sandesa

By

use kahna
yahan sab kuchh
tumhaare bin adhura hai
gae lamhon ki yaaden hain
azab-e-zindagani hai
firaq-e-na-gahani hai
use kahna
ki laut aae

nae samay ki koyal

By

phail rahi hai chaaron jaanib
nae samay ki sundar khushbu
aane wale kal ki qismat
na main jaanun na jaane tu
sabza rangat titli jugnu
jaane kab se chamak rahe hain
ped ki har ek shakh pe aansu
aur is ped ki ek dali par
koyal karti jae ku ku
koyal karti jae ku ku
dekhti jae yunhi har su
waqt ko jate dekh rahi hai
aur ye baithi soch rahi hai
guzre sal ne kya bakhsha hai
agle samay mein kya likkha hai
pichhle sal ke bashinde to
ab bhi sazaen kat rahe hain
ek duje ke sog mein baithe
apne lahu ko chat rahe hain
dekhen agle sal mein kya ho
ped ki shakhon par kya hoga
shabnam tare jugnu aansu
koyal baithi soch rahi hai
waqt ko jate dekh rahi hai
koyal karti jae ku ku

mujhe ek sher kahna hai

By

udasi ke hasin lamhon
kahan ho tum
ki main kab se
tumhaari rah mein
khwabon ke nazrane liye baitha
hasin yaadon ki jholi mein
kahin gum hun
are lamho
mujhe is khwab se bedar karne ke liye aao
meri sochon ke khakon mein
are lamhon
koi ek rang bhar jao
mujhe ek sher kahna hai

man

By

wo kaun hai jo udas raaton ki chandni hain
kai duaen labon pe le kar
malul ho kar
bhula ke sari thakan din ki
ye sochti hai
ki main na jaane hazar milon pare jo baitha hun
kis tarah hun
wo kaun hai jo udas raaton ke rat-jage mein
duaon ki mishalen jalane khadi hui hai
duaen jis ki mere liye hain
main un duaon ke zer-e-saya
zamin se aasman ki jaanib yun mahw-e-parwaz hun ki jaise
bashar-gazida khuda se milne ko ja raha ho
phir ek lamhe ko mere andar se itni aawazen gunjti hain
main in se barson se aashna hun
ye hath jo ki buland ho kar laraz rahe hain
ye hath mere liye tahaffuz ka istiara
ye hath mere liye jahan ki
hazar khushbu se baala-tar hain
yahi to hain wo jinhon ne mujh ko
qadam uthana qadam badhana sikha diya hai