rudad-e-shauq ye hai meri muKHtasar tamam

By

rudad-e-shauq ye hai meri mukhtasar tamam
ranaiyon mein kho gaya zauq-e-nazar tamam
guzra hai gul-badan koi meri talash mein
mahki hui hai aaj meri rahguzar tamam
wo din bhi kya the jab thi hawaon se guftugu
ab hum se baat karte hain diwar-o-dar tamam
khud apna ehtisab gawara nahin unhen
auron mein aib dhundte hain dida-war tamam
tanhaiyan nasib ka unwan ban gain
ek ek kar ke chhut gae ham-safar tamam
hone lage hain meri khamoshi pe tabsire
ab jaan le ke chhodenge ye chaaragar tamam
kya soch kar chale the 'ziya' rah-e-shauq mein
shayad na ho sake ye safar umr-bhar tamam

ranj-e-na-asudgi karb-e-hunar dekhega kaun

By

ranj-e-na-asudgi karb-e-hunar dekhega kaun
naqsh-e-faryaadi hai kis ka dida-war dekhega kaun
jumbish-e-lab hi se khul jaega mani ka bharam
us ke harf-na-shanida ka asar dekhega kaun
apni duniya tak rakho mahdud parwazen abhi
nilgun pahnaiyon mein baal-o-par dekhega kaun
apne kamre ka koi gul-dan khali kyun rahe
phul kaghaz ke saja lo sungh kar dekhega kaun
ek khilauna tod kar chalti bani pagal hawa
ab ye reza reza paikar jod kar dekhega kaun
kitni tahzibon ka madfan hai hamari zindagi
jagmagae shahr mein lekin khandar dekhega kaun

nikhat-o-rang na mausam ki hawa Thahri hai

By

nikhat-o-rang na mausam ki hawa thahri hai
gul ki qismat mein ba-har-haal fana thahri hai
zakhm-e-dil khil uthe hanste hue phulon ki tarah
ek lamhe ko jahan baad-e-saba thahri hai
maut ko kahiye ilaj-e-gham-e-hasti lekin
zindagi kaun se jurmon ki saza thahri hai
aur mansur koi mashhad-e-hasti mein na tha
laeq-e-dar jo ek meri ana thahri hai
husn-e-mukhtar hai har baat rawa hai is ko
fitrat-e-ishq to paband-e-wafa thahri hai
koi naghma koi jhankar koi hosh-ruba
dil hi bahla len tabiat jo zara thahri hai

na puchho wajh meri chashm-e-tar ki

By

na puchho wajh meri chashm-e-tar ki
miyan phir gir gai diwar ghar ki
ye mana dhul gaya suraj saron se
mere aangan ki dhup ab tak na sar ki
jabin tar khushk-lab talwon mein chhaale
yahi rudad hai apne safar ki
badi neki izafi masale hain
hukumat hai dilon par sirf dar ki
gumanon ka muqaddar hai bhatakta
yaqin ne har muhim duniya ki sar ki
na saya hai na shakhon mein samar hain
zarurat kya hai ab sukhe shajar ki
jhulasti dhup barish sard raaten
ba-har-surat 'ziya' hum ne basar ki

koi KHadsha hai na tufan bala kuchh bhi nahin

By

koi khadsha hai na tufan bala kuchh bhi nahin
ab na ghamza hai na andaz-o-ada kuchh bhi nahin
ishq kahte hain kise husn hai kya kuchh bhi nahin
meri aankhen teri surat ke siwa kuchh bhi nahin
kab se viran padi hai mere dil ki duniya
koi naghma kisi pael ki sada kuchh bhi nahin
zahr se kam nahin ye saghar-e-mai mere liye
tu nahin hai to ye mausam ye faza kuchh bhi nahin
tere chehre pe qayamat hai haya ki surkhi
rang-e-gul rang-e-shafaq rang-e-hina kuchh bhi nahin

karb mein pyar ke naghmat sunain kaise

By

karb mein pyar ke naghmat sunain kaise
gham haqiqat se haqiqat ko chhupaen kaise
lab-o-ariz ke taqazon ko bhala kar yaro
dur aa pahunche hain ab laut ke jaen kaise
an-ginat jam piye zillat-o-ruswai ke
zindagi aur tere naz uthaen kaise
dil jo dukhta hai 'ziya' aankh bhi bhar aati hai
log fitrat ke taqazon ko chhupaen kaise