bahs kyun hai kafir-o-din-dar ki

By

bahs kyun hai kafir-o-din-dar ki
sab hai qudrat dawar-e-dawwar ki
hum saf-e-qalu-bala mein kya na the
kuchh nai khwahish nahin didar ki
dhundh kar dil mein nikala tujh ko yar
tu ne ab mehnat meri be-kar ki
shakl-e-gul mein jalwa karte ho kabhi
gah surat bulbul-e-gulzar ki
aap aate ho kabhi subha-ba-kaf
karte ho khwahish kabhi zunnar ki
lan-tarani aap ki musa se thi
har jagah hajat nahin inkar ki
khas hain maqtul-e-shamshir-e-jafa
kuchh to lazzat hai teri talwar ki
dair-o-kaba mein kalisa mein phire
har jagah hum ne talash-e-yar ki
sab ki hai taqdir tere hath mein
kya shikayat muslim o kuffar ki
hum mein jauhar the ibaadat khas ke
kar diya insan ye mitti khwar ki
mahr-o-mah ko umr bhar dekha kiye
thi tamanna ru-e-pur-anwar ki
aur ai 'bahram' ek likkho ghazal
aap ko qillat nahin ashaar ki

hum na but-KHane mein ne masjid-e-viran mein rahe

By

hum na but-khane mein ne masjid-e-viran mein rahe
hasrat-o-arzu-e-jalwa-e-jaanan mein rahe
khun hai wo jis se ki ho daman-e-qatil rangin
khun fasid hai jo khali sar-e-mizhgan mein rahe
hum ne masnua se sane ki haqiqat pai
be-sabab hum nahin nazzara-e-khuban mein rahe
subh khurshid ko dekha hawas-e-ariz mein
sham se raushni-e-sham-e-shabistan mein rahe
toda zunnar ko tasbih ko phenka hum ne
ishq-e-rukh tha hawas-e-nur-e-darakhshan mein rahe
ja-ba-ja hum ko rahi jalwa-e-jaanan ki talash
dair-o-kaba mein phire sohbat-e-rahban mein rahe
khalwat-e-dil ki na kuchh qadr ko samjhe haji
tauf-e-kaba ke liye dasht-o-bayaban mein rahe
un asiron ko hui qaid-e-tayyun se najat
jo ki paband tere gesu-e-pechan mein rahe
is zamin mein ghazal ek aur bhi likkho 'bahram'
ye do-ghazla to bhala aap ke diwan mein rahe