chuTkiyan leti hai goyai kise aawaz dun

By

chutkiyan leti hai goyai kise aawaz dun
kis ko hai taufiq-e-shunwai kise aawaz dun
sar mein sauda hai na dil mein aarzu kis se kahun
jalwaten mange hai tanhai kise aawaz dun
apni nazron mein to mera zoam-e-hasti laghw hai
kis se puchhun apni sachchai kise aawaz dun
bech dunga main zamir apna agar taskin mile
ai musalsal ruh-farsai ke aawaz dun
meri hasrat koi puchhe mujh se mera haal-e-dil
log apne apne shaidai kise aawaz dun
aazmaish ka ye pahlu bhi hai kya malum tha
kaamrani ki ghadi aai kise aawaz dun
kis ke nam aakhir karun 'hairat' main apni wahshaten
muntazir hai dasht-paimai kise aawaz dun

dil ke hathon KHarab ho jaana

By

dil ke hathon kharab ho jaana
zindagi kaamyab ho jaana
mujh se kab aise moajize honge
khud hi izzat-maab ho jaana
aaj gul ban le zakhm-e-tanhai
phir kabhi aaftab ho jaana
main ne taskin-e-karb mangi hai
ai dua mustajab ho jaana
jab kisi imtihan se khauf lage
tum mere ham-rikab ho jaana
khwab ko sach mein dhaalne ki lagan
dekhiyo khud na khwab ho jaana