dida-e-be-rang mein KHun-rang manzar rakh diye

dida-e-be-rang mein khun-rang manzar rakh diye
hum ne is dasht-e-tapan mein bhi samundar rakh diye
wo jagah jo lal-o-gauhar ke liye maqsud thi
kis ne ye sang-e-malamat us jagah par rakh diye
ab kisi ki chikh kya ubhre ki mir-e-shahr ne
sakinan-e-shahr ke sinon pe patthar rakh diye
shakh-saron par na jab izn-e-nasheman mil saka
hum ne apne aashiyan dosh-e-hawa par rakh diye
ahl-e-zar ne dekh kar kam-zarfi-e-ahl-e-qalam
hirs-e-zar ke har taraazu mein sukhan-war rakh diye
hum to abresham ki surat narm-o-nazuk the magar
talkhi-e-haalat ne lahje mein khanjar rakh diye
jis hawa ko wo samajhte the ki chal sakti nahin
us hawa ne kat kar lashkar ke lashkar rakh diye
'bakhsh' sayyaad-e-azal ne hukm-e-azadi ke sath
aur asiri ke bhi khadshe dal ke andar rakh diye

usi ke zulm se main haalat-e-panah mein tha

usi ke zulm se main haalat-e-panah mein tha
har ek nafas mera jis shakhs ki panah mein tha
chamak raha tha wo khurshid-e-do-jahan ki tarah
wo hath jo ki gareban-e-kaj-kulah mein tha
ufuq ufuq ko payam-e-sahr diya main ne
mera qayam agarche shab-e-siyah mein tha
mahak rahe the nazar mein gulab sapnon ke
khuli jo aankh to dekha main qatl-gah mein tha
mere harif mujhe raund kar nikal na sake
fasil-e-sang ki surat khada main rah mein tha
jo baat baat pe karta tha inqalab ki baat
saji salib to wo hamiyan-e-shah mein tha
adu ki fauj ne luta to kya sitam ye hai
'rais'-e-shahr bhi shamil isi sipah mein tha

qatil hua KHamosh to talwar bol uThi

qatil hua khamosh to talwar bol uthi
maqtal mein khun-e-garm ki har dhaar bol uthi
puchha subuk saron ka numainda kaun hai
sun kar faqih-e-shahr ki dastar bol uthi
ahl-e-sitam ke khauf se jo chup thi wo zaban
jab bolne pe aai sar-e-dar bol uthi
meri tabahiyon ki hai is mein khabar zarur
az khud har ek surkhi-e-akhbar bol uthi
chehra tha zakhm zakhm koi puchhta na tha
yusuf bane to garmi-e-bazar bol uthi
ek nakhuda hi yurish-e-tufan pe chup raha
chappu kabhi to aur kabhi patwar bol uthi
kuchh is tarah se naqsh the inton pe sanche ke
zindan mein mujh ko dekh ke diwar bol uthi

paDe hain rah mein jo log be-sabab kab se

pade hain rah mein jo log be-sabab kab se
pukarti hai unhen manzil-e-talab kab se
ye aur baat makinon ko kuchh khabar na hui
laga rahe the muhafiz magar naqab kab se
koi bhi harba-e-tashhir kargar na hua
tamashbin hi rahi shohrat-e-adab kab se
ukhad gai hain tanaben sitam ke khemon ki
ulat gai hai bisat-e-hasab-nasab kab se
na hausla hai dua ka na aah par hai yaqin
ki hum se ruth gaya hai hamara rab kab se
samundaron se koi mauj-e-sar-buland uthe
ki sahilon pe tadapte hain jaan-ba-lab kab se
wo hum ne chun diye tanqid ki salibon par
machal rahe the jo kuchh harf zer-e-lab kab se

samundar ka tamasha kar raha hun

samundar ka tamasha kar raha hun
main sahil ban ke pyasa mar raha hun
agarche dil mein sahra ki tapish hai
magar main dubne se dar raha hun
main apne ghar ki har shai ko jala kar
shabistanon ko raushan kar raha hun
wahi lae mujhe dar-o-rasan par
main jin logon ka paighambar raha hun
wahi patthar laga hai mere sar par
azal se jis ko sajde kar raha hun
tarashe shahr main ne 'bakhsh' kya kya
magar khud ta-abad be-ghar raha hun

rut na badle to bhi afsurda shajar lagta hai

rut na badle to bhi afsurda shajar lagta hai
aur mausam ke taghayyur se bhi dar lagta hai
dard-e-hijrat ke satae hue logon ko kahin
saya-e-dar bhi nazar aae to ghar lagta hai
ek sahil hi tha gardab-e-shanasa pahle
ab to har dil ke safine mein bhanwar lagta hai
bazm-e-shahi mein wahi log sar-afraaz hue
jin ke kandhon pe hamein mom ka sar lagta hai
kha liya hai to use dost ugalte kyun ho
aise pedon pe to aisa hi samar lagta hai
ajnabiyat ka wo aalam hai ki har aan yahan
apna ghar bhi hamein aghyar ka ghar lagta hai
shab ki sazish ne ujalon ka gala ghunt diya
zulmat-abaad sa ab nur-e-sahar lagta hai
manzil-e-sakht se hum yun to nikal aae hain
aur jo baqi hai qayamat ka safar lagta hai
ghar bhi virana lage taza hawaon ke baghair
baad-e-khush-rang chale dasht bhi ghar lagta hai