ye zard bachche

By

gharon ki raunaq
ye zard bachche
padhen likhenge jawan honge
maash ki fikr in ki qismat
talash-e-farda hayat in ki
ye rahguzaron pe apne mauhum khwab le kar phira karenge
ye ghar banaenge shadyane bajaenge aane wale rangin dinon ki khatir
ye chand luqmon ki zindagi ka maal samjhenge hasb-e-dastur
umr bhar un ko ungliyon par gina karenge
ye mera hissa
ye tera hissa
phir ek din
ye bhi zard bachchon ke bap honge
aur un ki khatir dua karenge
daraaz ho in ki umr dekhen ye sau bahaaren

tarsil

By

kuchh log ye kahte hain ki achchha ya bura kuchh bhi nahin hai
taqrib-e-wiladat ho ya hangam-e-dam-e-marg
ek lamhe ko taswir mein dhalna hai wo dhal jata hai aakhir
wo naghma ho ya girya ya andaz-e-takallum
sab aks hain asrar-e-fusun-kar ke shayad
yaksan hain mukafat ki yurish mein sabhi rang
sargoshiyan karte hain guzar jate hain aankhon ke jahan se
paimana-e-jaan se
kya jhut hai kya sach hai kise kaun batae
sab shor-e-salasil mein utar aae hain kuchh soch rahe hain
taswir ke do rukh the kabhi sunte hain ab lakh hue hain
insan ya haiwan ya be-jaan koi nam nahin hai
ek raqs-e-tamawwuj hai shabihon ka hayyulon ka sadaon ka faramosh dilon ka
is rah se guzre the tumhein rok liya apna samajh kar
baaten bhi huin tum ko zara der ko sine se lagaya
aankhon mein dil o jaan mein basaya
jaoge tumhein jaana hai malum tha mujh ko
sach ye hai ki tanwir-e-mulaqat se raushan tha ye lamha
sach ye hai ki sar-e-rah charagh us ne jalaya
sach ye hai ki be-sakhta jazbaat se raushan tha ye lamha
imroz ye mera tha, magar meri dua hai
ye lamha hum donon ke imkan ka mehwar
kal bhi ye kare donon ko hum donon ko sarshaar munawwar

tahlil

By

main raat aur din ki
masafat mein
rangon ki tafsir mein
apne sare azizon ke
apne hi hathon se
qatl-e-musalsal mein masruf hun
phir main kyun sochta hun
sar-e-jam, har shab
ki dida-wari ki mata-e-firozan se
sarshaar hota
to har khufta sar-basta tahrir se
main gale mil ke rota
sadaon ki sargoshiyon mein utarta
ajab hadsa hai ki kuchh der pahle
mere samne ek ghayal parinda
gira hai mere panw mein
samne ke fasurda o be-barg
be-rang se ped se
mere jam-e-shikasta mein
baqi the qatre mai-e-kham ke kuchh
inhen chashm-e-minqar se ye musafir
bade ghaur se dekhta hai
inhen gin raha hai ye shayad
main sailab-e-tahlil mein hun
yahan se kahan jaunga
dur gar ja sakta to wahan se
yahan laut kar kis tarah
aaunga main

shayad

By

kuchh log
jo mere dil ko achchhe lagte the
umron ke rele mein aae
aur ja bhi chuke
kuchh dhandon mein masruf hue
kuchh chuha-daud mein jite gae
kuchh haar gae
kuchh qatl hue
kuchh badhti bhid mein
apne-ap se dur hue
kuchh tut gae kuchh dub gae
mujh par ye khauf ab chhaya hai
main kis se milne jaunga
main kis ko pas bulaunga
aandhi hai, garm hawa hai, aag barasti hai
kuchh der hui
ek surat, shabnam si surat
is tapti rah se guzri thi
do bachche ped ke patton mein chhup kar baithe the
hanste shor machate the
ek dost purana
barson baad mila mujh ko
us jalte din ki
subh kuchh aisi raushan thi
jab baad-e-saba warafta-rau
khushbuon, naghmon, nannhi-munni baaton ka
andaz liye aangan mein chali
main zinda hun
ye soch ke khush ho jata hun
wo thodi der to mere pas se guzri thi
wo mere dil mein utri thi
is be-mahram se mausam mein
shayad wo kal bhi aaegi
shayad wo kal bhi meri rah se guzregi

sard, tarik raat

By

is qadar tera o sard hargiz na tha dil ka mausam kabhi
ek pal mein khuda jaane kya ho gaya
chand ki wadiyon mein utar aai shab!
main wo tanha subuk-pa musafir tha takmil ki justuju
khinch lai thi ek roz jis ko yahan
aarzu thi mujhe main zamin ke liye
meri tarrar purkar chashm-e-nihan
faslon sarhadon
waqt ke sab hisaron ke us par ki
shahr-e-imroz mein
an-ginat khubsurat tasawir aawezan kar degi jab
dur ki har pur-asrar sarshaar aawaz mere lahu mein utar jaegi
mere daman ko phulon se bhar jaegi
sard se sard-tar
har ghadi ho rahi hai rag-o-pai mein bahte anasir ki rau
shab guzar jaegi
chand ki munjamid wadiyon mein sulagti hui raushni
subh-dam ek pal mein umand aaegi
mujh ko dar hai magar
saat-e-nau ke hangam se peshtar
tera sard shab ka bhayanak amal
dil ke aafaq par
ho na jae kahin maut tak hukmaran
khatm ho jae takmil ki dastan!!

sar-e-rahguzar ek manzar

By

qafas ka dar khula ek nim-jaan kam-sin
parinda chand khasta zaichon par raqs ke andaz mein aage
badha, phir chonch se apna pasandida
musawwar zaicha us ne uthaya aur apne hi
hidayat-kar ke aage
adab se rakh diya jhuk kar
hidayat-kar garche nur se tha bad-guman mahrum na-khwanda
sar-e-sail-e-rawan ek barg-e-be-maya
nawisht-e-bakht ke asrar se waqif tha wo shayad
nazar ke ru-ba-ru us ne
mata-e-be-nihayat ke fasane se mujhe khush-haal kar dala
mujhe pamal kar dala
sabhi mauj-e-ziya mein the
sabhi ke chashm o dil mein ek shola tha
sabhi khamosh gum-sum hain
yahan se kaun jaega
yahan par kaun aaega
parinda nim-jaan kam-sin
qafas mein ja chuka kab ka
hidayat-kar ki aankhon mein laut aai hai virani
jo kal khali tha wo dast-e-talab hai aaj bhi khali
labon par lutf-e-andam-e-nihan ki an-suni gali