi ke gham ka dukhda hun
sunne wale samajh rahe hain naghma hun farmaish ka
sar ke upar khak udi to sab dil tham ke baith gae
khabar nahin thi guzar chuka hai mausam abr-e-nawazish ka
reng rahi thi amar-lataen chhup chhup kar shadabi mein
uryan hoti shakhon se ab bharam khula zebaish ka
apni hi dhun mein magan rahta hai sachche sur ka sazinda
jaise ki main hun matwala khud apne tarz-e-nigarish ka
qadam qadam hai virana kahin aur 'khalish' ab kya jaana
warna shauq mujhe bhi kal tha sahra ki paimaish ka

gham hue jate hain dhaDkan ke nishan ham-nafaso

gham hue jate hain dhadkan ke nishan ham-nafaso
hai dar-e-dil pe koi sang-e-giran ham-nafaso
risne lagti hain jab aankhon se tezabi yaaden
baat karte hue jalti hai zaban ham-nafaso
dil se lab tak koi kohram sa sannata hai
khud-kalami mujhe le aai kahan ham-nafaso
ek subuk mauj hai ek lauh-e-darakhshan pe rawan
hai tamashai yahan sara jahan ham-nafaso
kitne masruf hain masrur nahin phir bhi ye log
hai ye kya silsila-e-kar-e-ziyan ham-nafaso
sham tamhid-e-ghazal raat hai takmil-e-ghazal
din nikalte hi nikal jati hai jaan ham-nafaso
rashk-e-mahshar koi qamat to nigahon mein jache
dil mein baqi hai abhi tab-o-tawan ham-nafaso
zinda ho rasm-e-junun kis ki nawa-rezi se
ab raha kaun yahan shoala-ba-jaan ham-nafaso
aaj ki sham ghazal kyun na 'khalish' se hi sunen
dhund kar lae koi hai wo kahan ham-nafaso

damak uThi hai faza mahtab-e-KHwab ke sath

damak uthi hai faza mahtab-e-khwab ke sath
dhadak raha hai ye dil kis rabab-e-khwab ke sath
hate ghubar jo lau se to meri jot jage
jalun main phir se nai aab-o-tab-e-khwab ke sath
hai sau adaon se uryan fareb-e-rang-e-ana
barahna hoti hai lekin hijab-e-khwab ke sath
to kyun saza mein ho tanha gunahgar koi
yahan to jite hain sab irtikab-e-khwab ke sath
sharar-e-sang se sanglakh ho gae talwe
hua na kuchh dil-e-khana-kharab-e-khwab ke sath
sulae rakkha hamein bhi fareb-e-manzil ne
chale the hum bhi kisi ham-rakab-e-khwab ke sath
suragh milta nahin pyas ke safinon ka
bhanwar bhi hote hain shayad sarab-e-khwab ke sath
haqiqaton ki chatanon pe chal gaya jadu
lo wo bhi chalne lagin ab sahab-e-khwab ke sath
ajab nahin wahi manzar nazara ban jae
dara raha hai ye dar iztirab-e-khwab ke sath
daraden rah gain bedariyon ke naqshe par
na hum rahe na wo tum inqalab-e-khwab ke sath
nigah-e-dida-e-tabir ke hawale 'khalish'
hai ye bayaz alag intikhab-e-khwab ke sath

chup the jo but sawal ba-lab bolne lage

chup the jo but sawal ba-lab bolne lage
thahro ki qaus-e-barq-o-lahab bolne lage
viraniyon mein saz-e-tarab bolne lage
jaise lahu mein aab-e-inab bolne lage
ek rishta ehtiyaj ka sau rup mein mila
so hum bhi ab ba-tarz-e-talab bolne lage
khamosh be-gunahi akeli khadi rahi
kuchh bolne se pahle hi sab bolne lage
pahle tum is mobile ko be-rabta karo
kam-zarf hai na jaane ye kab bolne
sar pitta hai natiqa hairan hai aagahi
purze machine ke bhi adab bolne lage
barham the khwab nind ki retili os par
us par sitam ki taer-e-shab bolne lage
hai waqt ya shuur ye guzra hai abhi
tum bhi 'khalish' zaban ajab bolne lage