zarra zarra pighalne wala tha

By

zarra zarra pighalne wala tha
sara manzar badalne wala tha
sabr hum se na ho saka warna
apni zid se wo talne wala tha
zabt karte to ek ek zarra
raaz apna ugalne wala tha
tum andheron se dar gae yun hi
warna suraj nikalne wala tha
tum ne achchha kiya jo tham liya
warna main kab sambhalne wala tha
jo raha ek harif ki manind
wo mere sath chalne wala tha
zehn mein wo jo aks tha kab se
lakh shaklon mein dhalne wala tha

shahr badla hua sa lagta hai

By

shahr badla hua sa lagta hai
har koi upra sa lagta hai
mujh ko aksar khud apne andar hi
kuchh bhatakta hua sa lagta hai
jaane kya baat hai ki ghar mujh ko
rose girta hua sa lagta hai
mujh ko har shakhs apni basti ka
khud se rutha hua sa lagta hai
dard se yun najat kab hogi
waqt thahra hua sa lagta hai
zakhm khae hue zamana hua
dard ab tak naya sa lagta hai
dastanen hain khub sab ki magar
apna qissa juda sa lagta hai

rah mein yun to marhale hain bahut

By

rah mein yun to marhale hain bahut
ham-safar phir bhi aa gae hain bahut
ye alag baat hum na dhundh sake
warna manzil ke raste hain bahut
jin ko manzil na raste ka pata
aise rahbar hamein mile hain bahut
aao suraj ko chhin kar laen
ye andhere to badh gae hain bahut
dur ki manzilen hain nazron mein
ab ke yaron ke hausle hain bahut
ek junun ka jo daur tha mujh par
us ke qisse hi ban gae hain bahut
baat kya hai ki in dinon hum log
sochte kam hain bolte hain bahut

raat kya Dhal gai samundar mein

By

raat kya dhal gai samundar mein
ghul gai tirgi samundar mein
ek surkhi pahad se ubhri
phir utarti gai samundar mein
ek safina kahin pe duba tha
kitni halchal hui samundar mein
khud samundar ki nind tut gai
raat kuchh yun dhali samundar mein
gharq hota gaya koi sahra
dhul udti gai samundar mein
koi tufan zarur uthna tha
apni kashti jo thi samundar mein

phir faza mein koi zahrila dhuan bhar jaega

By

phir faza mein koi zahrila dhuan bhar jaega
phir kisi din apne andar kuchh na kuchh mar jaega
phailta jata hai ye jo har-taraf ek shor sa
ek sannata kisi dahliz par dhar jaega
yun raha to sare manzar bad-numa ho jaenge
ek bhayanak rang har taswir mein bhar jaega
kar raha hai apni basti mein jo khushiyon ki talash
koi tikha dard apne sath le kar jaega
yun achanak bhi hua karta hai koi hadisa
mujh ko kya malum tha wo is tarah mar jaega
chha gai nafrat ki gahri dhund itni dur tak
pyar ka suraj wahan tak kaun le kar jaega
rah-rau ab tak khade hain rah mein is aas par
koi aaega idhar aur kuchh na kuchh kar jaega

koi manzil bhi nahin hai koi rasta bhi nahin

By

koi manzil bhi nahin hai koi rasta bhi nahin
aur sab mahw-e-safar hain koi rukta bhi nahin
har taraf be-rang si gahri udasi ka jamaw
ek rangin khwab jo nazron se hatta bhi nahin
kis tarah thame hue hain khud ko us basti ke log
koi mutawazin nahin hai aur phisalta bhi nahin
ek musalsal si ye sai-e-raigan ye kawishen
ek patthar sa ye manzar jo pighalta bhi nahin
be-sabab si tis dil mein mustaqil hoti hui
jazba-e-bebak jo dil mein utarta bhi nahin
har taraf ye dhup har-dam tez-tar hoti hui
mom ka ek shahr lekin jo pighalta bhi nahin