tishnagi labon par hum aks-e-ab likkhenge

tishnagi labon par hum aks-e-ab likkhenge
jin ka ghar nahin koi ghar ke khwab likkhenge
tum ko kya khabar us ki zindagi pe kya biti
zindagi ke zakhmon par hum kitab likkhenge
jis hawa ne kati hain khamushi ki zanjiren
us hawa ke lahje ko inqalab likkhenge
jhut ki parastish mein umr jin ki guzri hai
tirgi-e-shab ko wo aaftab likkhenge
sher ki sadaqat par hum yaqin rakhte hain
maslahat ke chehron ko ba-naqab likkhenge
suliyon pe jhulega bad-nihad har munsif
munsifi ka jab bhi hum khud nisab likkhenge
gham nahin jo khwabon ki lut gai hain tabiren
hum nazar ke taqon mein aur khwab likkhenge
harz-e-jaan samajhte hain hum watan ki mitti ko
apne ghar ke kharon ko hum gulab likkhenge
is ghazal ke partaw mein be-gharon ki baaten hain
be-gharon ke nam us ka intisab likkhenge
har dalil katenge hum dalil-e-raushan se
'bakhsh' sau sawalon ka ek jawab likkhenge

samundar ka tamasha kar raha hun

samundar ka tamasha kar raha hun
main sahil ban ke pyasa mar raha hun
agarche dil mein sahra-e-tapish hai
magar main dubne se dar raha hun
main apne ghar ki har shai ko jala kar
shabistanon ko raushan kar raha hun
wahi lae mujhe dar-o-rasan par
main jin logon ka paighambar raha hun
wahi patthar laga hai mere sar par
azal se jis ko sajde kar raha hun
tarashe shahr main ne 'bakhsh' kya kya
magar khud ta-abad be-ghar raha hun

rut na badle to bhi afsurda shajar lagta hai

rut na badle to bhi afsurda shajar lagta hai
aur mausam ke taghayyur se bhi dar lagta hai
dard-e-hijrat ke satae hue logon ko kahin
saya-e-dar bhi nazar aae to ghar lagta hai
ek sahil hi tha girdab-shanasa pahle
ab to har dil ke safine mein bhanwar lagta hai
bazm-e-shahi mein wahi log sar-afraaz hue
jin ke kandhon pe hamein mom ka sar lagta hai
kha liya hai to use dost ugalte kyun ho
aise pedon pe to aisa hi samar lagta hai
ajnabiyyat ka wo aalam hai ki har aan yahan
apna ghar bhi hamein aghyar ka ghar lagta hai
shab ki sazish ne ujalon ka gala ghunt diya
zulmat-abaad sa ab nur-e-sahar lagta hai
manzil-e-sakht se hum yun to nikal aae hain
aur jo baqi hai qayamat ka safar lagta hai
ghar bhi virana lage taza hawaon ke baghair
baad-e-khush-rang chale dasht bhi ghar lagta hai

ruKH-e-hayat hai sharminda-e-jamal bahut

rukh-e-hayat hai sharminda-e-jamal bahut
jami hui hai abhi gard-e-mah-o-sal bahut
gurez-pa hai jo mujh se tera visal to kya
mera junun bhi hai aamada-e-zawal bahut
mujhe har aan ye deta hai wasl ki lazzat
wafa-shanas hai tujh se tera khayal bahut
kitab-e-zist ke har ek waraq pe raushan hain
ye teri farda-nigahi ke khad-o-khal bahut
palat gae jo parinde to phir gila kya hai
har ek shakh-e-shajar par bichhe hain jal bahut
tumhein hai naz agar apne husn-e-sarkash par
to mera ishq bhi hai ru-kash-e-jamal bahut
azan-e-subh ki har lai ki tar tut gae
farogh-e-zulmat-e-shab ka hai ye kamal bahut
kisi bhi pyas ke mare ki pyas bujh na saki
samundaron mein to aate rahe uchhaal bahut

koi shai dil ko bahlati nahin hai

koi shai dil ko bahlati nahin hai
pareshani ki rut jati nahin hai
hamare khwab chori ho gae hain
hamein raaton ko nind aati nahin hai
koi titli kaman-daron ke dar se
faza mein pankh phailati nahin hai
har ek surat hamein bhati nahin hai
koi surat hamein bhati nahin hai
jis aazadi ke naghme hain zaban par
wo aazadi nazar aati nahin hai
badan be-harkat-o-be-his pade hain
lahu ki bund garmati nahin hai
musalsal posh ki chabuk-zani se
meri aashuftagi jati nahin hai
zawal-e-fikr-o-fan ki 'bakhsh' tohmat
jalal-e-harf par aati nahin hai

husul-e-manzil-e-jaan ka hunar nahin aaya

husul-e-manzil-e-jaan ka hunar nahin aaya
wo raushni thi ki kuchh bhi nazar nahin aaya
bhatak rahe hain abhi zist ke sarabon mein
musafiron ko shuur-e-safar nahin aaya
tamam raat sitara-shanas rote rahe
nazar ganwa di sitara nazar nahin aaya
hazar minnaten kin waste khuda ke diye
ye rah-e-rast pe wo rahbar nahin aaya
zaban-e-sher pe mohar-e-sukut hai ab tak
jalal-e-saut-o-sukhan rang par nahin aaya
wo tak rahe hain azal se faraaz-e-gardun par
nazar kisi ko bhi najm-e-sahar nahin aaya
hamare shahr ke har sang-bar se ye kaho
hamari shakh-e-shajar par samar nahin aaya
har ek mod pe hum ne bahut sadaen din
safar tamam hua ham-safar nahin aaya
dayar-e-ghair se mera wo sar-phira beta
gaya hai ghar se to phir laut kar nahin aaya